33
Boni Israilor soforor fot
1 Musa ar Harun nobir netagirie Boni Israil zati fouzi dol hazia, Mishor desh taki bar oia aoar bade nanan zagat dom loila.
2 Ar Mabudor hukume Musa nobie tarar dom loar zagaintor nam lekia toila. Ou zagain oilo,
3 bosoror foyla sandor fonro tarik, mani Azadi Idor bador din, tara Mishor deshor Ramashesh elaḳa taki roana oila. Mishoror hoḳol manshor sokur samnedi tara buk fulaia bar oia aila.
4 Ou shomoy Mishori oḳole tarar boṛo fuaintor lash dafon ḳorat asil. Mabude agor rait tarar hoḳol goror boṛo fuainre marilisla. Tain otar deb-debir ufre-o gozob ḍalia tarar faona shaza disla.
5 Boni Israile Ramashesh elaḳa saṛia Sukkoto aia tambu gaṛila.
6 Bade Sukkot taki morubumir ḳandat Etom namor zagat aia tambu gaṛila.
7 Ar Etom taki Baal-Zafonor samne Migdulor ḳandat Fama-Hirut namor zagat aia tambu gaṛila.
8 Bade Fama-Hirut taki doria faroia Etom morubumit gela, ou morubumi bae tin dinor fot faṛi dia Maruat gia tambu gaṛila.
9 Bade Marua taki Elimo gela, ino fanir barogu indara ar shottoirgu ḳezur gas asil.
10 Erbade Elim saṛia Nil doriar faro gia tambu gaṛila.
11 Hono taki Sin morubumit aia roila.
12 Ar Sin morubumi taki Dofka namor zagat gia kemp gaṛila.
13 Bade Dofka saṛia Alusho gia kemp gaṛila.
14 Alush taki Rofidimo gela, ino ḳaibar kunu fani asil na.
15 Teu Rofidim saṛia tara Sinai morubumit gia kemp gaṛila.
16 Erbade Sinai morubumi taki Kibrut-Hutaba.
17 Kibrut-Hutaba taki Hazirut.
18 Hazirut taki Ritma.
19 Ritma taki Rimmon-Perosh.
20 Oḳan taki Libna.
21 Libna taki Rissa.
22 Rissa taki Kohelata namor zagat tambu gaṛila.
23 Bade gela Shefor faṛo.
24 Oḳan taki Horada.
25 Horada taki Moḳelut.
26 On taki Tohot.
27 Bade Tareḳ.
28 Tareḳ taki Mitka.
29 Mitka taki Hoshmuna.
30 Bade Moserut.
31 On taki Boni-Iakan.
32 Bade Hur-Hoggidgod.
33 On taki Zotbata.
34 Zotbata taki Oboruna.
35 Bade Izion-Geber.
36 Ar oḳan taki Zin morubumir ḳandat Kadesh elaḳat gia tambu gaṛila.
37 Bade Kadesh saṛia Idum deshor shimanar gese Hur faṛo roila.
38 Boni Israil Mishor desh taki baroi aoar bade, sallish bosoror fas nombor sandor foyla din imam Harun Mabudor hukume Hur faṛor ufre uṭisla, ar hono tan ufat oilo.
39 Tain eḳ-sho teish bosor boyosho Hur faṛor ufre inteḳal ḳorla.
40 Ermaze Orad elaḳar Kenani bashshae ḳobor faila, Boni Israil ono aisoin. Tain to Kenan deshor Negeb morubumit roita.
41 Bade Boni Israile Hur faṛ saṛia Solmuna namor zagat gia tambu gaṛila.
42 Solmuna taki Punon gela.
43 Punon taki Obut gela.
44 Obut taki Muab deshor shimanat Iya-Abarimo gela.
45 Oḳan taki Diban-Sadu gela.
46 On taki Almun-Diblatimo gela.
47 Bade tara Abarim faṛo uṭia Nobo namor ṭillar ḳandat kemp gaṛila.
48 Erbade Abarim faṛ saṛia Ziriho ṭaunor ulṭabae Zordan gangor ḳandat Muab deshor tol zagat tambu gaṛila.
49 I kempor shimana asil Zordan gangor faro Muab elaḳar tol zaga Bayt-Zishimut taki Abel-Shiṭim ṭaun forzonto.
50 Ar ou shomoy Ziriho elaḳar Zordan gangor daro Muab deshor tol zagat Mabude Musa nobire ḳoila,
51 “Tumi Boni Israilre zanai deo, tumra zebla Zordan gang faroia Kenan desho gia azibae,
52 ou shomoy tumrar samon taki honor hoḳol manshore ḳedai dibae. Ḳedaia tarar fattor kudia banail hoḳol murti bangia surmar ḳorbae. Hunaror atiardi banail hoḳol deb-debir murti binash ḳorbae. Ar ṭillar ufror devtar namor foshur-boli kanain tulia falaibae.
53 Olaḳan tumra asta desh doḳol ḳoria hono boshot ḳorbae. Mono rakio, tumrar doḳoldarir lagi i deshḳan ami tumrare dan ḳorsi.
54 Hono loṭari maria tumrar nanan gusṭir zaga baṭia nio. Ze gusṭit beshi manush tarare beshi zaga, ar ḳom oile ḳom zaga dio. Loṭarit ze gusṭie ze zaga faiba, tara ono-u boshot ḳorba. Ḳandanor mazor nanan gusṭie zarzir ḳandanor elaḳar maze zaga faiba.
55 Oile tumra zudi honor bashinda oḳolre na ḳedao, te tarar zeguin roiba, iguin tumrar sokur ḳaṭa ar bukur sel bonia roiba. Itae tumrar boshoti zomino tumrare zulum-mosiboto falaiba.
56 Hou shomoy ami tumrare ola shaza dimu, ze shaza ḳali tarar lagi-u ṭik koria toislam.”