34
Kenan deshor shimana ṭik kora
1 Mabude Musa nobire ḳoila,
2 “Tumi Boni Israilre amar ou hukum zanai deo, tumra gia Kenan desho hamanir bade hono ze zagar malikana faibae, i zagar shimana oilo,
3 Idum deshor boḍaror Zin morubumir kisu elaḳa tumrar deshor douknor shimana. Bade ou douknor shimana taki fubedi gia Luna shagoror hesh mata forzonto.
4 Erloge Akrabbim faṛor fot faroia hari Zin morubumit hamaia Kadesh-Bornear douknedi shimana zaibo. Gia oḳan taki Hazor-Ador oia Ozmun forzonto tumrar shimana.
5 Ar Ozmun taki guria Mishoror shimanar hukna ḳalor faredi Bumodio shagoro gia lagbo.
6 “Tumrar deshor foismor shimana oibo Bumodio shagor. Iṭa-u tumrar foismor ail.
7 “Tumrar utoror shimana oibo, Bumodio shagor taki Hur namor faṛ,
8 ou faṛ taki Hamato zaibar fot forzonto, Hamator fot taki tumrar shimana Zidad gau forzonto zaibo.
9 Ar Zidad taki Zifrun oia Hazor-Onono gia shesh oibo. Iṭa-u oibo tumrar utoror shimana.
10 “Deshor fubor shimana oilo, Hazor-Onon taki Shofam forzonto eḳṭa shimana ail ṭik korio.
11 Ou Shofamor shimana taki Oin gaur fubedi gia Ribla forzonto aia lambo, lamia Galil aoror soredi zaibo,
12 gia Zordan gangor faredi Luna shagoro aia shesh oibo. Ou shob oilo tumrar deshor sairo galar shimana ail.”
13 Ar Musae Boni Israilre hukum dila, “Mabudor hukum mafik tumra loṭari maro, maria tumrar noy ḳandan ar Manosha ḳandanor ordeḳ manshore ou deshor zomi-maṭi baṭia dia, tumrar doḳoldari kaim ḳoro.
14 Zano to, Ruben ḳandan, Sadu ḳandan ar Manosha ḳandanor ordeḳ manshe tarar zarzir gusṭi mafik zomi-zomar baṭ age-u failise.
15 Tara Ziriho elaḳar Zordan gangor fubor faro tarar baṭ age-u basia nisoingi.”
Noya shordar ṭik kora
16 Mabude Musare ḳoila,
17 “Ou deshor zomi-maṭire baṭia dite zera matobbori korba, erar nam oilo, imam Ali-Azor ar Nunor fua Iusa.
18 Zomi-zoma baṭibar ḳalo shaijjo ḳorar lagi fortek kandano taki eḳzon ḳori shordar nibae.
19 Ou shordar oila,
Ehuda ḳandanor Zifunnir fua Kalut,
20 Shimion ḳandanor Amihudor fua Shamuel,
21 Bin-Iamin ḳandanor Kislunor fua Ilidod,
22 Dan ḳandanor shordar Uzolir fua Bukki,
23 Iusufor fua Manosha ḳandanor shordar Ifador fua Hanniel,
24 Iusufor fua Afraim ḳandanor shordar Shiftonor fua Komuel,
25 Sobulon ḳandanor shordar Fornaḳor fua Ilizafon,
26 Isaḳor ḳandanor shordar Azanor fua Foltiel,
27 Ashir ḳandanor shordar Sholumir fua Ohihud,
28 Noftali kandanor shordar Amihudor fua Fodohel.”
29 Mabude ou shordar oḳolre zimmadari shomzaila, Kenan desho Boni Israilor zomi-zoma baṭia dibar lagi.