31
Madiani oḳlor loge zuddo
1 Mabude Musa nobire ḳoila,
2 “Madiani oḳole Boni Israilor loge zeta ḳorse, tumi otar oforador bodla deo. Erbade tumi tumar baf-dadar gese siroḳalor lagi huti roibae.”
3 Teu Musae Boni Israilre ḳoila, “Madiani oḳlor loge zuddo ḳorar lagi tumrar kisu sifaire zuit ḳoro, tara Mabudor torof taki Madiani oḳlor faona shaza diba.
4 Oḳon tumra Boni Israilor fortek kandan taki eḳ azar ḳori sifaire zuddot faṭao.”
5 Teu Boni Israilor baro ḳandan taki eḳo azar ḳori muṭ baro azar sifaire zuddor lagi zuit ḳora oilo.
6 Musae fortek kandan taki eḳ azar zon sifaire zuddot faṭaila. Erar loge imam Ali-Azoror fua Finohosh-o gela, zaite fobitro Kaba goror kisu samana loge ḳori nila ar tan ato ḳori zuddor aoazor sunga oḳol-o nila.
7 Musa nobire deoa Mabudor hukum mafik tara Madiani oḳlor loge zuddo ḳoria otar hoḳol beṭaintore marilila.
8 Shadaron manshor loge Madiani oḳlor fas zon bashshare-o tara marilila. Ou bashshain oila, Ibi, Reḳom, Shur, Hur ar Reba. Ar erar loge Balam bin Baur namor hou pirre-o tara zane marilila.
9 Tara Madian deshor hoḳol beṭin ar huruttainre bondi korla, tarar goru-sagol ar hokkol mal-samana luṭia anilla.
10 Madiani oḳol zoto ṭauno boshot ḳorta, ou ṭaun oḳol ar ṭaunor baror hoḳol tambu tara aguindi zalailila.
11 Zuddor bade tarar bondi kora hoḳol manush, gonimotor mal-samana, ar foshur fal loia roana oila.
12 Tara Musa nobi, imam Ali-Azor ar Boni Israilor kempo firar niote roana dila. Ou shomoy tarar tambu asil Ziriho elaḳar Zordan gangor daro Muab deshor tol zagat.
13 Tarar ḳobor faia Musa nobi, imam Ali-Azor ar Boni Israilor hoḳol murobbi kemp taki bar oia tarar loge deḳa ḳorat gela.
14 Gia zuddo taki firot aoa hoḳol kamanḍaror ufre mani azar sifair ar sho-sifair kamanḍar oḳlor ufre Musae kub gorom oia
15 ḳoila, “Tumra dushmonor hoḳol beṭintore zinda raḳlae ḳene?
16 Mono nai ni, oguinte Piyur faṛor ufre Balam piror foramishe, Boni Israilre Mabudor ges taki duroi horaisil, erlagi to Mabudor bonda oḳlor ufre gozobi bemar nazil oisil.
17 Te oḳon tumra otar hoḳol fuaintore zane marilao, biati ba oshoti hoḳol beṭintore-o marilao.
18 Ḳali abiati shoti fuṛintore tumrar lagi zita rakio.
19 “Ar tumra zera kunu manshore zane marso ba murdar lash soiso, tumra shatdin bora kempor bare roio. Ermaze tin nombor ar shat nombor din tumra nize ar bondi kori ana manshore-o fak-saf ḳorbae.
20 Tumrar hoḳol ḳafoṛ-sufoṛ, samṛar mal-samana, laḳṛi ar sagolor rumadi banail hokkol samanare-o fak-saf ḳorbae.”
21 Zeta sifai oḳol zuddot gesla, imam Ali-Azore tarare ḳoila, “Ita oilo Musa nobir ate deoa Mabudor shoriotor ekkan ain:
22 Tumra shuna, rufa, fitol, lua, ṭin, shishadi banail hoḳol mal-samana,
23 mani zeta mal agunit dile zole na, ita hoḳolta agunir maze dibae, teu ita fak-saf oibo. Oile zalanir bade itare fak-saf ḳorar fanidi doia pak-pakiza ḳora lagbo. Ar zeta aguine nosṭo oizae, itare ḳali fak-saf ḳorar fanidi doilibae.
