36
Fuṛinte bafaiti zomin ṭikaia raḳa
1 Iusuf nobir aolador ḳandan oḳol taki, Manoshar nati Makiror fua Giliod gusṭir nanan foribar taki murobbi oḳol aila, aia tara Musa nobi ar Boni Israilor nanan gusṭir shordar oḳlor loge matila.
2 Ḳoila, “Mabude amrar i malikre hukum disla, loṭari maria Boni Israilor maze deshor zaga-zomin baṭia dita. Dibar shomoy amrar bai Zolafḳador zomi-zoma ḳanain tar fuṛintore dibar hukum disoin.
3 Oile Boni Israilor dusra kunu ḳandanor manshor loge zudi ou fuṛintor bia oy, te amrar baf-dadar samana taki tarar samana bar oia gia, tarar zamair ḳandanor zomi-zomat hamaizibo, ete amrar ḳandanor zomi-mirashor kisu ongsho ḳomizibo.
4 Boni Israilor zomi-mirash Firot Faoar hou fobitro foinchash bosoror ḳalo, tarar zomi-zoma gia to tarar zamair ḳandanor samana oizibo. Ou laḳan amrar baf-dadar zomi-mirash taki tarar ongsho bar oia zaibogi.”
5 Ikan hunia Mabudor hukum mafik Musae Boni Israilre ḳoila, “Iusufor aolador ou ḳandanor manshe zeta ḳoira, ita to hasa.
6 Erlagi Zolafḳador fuṛintor befare Mabude hukum dira, tara zare fosond ḳoroin tar gese-u bia boita farba. Oile shorto oilo, tarar bafor ḳandanor bitre bia boite oibo.
7 Boni Israilor zomi-mirash ek kandan taki arok kandano zaito farto nae. Boni Israilor forteḳ zone tar baf-dadar zomi-mirash basani lagbo.
8 Boni Israilor forteḳe zate tarar baf-dadar ges taki faoa zomi-zomar malikana ṭikai raḳto fare, otar lagi fortek kandanor zomi-zomar malikana faoa fuṛinte tarar bafor ḳandanor noshar gese bia boite oibo.
9 Ek kandan taki arok kandano kunu zomi-zoma zaito nae. Boni Israilor fortek kandane tarar zomi-zomar malikana doria raḳte oibo.”
10 Mabude Musare zela hukum disla, Zolafḳador fuṛinte ola manla.
11 Tarar bafor ḳandanor baiaintor gese bia boila. Zolafḳador fuṛintor nam oilo, Mohola, Tirza, Hogla, Milka, ar Nua.
12 Iusufor fua Manoshar ḳandanor gusṭi oḳlor maze-u tara bia boila.
13 Ar huno, Ziriho elaḳar Zordan gangor daro Muab deshor tol zagat, Mabude Musa nobir mazdi Boni Israilre ou hukum-ahkam ar niom-ḳanun oḳol disla.