30
Mannot fura ḳorar niom
1 Bade Musa nobie Boni Israilor hoḳol ḳandanor murobbire ḳoila, “Mabude hukum disoin,
2 kunu beṭae zudi Mabudor name kunta mannot ḳore ba ḳosom ḳaia kunuta ḳorar oadae bondi oy, te he zanu tar oada bongo na ḳore. He zeta ḳoise, ita furon ḳora lagbo.
3 “Kunu abiati fuṛie zudi bafor baṛit taḳar ḳalo Mabudor name kunta mannot ḳore ba kunuta ḳorar oadae bondi oy,
4 ar bafe ita hunia-o fuṛire kunta na ḳoin, te i mannot ba oada tai furon ḳora lagbo.
5 Oile ikan hunar loge loge bafe zudi fuṛire ita ḳorte nished ḳoroin, te i mannot ba oada batil oizibo. Bafe nished ḳorae Mabude-o i mannot ba oada bangare maf ḳori diba.
6 “Ar kunu fuṛie zudi sinta-babna na ḳoria aḳta kunu mannot ba oada ḳorilae ar bade tair bia oizae,
7 biar bade zamaie ikan hunia loge loge kunta na ḳoin, te i mannot ba oadare tai furon ḳora lagbo.
8 Oile ita hunar loge loge zamaie zudi nished ḳoroin, te i mannot ba oadar bandon taki tai kalas faibo, Mabude-o ita maf ḳori diba.
9 “Ar kunu ṛaṛi beṭi ba talaḳ faoa kunu beṭie zudi mannot ḳoria oadae bondi oy, te ita furon ḳora lagbo-u.
10 “Zamair goror kunu boue zudi ola mannot mane ba ḳosom ḳaia oadae bondi oy,
11 bade tair zamaie ikan hunia kunta na matoin, taire nished na dein, te tai ita furon ḳora lagbo.
12 Oile zamaie hunia zudi loge loge nished dein, te i mannot ba oada batil oizibo. Tair zamaie nished ḳorae, Mabude-o ikan maf ḳori diba.
13 Boue ḳosom ḳaia oada ḳorle ba kunu mannot manle zamair eḳtiar ase ita mana ba batil ḳorar.
14 Oile zamaie zudi beshi din i befare kunta na matia nirai roin, te tar bour mannot ba oadar bandon fakka oizae. Hoḳolta hunar bade-o zamai ou shomoy nirai roae bour mannot ba oadare fakka banailae.
15 Oile hoḳolta hunar bade zamaie zudi hou dinor maze kunta na matia shomoy faronir bade nished ḳore, te boue ou mannot fura na ḳorae er dae-bar tair zamair ufre foṛbo.”
16 Zamai-bour befare, baf ar bafor baṛit roura fuṛir befare Mabude Musa nobire ola ain hikai dila.