32
Zordan gangor fub faror zagar baṭ
1 Ruben ar Sadu ḳandanor manshor goru-sagolor boṛo boṛo fal asil. Tara deḳla, Zazira ar Giliod elaḳa foshu falibar lagi kub bala zaga.
2 Teu tara Musa nobi, imam Ali-Azor ar Boni Israilor fordan murobbi oḳolre ḳoila,
3-4 “Afnaintor i gulam oḳole to goru-sagol fali. Ar amrar Mabude Oṭarut, Diban, Zazira, Nimra, Hishbon, Iliali, Sebam, Nobo ar Biun namor zeta zaga Boni Israilor doḳolo anchoin, ita to foshu falibar lagi kub bala zaga.
5 Oḳon afne zudi amrare doya ḳoroin, te ou zaga ḳanain afnar i gulam oḳolre dilaukka. Amrare Zordan gangor hifaro nein na zanu.”
6 Musa nobie tarare zuaf dila, “Tumrar baiain zuddo ḳorat zaiba, ar tumra ono boi roibae ni?
7 Mabude Boni Israilre ze zaga ḳanain disoin, hino zaite tumra ḳene tarar monobol bangi dirae?
8 Huno, age zebla ou desh deḳar lagi tumrar baf-dadainre ami Kadesh-Bornea taki faṭaislam, hou shomoy tara-o ola ḳorsla.
9 Tara Boni Israilor lagi Mabudor dan ḳora desh deḳat gesil, gia Ashkulor faṛia ḳal forzonto deḳsil, dekia aia hou desho zaite erar monobol bangi disil.
10 Erlagi hou din gusae aguin oia Mabude ḳosom ḳaia ḳoisla,
11 ami Mabude ze desh dibar lagi Ibrahim, Isʼhak ar Iakubor gese ḳosom ḳaislam, Mishor taki bar oia aoa manshor maze bish bosor ba er beshi boyoshi kunu zone i desh deḳar shuzug faita nae, ḳenena tara amar ḳota furafur shullo-ana manche na.
12 Ḳali Konizi Zifunnir fua Kalut ar Nunor fut Iusae ou desh deḳar shuzug faiba. Tara to amar ḳotare shullo-ana manche.
13 Hou shomoy Mabude Boni Israilor ufre gusae aguin oigesla, erlagi tan nozoro naformani korra ota manshor binash na oa forzonto, sallish bosor dori morubumir nanan zagat itare sokkor deoaila.
14 “Ar hou gunagar oḳlor aolad oae, oḳon tumra-o zarzir baf-dadar ḳaislot faiso, erlagi Boni Israilor ufre Mabudor gusar aguinre aro baṛairae.
15 Oḳon tumra zudi tan hukum mafik na solo, te tain hirbar ota manshore morubumit falai toiba, tan i lannotor ḳaron oibae tumra-u.”
16 Ita hunia tara Musar daro biṛia ḳoila, “Sab, amra to ḳali foshur fal raḳar zaga banani ar amrar bou-baichchare toar lagi ono ṭaun oḳol bananir izazot saisi.
17 Oile Boni Israilre nizor zagat na fosani forzonto amra zuddor sifair laḳan tarar age age zaimu. Ermaze amrar bou-baichchain baunḍori kora ou ṭauno roile, ota deshor manshor at taki tara nirafode roiba.
18 Hokkol Boni Israilre zarzir zomi-mirash na shomzani forzonto amra nizor goro firia aitam nae.
19 Ar Zordan gangor hofaro Boni Israilor loge amra kunu zomi-zomar baṭo nitam nae, ḳenena amrar baṭ to gangor ou fubor faro-u miligese.”
