al-Zobur 29
Hozrot Daudor mizmor.
1 O firista oḳol, zanao Mabudor gunogan,
gourob ar bol-shoktir ḳota zanao tan,
2 Mabudor name tan faona gourob zanao,
fobitrotar haze hazia soizdat foṛi zao.
3 Mabudor golar aoaz doriar ufre zari ase,
boṛai-shanor Allar gorzon baz foṛar laḳan ḍaḳe.
Allar hunkar zari ase goin doriar ufre.
4 Mabudor golar aoaz bout boloban,
tan golar aoaz oti mohan.
5 Mabudor golar shure debdaru gas bangizae,
Lebanonor debdaru gas-o bangia foṛizae.
6 Tan shure basuror laḳan nase Lebanon,
zongli boyrar baichchar laḳan falae Sirion.
7 Tan golar aoaz hunia,
asman uṭe zilḳaia.
8 Mabudor golar shure morubumi kafia uṭe,
Kadesh deshor morubumi kafain Mabude.
9 Elon gas-o alizae Mabudor aoaz hunia,
zonglar fata-sata foṛi zae siṛia,
Kaba goror hoḳole ḳoy, Subohan Alla!
10 Moha boinnar fani asil Mabudor zimmae,
siroḳalin bashsha tain, boisoin arosh ḳanae.
11 Bol-shokti dein Mabud tan afon prozare,
shanti dia rohom ḳoroin tara hoḳolre.