al-Zobur 27
Hozrot Daudor mizmor.
1 Mabud-u amar rushni, amare basaneala,
ami ḳare ḍoraitam?
Mabud-u amar asroy ṭikana,
ḳar ḍore ami ḳafitam?
2 Amare gilibar lagi naforman oḳol,
aguia ae zebla ou dushmon dol,
ou shomoy usṭa ḳaia tara foṛi zae,
foṛi zaoae tara bifol bonizae.
3 Shena bahinie zudi berilae more,
amar dile ḍoraito nae tarare.
Amar birudde zudi zuddo lagae,
ami to roimu tumar-u boroshae.
4 Mabudor gese amar ou minoti zanai,
tan dorbaro ḳali otoḳan-u sai—
roitam sai ami Mabudor goro,
amar hara zindegi ḳaṭouk hono,
tan shundor surot ḳan ami zanu deki,
tan mukamo roia ami zikir ḳori.
5 Mosibotor dino tain-u to more
lukaia raḳba tan asroy bankare,
tulia raḳba more faṛor usa ṭillat,
nirafode raḳba more tan boshot ḳanat.
6 Ou shomoy more beria raḳse zeta dushmone,
amar ijjot baṛibo ota zonor ufre.
Kushir suṭe zure zure gozol gaimu ami,
tan goro dan ḳormu lilla-kurbani,
baznar tale tale tan name gaimu ami,
usa golae gaimu ami gozol-ḳaoali.
7 Amar aoaz huno Mabud, ḳori minoti,
doya ḳoria amar ḍaḳor zuaf deo tumi.
8 Tuma taki ou kalam dilo aise mor,
“Amar ashik bonia tumra tallash ḳoro mor didar.”
Mabud go, erlagi-u tumare ḍakiar,
9 na lukaia deḳao go amare muk kan tumar.
Gusa ḳoria ḳedai dio na tumar i gulamre,
tumi-u amar borosha, horai dio na more,
saṛia zaio na tumi amare falaia,
Mabud go tumi-u ḳali amar basaneala.
10 Ma-bafe amare falai dile-o,
Mabude to loisoin more tan-u kulo.
11 O Mabud, tumar afon fot sinao amare,
shorol fote salao more, basao dushmon tone.
12 Dushmon dolor morzir ato dio na shofia,
misa shakkir dol aia dome dome saṛer ingsha.
13 Amar mozbut ekin ase monor bitre,
Mabudor asan deḳmu ami zinda halote.
14 Mozbut o Mabudor ashae, ore zan amar,
dilor maze shaosh ano, ro ashae Mabudor.