88
Thina A Kon'a Lhatdohna Dinga Taona.
“Hesoh genthei” lakai a sah dia Ezrah mi Heman in la lamkaipa henga dia alabol.
1 O Pakai, eihuhhing'a ka Pathen,
sun leh nangma kakouve.
Jan leh nakom kahin nailut ji e.
2 Tun ka kouna neijah peh in lang;
ka taona nei sanpeh in.
3 Ajeh chu ka hinkho hi boina adim'in,
thinan eikai nai cheh-cheh e.
4 Athisa bang bep kahitai,
mi thahat tah khat athahatna bei nungsang bep kahi tai.
5 Ama hon mithi lah a eidalha uvin,
lhan'ah mithi lup in kalum e.
Keima hi suhmil in kaum tan,
nami kaihoina a kon'in eiki lamang tai.
6 Nangin kotong noinung pen,
athimpen ah nei sonlha e.
7 Nalung hanna gihtah chun eidel phan;
hichu twi kinong bangin akinong'in eichup tai.
Selah
8 Keima hi doumah in neisem in
kagol kapai ho nei delmang peh gamtai.
Keima hi thang'ah ka-oh in kitoldoh thei louvin kaum'e.
9 Ka mitlhin kamit achupmin kho muthei louvin kaum'e.
O Pakai, niseh in na panpina kathum in;
nami lungsetna ngaichan kakhut teni kahin sange.
10 Nathil kidang bol ho hi mithi dinga phachom ding hinam?
Mithi hung thodoh a na thangvah thei ding hinam?
Selah
11 Lhankhuh um hon na mingailutna longlou hi ahin phongdoh thei nadiuvem?
Suhmangna mun'a um hon na kitahna hi aphongdoh thei nadiuvem?
12 Muthim'in na thilbol kidang ho hi aseiphong nadiuvem?
Thil suhmil delna gam'a umhon na chonphatna ho chu aseiphong thei nadiuvem?
13 O Pakai, nangma kakouve.
Niseh a nakom'a katao jing ding ahi.
14 O Pakai, ibolla kei nei paidoh hitam?
Ibol a keiya kon a naki heimang hitam?
15 Kakhang donlai apat a kanatna hin thina komcha eina lhutsa ahitai.
Na gimneina masanga hin thabei leh lungkham tah in ka ding'e.
16 Nalung hanna tijat umtah chun eilonvuh e.
Tijatna umna chun eithabei sah e.
17 Hiche ho chun sun nilhum in twisoh bangin kavel a eilon khum'un ahi.
Muthim hi ka kinaipi pen kagol'in apang un ahi.
18 Nangman ka mite le ka ngailut cheng nei lahpeh tai.
Thimjing hi ka kinaipi pen kaloi chu ahitai.