24 Bade shat nombor din tumrar ḳafoṛ-sufoṛ doia harle, pak-pakiza bonia kempor bitre hamaibae.”
Gonimotor mal-samanar baṭ
25 Erbade Mabude Musare ḳoila,
26 “Tumi ar imam Ali-Azor ar shomazor murobbi oḳole milia, bondi kori ana hoḳol manush ar foshuintore gono.
27 Gonia hoḳol mal dui baṭ ḳoro. Itar eḳ baṭ dibae zuddot zeta sifai oḳol gesil tarare, ar dusra baṭ bad-baki manshore dio.
28 Ou sifai oḳlor baṭo zoto manush, goru-sagol foṛbo, itar forteḳ fas-shoṭa taki eḳṭare Mabudor lagi algai toio.
29 Algaia Mabudor faona ou baṭre tumi imam Ali-Azoror ato dibae.
30 Ar Boni Israilor baṭo zeta manush, goru-sagol faiba, itar forteḳ foinchashṭa taki eḳṭare alog kori toio. Toia Allar boshot ḳana, Baytulla tambur ḳadim Lebi oḳlor ato ita shomzaio.”
31 Mabude Musare zela hukum disla, tain ar imam Ali-Azore ola-u ḳorla.
32 Sifai oḳole zitia ana gonimotor mal-samana saṛa-o aro asil, soy laḳ fosottoir azar meṛa ar sagol,
33 baottoir azar goru,
34 eḳshoṭṭi azar gada
35 ar bottish azar abiati shoti fuṛin.
36 Teu zuddo ḳorra sifai oḳlor baṭo foṛlo, tin laḳ shaṛtish azar fas-shoṭa meṛa ar sagol,
37 ita taki Mabudor faona baṭo foṛlo, soy-sho fosottoirgu sagol-meṛa.
38 Ar goru asil soytish azar, ita taki Mabudor baṭo foṛlo baottoirṭa.
39 Ermaze gada asil tish azar fas-shoṭa, ita taki Mabudor baṭo foṛlo eḳshoṭṭigu.
40 Ar abiati shoti fuṛin asla shullo azar, ita taki Mabudor baṭo foṛlo bottishṭa.
41 Mabude Musa nobire zela hukum disla, tain Mabudor faona baṭ nia imam Ali-Azoror ato ola shomzai dila.
42 Ar Musae Boni Israilor bad-baki manshor lagi ze baṭ sifai oḳlor ges taki nisla,
43 i baṭo tin laḳ shaṛtish azar fas-shogu meṛa ar sagol,
44 soytish azar goru,
45 tish azar fas-shoṭa gada,
46 ar shullo azar abiati shoti fuṛin asla.
47 Bade Mabudor hukum mafik Musa nobie Boni Israilor faoa baṭor, forteḳ foinchash zon abiati fuṛin ar foshuin taki-o, egu ḳori fuṛi ar foshu nia Lebi kandanor manshore dila, zerar ufre Mabudor Kaba goror deḳa-hunar zimmadari asil.
48 Erbade sifai dolor azar sifair ar sho-sifair kamanḍar oḳol Musar gese aila,
49 aia ḳoila, “Afnar i gulam oḳole amrar zimmae taḳa sifai oḳolre gonilam. Gonia deḳlam, tara hoḳol fura asoin, zuddot ḳeu morse na.
50 Erlagi amra forteḳor baṭo zeta shunar bazu, bala, ator angṭi, ḳanor dul ar golar har faisi, amra ita hoḳolta loia aisi. Amrar zanor koforar kurbani hishabe ota Mabudor dorbaro dilaitam.”
51 Teu Musa ar imam Ali-Azore tarar ges taki shunar hoḳol goyna shomzia faila.
52 Tara azar sifair ar sho-sifair kamanḍar oḳlor ges taki Mabudor name deoa ze shunar goyna shomzia faila, itar uzon asil shullo azar shat-sho foinchash tola.
53-54 Musa nobi ar imam Ali-Azore azar sifai ar sho-sifair kamanḍar oḳlor ges taki ou shuna oḳol shomzia raḳla. Rakia Mabudor samne Boni Israilor iadgarir nishana hishabe ota shuna oḳol Kaba goror bitre toila.
Ita saṛa-o sifai oḳole gonimotor aro mal-samana zarzir gese raḳsila.