27
Bafaiti zomino fuṛintor baṭ
1 Iusufor fua Manoshar ḳandanor Zolafḳador fuṛintor silsila oilo, Manoshar fua Makir, Makiror fua Giliod, Giliodor fua Hefor ar Heforor fuar nam Zolafḳad. Zolafḳador fuṛin oila Mohola, Nua, Hogla, Milka ar Tirza.
2 Ou fuṛin aia Milon-tambur duaror samne ubaia Musa nobi, imam Ali-Azor, murobbi neta ar hoḳol Boni Israilre ḳoila,
3 “Amrar baba to morubumit mara gesoin. Ar Kurahor dolor zeta manshe Mabudor birudde naformani korsla, tain to itar loge asla na. Tain ḳali tan nizor gunar dae mara gesoin. Ar amrar kunu bai zonmisoin na,
4 te bai na taḳae oḳon amrar bafor nam kita i bongsho taki miṭizito ni? Tan shoriḳanor loge amrare-o zaga-zominor baṭ deukka.”
5 Teu Musa nobie tarar befare Mabudor dorbaro aroz ḳorla.
6 Mabude tanre zuaf dila,
7 “Zolafḳador fuṛinte ṭik kota-u ḳoise. Tarar bafor shoriḳanor loge tarare-o zomi-zomar baṭ dite oibo. Tara zate tarar bafaiti zomin fain, ikan tumi kial rakio.
8 Ar tumi Boni Israilre ḳo, morar ḳalo zudi kunu manshe fuain na toia morizae, te tar zomi-zomar baṭ tar fuṛinte faiba.
9 Tar kunu fuṛin na taḳle tar baiainte i shompotti faiba.
10 Tar zudi kunu bai na taḳe, te ita tar sasainte faiba.
11 Ar tar zudi kunu sasa-o na taḳoin, te tar bongshor hoḳol taki afon zone i shompotti faiba, ein itar malik oiba. Musa nobire batail Mabudor ou hukum oilo, Boni Israilor lagi zomi-zomar ainor eḳ dara.”
Hozrot Musa (a:)or aḳeri bidae
12 Erbade Mabude Musare ḳoila, “Tumi Abarim faṛor ou usa ṭillar ufre uṭo, uṭia ami Boni Israilre ze desh disi, oḳan dekilao.
13 Ar huno, tumar bai Harun zela tar baf-dadar laḳan ḳoyboro huti roise, ou desh deḳar bade tumi-o ola tumar baf-dadar gese zaibaegi.
14 Mono ase ni, Zin morubumir Kadesh elaḳar Meriba namor zagar hou fanir ḳota? Morubumit Boni Israile zebla fanir lagi amar birudita ḳorsil, tarar samne tumra-o amare fak-fobitro ḳoia na mania amar hukumor ulṭa geslae.”
15 Oḳan hunia Musae aroz ḳorla,
16 “O Mabud, zein hoḳol manshor zindegi dan ḳoroin, hou Alla Mabude Boni Israilor ufre ola eḳzon manshore boail ḳoroukka,
17 ze netae hoḳol manshore gore-bare, maṭo-moydano hoḳol befare salaiba. Teu Mabudor bonda oḳol a-raḳali goru-sagolor laḳan oita nae.”
18 Teu Mabude zuaf dila, “Nunor fut Iusar bitre to Allai ruhu asoin. Tumi tare ania tar ufre tumar at toia ḳelafoti boḳshia deo.
19 Tumi imam Ali-Azor ar hoḳol Boni Israilor samne tare azir ḳoria, tarar samne-u tare dayitto shomzai deo.
20 Tumare ze ḳemota deoa oise, ou ḳemotar kisu baṭ tare deo, teu hokkol Boni Israil tar ḳotae solba.
21 Bade he imam Ali-Azoror gese zaibo, gele Ali-Azore Allar fobitro Urim ar Tummim fattordi loṭari maria Mabudor morzi zanta farba. Ola Iusa ar tamam Boni Israile sola-fira ḳorba.”
22 Musa nobie Mabudor hukum mafik kam ḳorla. Tain imam Ali-Azor ar Boni Israilor samne Iusare nia azir ḳorla.
23 Ar Mabudor hukum mafik tan ufre at toia tanre dayitto shomzaila.