20 Ikan hunia Musae ḳoila, “Aichcha, tumra zudi hasau ila ḳoro, Allare azir-nazir zania zuddor haze atiar loia zudi hono laṛait zao,
21 ar Allae zotoboil tan dushmon oḳolre tan samne taki kedaia na dein otoboil tumra zuddor haze tan lagi gang faroia hofaro zudi zao,
22 te hou desho Mabudor doḳoldari kaim oia harle tumra ono firot aitae farbae. Teu Mabud ar bad-baki Boni Israilor lagi tumrar ze day-dayitto asil, ita taki kalas oibae; ar Mabudor kushi mafik ou zomino tumrar malikana ḳaim oibo.
23 Oile tumra zudi ila na ḳoro, te tumra Mabudor gese gunagar bonbae. Mono rakio, tumrar fafe tumrare saṛto nae.
24 Oḳon tumrar bou-baichchar lagi ṭaun oḳol ar goru-sagol toar lagi zaga-o banaitae faro, oile tumra zeḳan oada ḳorso, ita furon ḳora lagbo.”
25 Teu Sadu ar Ruben ḳandanor manshe Musa nobire ḳoila, “Afne to amrar malik, afnar i gulam oḳolre afne zela hukum disoin, amra ola-u solmu.
26 Amrar bou-baichchain ar goru-sagolor fal onor Giliod elaḳar ṭaun oḳol-o roiba.
27 Oile amra amrar malikor hukum mafik zuddor shaz-shoronjam loia gang faroia Mabudor name laṛai korat zaimu.”
28 Teu Musae ota manshor befare imam Ali-Azor, Nunor fua Iusa, ar Boni Israilor baro ḳandanor nanan gusṭir murobbi oḳolre hukum dila.
29 Tain erare ḳoila, “Sadu ar Ruben ḳandanor hoḳol beṭain zudi hasau zuddor shaz-shoronjam loia Mabudor name laṛai korar niote tumrar loge Zordan gang faroia zain, te hou desh zebla tumrar doḳolo aibo, ou shomoy tumra Giliod elaḳare tarar malikanae shomzai dio.
30 Oile tara zudi ila na ḳoroin, te hou Kenan desho-u tumrar loge tarar baṭ niba.”
31 Ikan hunia Sadu ar Ruben ḳandanor manshe ḳoila, “Mabude tan i gulam oḳolre zela hukum disoin, amra ola-u ḳormu.
32 Amra Mabudor name zuddor shaz-shoronjam loia Zordan gang faroia Kenan desho zaimu, oile amrar zomi-zomar baṭ gangor ofaro roilo.”
33 Ikan hunia Musa nobi razi oila. Tain Sadu ar Ruben ḳandanre, erloge Iusufor fua Manosha ḳandanor ordeḳ manshore, ou zagain dila. Musae Amuri oḳlor bashsha Sihun ar Bashonor bashsha Uzor asta razottor hoḳol ṭaun ar gau-geram shoho shob zomi-mirash tarar lagi toila.
34 Teu Sadu ḳandanor manshe Diban, Oṭarut, Aruar,
35 Aṭrut-Shufan, Zazira, Zogbia,
36 Bayt-Nimra, Bayt-Haran namor gauain ar ṭaun oḳolre usa usa baunḍori oal gatia mozbut ḳorla. Erloge tarar goru-sagol toibar zaga-o banaila.
37 Ruben ḳandanor manshe Hishbon, Iliali, Kiriataim ṭaun,
38 ar Nobo, Baal-Miyun, Sibma namor gauain ṭik-ṭak korla. Ḳoria tara itar noya nam toila.
39 Manoshar fua Makiror aolad oḳole Giliodo gia age-u ita doḳol ḳorilisil, ar honor bashinda Amuri oḳolre ḳedai disil.
40 Erlagi Musae Manoshar ou aolad Makiri oḳlor baṭo Giliod elaḳare dilaila, tara ono boshot ḳorla.
41 Ermaze Manosha ḳandanor Zayir namor eḳzone gia Amuri oḳlor hoḳol gau-geram doḳol ḳorilisil, ar itar nam disil Habbut-Zayir.
42 Ar Nuba namor eḳzone gia Konat ar er ḳanda-ḳasar gau-geram oḳol doḳol ḳoria, tar nizor name i zagar nam dilo Nuba.