35
Lebi kandanor boshoti ṭaun
1 Bade Ziriho ṭaunor ḳasat Zordan gangor daro Muab deshor tol zagat Mabude Musare ḳoila,
2 “Tumi Boni Israilre ou hukum deo, tara zarzir ḳandanor zomi-zomar baṭ faia harle, ota taki kisu ṭaun Lebi kandanor manshore dilaita, era ono roiba, erloge bondor kisu zomi-o erare dita.
3 Ou ṭauno tara boshot ḳorba, ar bondor zomino tarar foshur fal raḳba.
4 Tumra Lebi kandanre ze ṭaun oḳol dibae, itar baunḍori oalor bare tarare aro eḳ azar at zaga dibae, tarar foshur fal raḳar lagi.
5 Tumra zoto ṭaun tarare dibae, itar sairo galar baunḍori oalor bare, mani utore-douḳne, fube-foisme, hokkolbae aro dui azar at bondor zaga mafia dio. Ono tarar foshur fal raḳba.
6 “Tumra Lebi kandanre zeta ṭaun oḳol dibae, ermazor soyḳan ṭaun oibo kuni manshor asroy ṭaun. Kunu manshe aḳta ḳeurore marilile, he ou ṭauno gia asroy loibo. Ou soy ṭaun bade-o Lebi kandanre aro beyallish ḳan ṭaun dilaibae.
7 Muṭ aṭchallish ḳan ṭaun Lebi oḳolre dibae, ar erloge foshur fal raḳar bondor zaga-o dibae.
8 Boni Israilor zomi-zoma taki Lebi kandanre zebla ṭaun oḳol dibae, ou shomoy hoḳol ḳandane faoa zominor baṭ taki tarare dibae. Ze ḳandane beshi faise era beshi diba, ar zera ḳom faise era ḳom diba.”
Kuni manshor asroy ṭaun
9 Erbade Mabude Musare ḳoila,
10 “Tumi Boni Israilre ḳo, tumra zebla Zordan gang faroia Kenan desho gia hamaibae,
11 ou shomoy tumrar nizor lagi koyḳan asroy ṭaun ṭik korio. Teu kunu manshe zudi aḳta ḳoza ḳoria ḳeurore kun ḳorilae, te bagia hono gia asroy loibo.
12 Kunor bodla loura manshor ges taki bagia zan basanir lagi i asroy ṭaun. Ete Boni Israilor adaloto bisaror ag forzonto kunor ashamire ḳeu zane marar shuzug faito nae.
13 Erlagi Lebi kandanre tumra ze ṭaun oḳol dibae, itar mazor soyḳan ṭaun oibo tumrar asroy ṭaun.
14 Ermazor tinḳan ṭaun oibo Zordan gangor fubor faro, ar tinḳan oibo Kenan deshor bitre.
15 Ou soyoḳan ṭaun oibo Boni Israilor lagi, tumrar loge roura bin-deshi oḳlor lagi ar musafir oḳlor lagi asroy ṭaun. Erar mazor ḳeu zudi aḳta bekiale ḳeurore kun ḳorilae, te oḳano gia zan basaibo.
16 “Oile kunu manshe zudi luar kunu atiar dia ḳeurore mare ar hou zon morizae, te ogu kuni. Ou kunire zane marilibae.
17 Ze fattor dia kunu manshore kun ḳora zaibo, ila kunu fattor zudi keuror ato taḳe, ar ogudi keurore marae hou manush morizae, te ogu-o kuni. I kunire zane marilibae.
18 Manush kun oar moto kunu laḳṛir zinish zudi keuror ato taḳe, ar ogu dia ḳeurore marae hou manush morizae, te ogu-o kuni. I kunire zane marilibae.
19 Kun oa zonor afon ze manshe i kunor bodla loar ḳota, ḳali he-u ou kunire zane marilibo. Kunir deḳa faile-u tare zane marilibo.
20 “Ar ingsha ḳoria zudi eḳzone aroḳzonre ḍekka mare, ba kunuzat ostrodi ichcha ḳoria iṭa mare ar hou manush morizae,
21 ba dushmonir babe ḳeurore gushi mare ar he morizae, te ze marse he kuni. I kunire zane marilibae. Kun oa zonor afon ze manshe i kunor bodla loar ḳota, he ou kunir lagal faile-u tare zane marilibo.
22 “Oile mono kunu dushmoni na rakia bule aḳta ḳeurore ḍekka marle, ba mono kunu ḳarafi na taḳle-o bule tar ufre iṭa mari dile,
23 ba na dekia, manush morizibar zuka kunu fattor ḳeuror ufre falai dile he zudi morizae, te kunuzat dushmonir bab na taḳae, ar ḳeti korar kunu ichcha na taḳae,
24 Boni Israilor adalotor manshe, ou kunir ar kunor bodla loura zonor befare ou niom mania bisar ḳorba.
25 Ou shomoy adalotor manshe kunor bodla lourar at taki kuni zonre basaiba, basaia he age zeḳano bagia gesil, hou asroy ṭauno tare hirbar fosai diba. Ar fobitro tel dia ḳelafoti faoa fordan imam sabor moutor ag forzonto he hono roibo.
26 Oile he zudi kunu shomoy hou asroy ṭaunor bare bar oia zaegi,
27 ar bodla lourae tare faia zane marilae, te he kunor dayi oito nae.
28 Ḳaron fordan imamor mout na oa forzonto he asroy ṭauno roar ḳota. Ḳali fordan imamor moutor bade he nizor baṛit firia aito farbo.
29 Tumra deshor zeno-u boshot ḳoro na ḳene, oarishor for oarish dori ita mante oibo, ita to oilo tumrar shoriotor eḳṭa ain.
30 “Shakkir zobanbondir ufre nirbor ḳoria kunire zane marilaoa oibo. Oile ḳali eḳzon shakkir ḳotae ḳeurore marilaoa zaito nae.
31 Mout-u zar faona shaza, ila kunu kunire kunumonte-u ṭeḳar bodla ḳalas deoa zaito nae. Tare zane marilite-u oibo.
32 Ashroy ṭauno roura kunu ashamire ṭeḳar bodla, fordan imamor moutor age tar nizor baṛit firai ana zaito nae.
33 Mono rakio, ita ḳoria tumra nizor deshor maṭire nafak korio na. Zano to, kunor loue desh nafak oizae. Ar ze desho kunor lou zorse, hou kunir lou saṛa ar kunumonte-u hi deshor nafakir kofora oy na.
34 Ar tumra ze desho roibae ami-o to hono roimu, erlagi i deshre nafak banaio na. Ḳaron ami Mabud Boni Israilor maze boshot ḳori.”