90
BU LINA (90 – 106)
Nam Mite Dinga Mose Taona
Pathen mipa, Mose taona,
 
1 Pakai, akhang-akhang'a nangma hi
ka chennau inn nahi jing'e!
2 Mol le lhang ho pen masang,
vannoi le leiset hi na tundoh masangin,
thil jouse kipat a pat ajona chanin jong, nangma Pathen nahi jing'e.
 
3 Nangin mihem hi ana hina masa a kile kit dingin nasol'in,
“Leivui nale sosah kitjin ahi!”
4 Nang din, kum sangkhat jeng jong hi ache jingin,
tunikho bang bep ahin, jan phat chomcha tobang bou ahi.
5 Nangin twisoh bangin nei lhohmang jiuvin mang sangin asotjo dehpoi.
Keiho hi hampa jingkah langa hung pahdoh tobang bou kahiuve.
6 Hichu akhangdoh loijin,
ahinla nilhah lang le agoplha jin athiji tai.
7 Keiho hi nangma lunghan nan eisumangji tauvin;
chuleh na lungsat nan eikichat sah un ahi.
8 Nangin ka chonset nau na masang'ah na tahlang jin—
aguh a ka chonset nau hi—na kilandoh sah jin ahi.
9 Na lungsatna noiya hing jing ka hinkhou ahin,
ka kumkhou jong lungsat nan abeiloi jitai.
 
10 Keiho hi kum somsagi hing ding bep kahiuve!
Kahat tah uleh kum somget bep hing ding kahiuve.
Ahinla hiche sunga chun natna le boina bou ahin;
amang loiji tauvin, chule keiho kaleng mang tauve.
11 Nalung hanna thahat koi ham ahe thei ding'ah?
Naging a na lungsat khohje gelkhoh a koi ham?
12 Kachih theina diuvin,
ka hinkhou chomdan hi nei hetsah tauvin.
 
13 O Pakai, kaheng uva hung kile kit tan!
Itih chan nei khongai diu hitam?
Na sohte hi nei khoh sah uvin!
14 Jingkah seh le na lungset longlou chun ka lungthim kipasah in,
chutile ka hinkhou lhumkei a na vahchoi la kasah jing diu ahi.
15 Hesoh genthei kana thoh hou chuga kon'in lunglhaina themkhat beh nei peuvin!
Ka khoisat nau kum ho jong kipana nei sodoh peh un.
16 Na sohte hi na thilbol kidangtah ho chu neimu sah un;
ka chilhah teuvin na thaneina loupitah chu mu uhen.
17 Chuteng Pakai ka Pathen un na malsom nau chu eimu sah uhen lang
chule katohna jouse uvah nei lolhinna sah un.
Henge, katohna jouse uvah nei lolhinna sah un!