al-Zobur 28
Hozrot Daudor mizmor.
1 O Mabud amar asroy faṛ, tumare ḍakiar,
amar lagi bond ḳorio na duio ḳan tumar,
nirai roile tumi amar lagia,
roshatolo zaorar laḳan oibo mor dosha.
2 Ami zebla tumar gese zure zure ḳandi,
tumar ḳas pak zagar bae duio at tuli,
ou shomoy hunio go doyal amar minoti.
3 Naforman bodḳuror loge ḳori nio na more ṭania,
tara muke muke deḳae bala dilo ḳarafi rakia.
4 Tarar ḳam mafik fol tarare deo,
tarar ḳaraf ḳamor fol tarare deo,
tarar ator bod ḳamor bodlai tarare deo,
tarar faona shoṭik shaza tarare dilao.
5 Mabudor ḳam-ḳaz tarar dilo zaga na fae,
tan ator ḳamor bae tarar kunu kial nae,
erlagi Mabude itare ḳoriliba surmar,
bade kunu din-u itare goṛita nae ar.
6 Hoḳol tarif-gunogan ḳali Mabudor,
tain-u to hunchoin minoti mor!
7 Mabud amar bol-shokti, zan basanir atiar,
tan ufre borosha ḳore dil-zan amar,
tan shaijjo faia hari kushie borse mor dil,
amar golae shukria zanai ḳori tan zikir.
8 Mabud-u to bol-shokti tan afon prozar,
tan ḳelafoti faoa zonor zan basanir bankar.
9 Tumar afon prozare tumi basao go,
tara tumar don-doulot, rohom-borkot deo,
tumi to tarar raḳal, siroḳal boia neo.