26
Dusra bar adom shumari
1 Lannoti ou gozob tami zaoar bade Mabude Musa ar imam Harunor fua Ali-Azorre ḳoila,
2 “Boni Israilor maze zerar boyosh bish bosor ba er beshi, mani zuddo ḳorar zoiggo zera oigese, erare zarzir gusṭi mafik gono.”
3 Erlagi Ziriho ṭaunor ulṭabae Zordan gangor faro Muab deshor ze tol zaga ase, hono Musa nobie ar imam Ali-Azore neta oḳolre ḳoila,
4 “Mabude Musa nobire zela hukum ḳorsoin, oula tumra bish bosor ba er beshi boyoshi hoḳol beṭaintore gono.” Teu Mishor desh taki Boni Israilor zoto beṭain bar oia aisla, gonar shomoy erar bongshodoror nam leḳa oilo. Era oila:
5 Iakub urfe Israilor boṛo fua Rubenor sairo fuar bongshodor: Rubenor boṛo fua Honuk taki Honuki bongsho, Falu taki Falui bongsho,
6 Hasir taki Hasiri bongsho, ar Kormi taki Kormia bongsho.
7 Era hoḳol-u Ruben ḳandanor nanan bongsho. Erar maz taki gonia tetallish azar shat-sho tish zonre faoa gelo.
8 Falur fuar nam Iliab,
9 Iliabor fuain oila Nomuel, Daton ar Abiram. Daton ar Abiram Boni Israilor duizon neta asla, tara Musa ar Harunor bifokke lagla. Ar Kurahor dol zebla Mabudor birudde asil, ou shomoy era-o Kurahor dolo asla.
10 Kurahor loge ou duizonre-o maṭie a ḳori gililisil ar tar dolor aṛai-sho zon aguine zolia morsil. Ita Boni Israilor lagi hushiarir nishana oia roilo.
11 Oile Kurahor fuain hi shomoy morsoin na, tarar bongsho zari roise.
12 Iakubor fua Shimionor bongshodor oila, Nomuel taki Nomueli bongsho, Zamin taki Zamini bongsho, Zakin taki Zakini bongsho,
13 Zarah taki Zarahi bongsho ar Shoul taki Shouli bongsho.
14 Ita Shimion ḳandanor nanan bongsho. Erar maz taki gonia baish azar dui-sho zon faoa gelo.
15 Iakubor fua Sadur bongshodor oila, Sifon taki Sifoni bongsho, Hogi taki Hogia bongsho, Shuni taki Shunia bongsho,
16 Ozni taki Oznia bongsho, Eiri taki Eiria bongsho,
17 Orud taki Orudi bongsho, ar Oreli taki Orelia bongsho.
18 Era oila Sadu ḳandanor nanan bongsho. Erar maze gona manush oila sallish azar fas-sho zon.
19 Iakubor fua Ehudar dui fuar nam asil Eir ar Onon, Kenan desho taḳar ḳalo era mara gesil.
20 Oile Ehudar aro fuain asla, erar bongshodor oila, Shela taki Shelayi bongsho, Firuz taki Firuzi, Zarah taki Zarahi bongsho.
21 Firuzor bongshodor oila Hasir taki Hasiri bongsho ar Hamul taki Hamuli bongsho.
22 Era hoḳol-u Ehuda ḳandanor nanan bongsho. Erar maz taki gonia siottoir azar fas-sho zonre faoa gelo.
23 Iakubor fua Isaḳoror bongshodor oila, Tola taki Tolayi bongsho, Foa taki Foai bongsho,
24 Zashub taki Zashubi bongsho ar Shimron taki Shimroni bongsho.
25 Era hoḳol Isaḳor ḳandanor nanan bongsho. Erar maz taki gonia soushoṭṭi azar tin-sho zonre faoa gelo.
26 Iakubor fua Sobulonor bongshodor oila Sered taki Seredi bongsho, Elon taki Eloni bongsho ar Zoholel taki Zoholeli bongsho.
27 Era hoḳol Sobulon ḳandanor nanan bongsho. Erar maz taki shaiṭ azar fas-sho zonre faoa gelo.
28 Iakubor fua Iusufor fuain oila Manosha ar Afraim.
29 Erar maze, Manoshar bongshodor oila, Makir taki Makiri bongsho, ar Makiror fua Giliod taki Giliodi bongsho.
30 Giliodor bongshodor oila Iazir taki Iaziri bongsho, Helok taki Heloki bongsho,
31 Osriel taki Osrieli bongsho, Sheḳom taki Sheḳomi bongsho,
32 Shimida taki Shimidayi bongsho ar Hefor taki Hefori bongsho.
33 Heforor fua Zolafḳad, tar kunu fuain asla na, ḳali fuṛin asla. Fuṛintor nam oilo, Mohola, Nua, Hogla, Milka ar Tirza.
34 Era hoḳol-u Manosha ḳandanor nanan bongsho. Erar maz taki gonia bayanno azar shat-sho zonre faoa gelo.
35 Iakubor fua Afraimor bongshodor oila, Shutoloh taki Shutolohi, Beḳor taki Beḳori ar Tohon taki Tohoni bongsho.
36 Shutolohor bongsho, Eron taki Eroni bongsho.
37 Era hoḳol Afraim ḳandanor nanan bongsho. Erar maz taki gonia bottish azar fas-sho zonre faoa gelo. Ḳandan hishabe era hoḳol-u Iusufor bongshodor.
