al-Zobur 30
Allar goror ian dibar ḳalo hozrot Daudor mizmor.
1 Tumar tarif ḳormu Mabud tulia ancho more,
dushmonre diso na shuzug furti korto mor ufre.
2 Ogo Mabud Alla zure zure fana saisi tumar dorbare,
foriad hunia tumi-u bemar taki shifa ḳorso amare.
3 Fatal takia Mabud tulia ancho more,
hamai geslam goin gato basaiso amare.
4 Mabudor ashik bondae gao tan gunogan,
fak-fobitro zania tane shukur-guzar ḳoro tan.
5 Tan gusa roy na to beshi shomoy,
hara zibon-u tan doya-rohom roy,
raitor bala zae ḳali ḳanda-ḳaṭi kori,
bian oite-u ae kushi ar furti.
6 Shudinor ḳalo ḳoislam to ami-u,
amar binash oito nae kunu din-u.
7 Tumar rohomote Mabud faṛor laḳan mozbut ḳorse more,
zebla tumar muk lukailae ḍor hamaise mor bitre.
8 Zure zure ḍaḳsi go Mabud ami tumare,
doya mangisi ami amar Allar dorbare.
9 Ami zudi hamai zai goin roshatole,
lab kita oibo tumar ami morigele?
Murdar ḳayar duil-balue ḳorbo ni tumar gunogan,
gaibo ni itae tumar hok-halalir boyan?
10 Hunia mor foriad Mabud rohom ḳoro more,
shaijjo ḳoro ogo Mabud tumi amare.
11 Duk-koshṭor halot taki oḳon amare
tulia ancho tumi-u more kushir mahfile,
solar soṭor lebas mor tumi bodlaiso,
kushi-bashir shundor lebas more findaiso.
12 Amar dile hor-hamesha gunogan gaibo tumar,
shukria zanaimu siroḳal Alla Mabud amar.