38 Iakubor fua Bin-Iaminor bongshodor oila, Bela taki Belayi bongsho, Oshbel taki Oshbeli bongsho, Ahiram taki Ahirami bongsho,
39 Shufom taki Shufomi bongsho, ar Hufom taki Hufomi bongsho.
40 Belar fuain Ord ar Namanor mazdi Belar bongshodor oila, Ord taki Ordi bongsho ar Naman taki Namani bongsho.
41 Era Bin-Iamin ḳandanor nanan bongsho. Erar maz taki foytallish azar soy-sho zonre faoa gelo.
42 Iakubor fua Danor bongshodor oila, Shuhom taki Shuhomi bongsho. Era-u asla Dan ḳandanor manush.
43 Erar maz taki gonia soushoṭṭi azar sair-sho zonre faoa gelo.
44 Iakubor fua Ashiror bongshodor oila, Imna taki Imnayi bongsho, Zisbi taki Zisbia bongsho ar Boria taki Boriayi bongsho.
45 Boriar bongshodor oila Hebor taki Hebori bongsho, ar Molkiel taki Molkieli bongsho.
46 Ashiror fuṛir nam asil Sera.
47 Era hoḳol-u Ashir ḳandanor nanan bongsho. Erar maz taki gonia teppanno azar sair-sho zonre faoa gelo.
48 Iakubor fua Noftalir bongshodor oila, Zohoshiel taki Zohoshieli bongsho, Guni taki Gunia bongsho,
49 Izer taki Izeri bongsho, ar Shillem taki Shillemi bongsho.
50 Era hoḳol-u Noftali kandanor nanan bongsho. Erar maz taki gonia foytallish azar sair-sho zonre faoa gelo.
51 Te gonar bade Boni Israilor maze zuddot zaoar zuka beṭaintor foriman oilo, muṭ soy laḳ eḳ azar shat-sho tish zon.
52 Mabude Musare ḳoila,
53 “Gona ou manush mafik asta deshor zomin baṭia dite oibo, zate hoḳole zarzir baṭ fae.
54 Ze ḳandanor manush beshi ou ḳandanre beshi ar ze ḳandanor manush ḳom, ou ḳandanre ḳom zaga dibae. Fortek kandanor manshe tar manush hishabe zaga-zomin faibo.
55 Ar kun ḳandane kun zagat zomin faibo, ita loṭari maria ṭik kora oibo. Forteḳ bongshor faona ongsho tar ḳandanor name deoa elaḳar maze-u taḳbo.
56 Ḳandanor manush ḳom ba beshi zeṭa-u ouk, loṭari maria zaga ṭik kora oibo.”
57 Hoḳol heshe Lebi kandanor bongshodor gona oilo. Era oila, Zarsun taki Zarsuni gusṭi, Kahat taki Kahati gusṭi ar Marari taki Mararia gusṭi.
58 Lebi kandanor kisu namḳora foribar asil, erar mul bafor nam oilo Libni, Hebron, Moholi, Mushi ar Kurah.
Kahator eḳ fuar nam asil Imran.
59 Imranor bour nam Iukabez, Mishor desho taḳte Lebi kandanor maze en zonom oisil. En feṭ taki Imranor fuain Harun ar Musa ar tarar boin Moriomor zonom oisil.
60 Harunor fuain oila Nadab, Abihu, Ali-Azor ar Isamar.
61 Oile Mabudor hukum bangia dusra aguin dia ebadot ḳorat gia Nadab ar Abihu ou dui zonor moron oisil.
62 Eḳ mash ba er beshi boyoshor Lebi kandanor beṭaintor foriman asil teish azar. Boni Israilor bitre erare kunu zagar malikana deoa oise na gotike Boni Israilor oinnainno ḳandanor loge erare eḳloge gona-o oise na.
63 Ziriho ṭaunor ulṭabae Zordan gangor daro Muabor tol zagat dusrabar manush gonar shomoy Musa nobi ar imam Ali-Azore Boni Israilre gonla.
64 Oile foyla bar Sinai morubumit Musa ar imam Harune Boni Israilor zarare gonisla, ou dusrabar gonar shomoy erar mazor eḳzon-o zinda roisoin na.
65 Ashole ota Boni Israilor befare Mabude age-u ḳoisla, tara nichchoy ou morubumit mara zaiba. Ar hasau ḳali Zifunnir fua Kalut ar Nunor fua Iusa saṛa tarar mazor dusra ḳeu zinda roisil na.