25
Boni Israile zina ar murtipuja ḳorla
1 Boni Israil Muab deshor Shiṭim elaḳat boshot ḳorla, tara ono roia roia Muabi beṭintor loge zina ḳorat lagla.
2 Honor beṭinte tarar deb-debir name boli dibar onusṭano Boni Israilre daot dila, ar era gia ota beṭintor loge ḳana-dana ḳaia hou deb-debir puja ḳorla.
3 Ou nomunae tara honor Piyur faṛor Baal devtar puja-boḳti deoat lagi gela. Erdae Boni Israilor ufre Mabudor gozobor aguin zolia uṭlo.
4 Bade Mabude Musare ḳoila, “Tumi shomazor dushi neta oḳolre doria zane marilao, ar otar lash roidor maze ania loṭḳai to. Teu Boni Israilor ufre taki amar hou lannoti gozob horbo.”
5 Oḳan hunia Musae Boni Israilor hakim-salish oḳolre ḳoila, “Tumrar zimmae taḳa zoto manshe Piyur faṛor Baal devtar pujat shorik oise, ota hokkolṭire tumra zane marilao.”
6 Ermaze ola oilo, Musa nobi ar Boni Israile milia zebla Allar goror duaror gese ḳanda-ḳaṭi korra, ou shomoy tarar samnedi Boni Israilor eḳ beṭae Madiani eḳ beṭire loge loia kempor bitre hamailo.
7 Ita dekia imam Harunor nati Finohosh bin Ali-Azor mozlis taki uṭia ekkan sulfi ato loila.
8 Loia tarar ḳore ḳore gia Boni Israilor hou beṭar tambut hamaia tar ar hou beṭir feṭedi gatilla. Teu Boni Israilor ufor taki Allar gozob horigelo.
9 Oile ou gozobor maze sobbish azar manush morigesil.
10 Ou shomoy Mabude Musare ḳoila,
11 “Imam Harunor nati Finohosh bin Ali-Azor Boni Israilor ufre taki amar gozob horaise. Boni Israilor maze amar faona ijjot adae ḳorar befare he to amar zalae-u zoler. Erlagi amar faona ijjot adae ḳorar lagi monor zala taḳle-o ami tarare ar marlam na.
12 Te oḳon tumi tare ḳo, ami tar lagi eḳṭa ḳas shanti-chukti boail ḳorsi.
13 He tar Allar faona ijjotor befare kiali oia nizor ichchae Boni Israilor gunar kofora adae ḳorae, ami-o tar lagi ou shanti-chukti boail ḳorsi. Erlagi imamotir fod he ar tar aolador maze siroḳal zari roibo.”
14 Madiani hou beṭir loge Boni Israilor ze beṭare mara oisil, he oilo Salur fua Zimri, he to Shimion ḳandanor ek gusṭir neta.
15 Ar ze Madiani beṭire mara oisil, tair nam Kosbi, tai asil Madian deshor Shur namor eḳ netar fuṛi, ou Shur-o oila ek gusṭir neta.
16 Erbade Mabude Musare ḳoila,
17 “Madiani oḳolre tumrar dushmon mono ḳorio, itare zane marilio.
18 Ḳaron Piyuror devtar puja ar Kosbir befare fand fataia tumrare bul fote neoae tara tumrar dushmon bonche. Ar tumi to zano, ou Kosbi asil tarar kuṭum, tai to Madiani eḳ shordaror fuṛi. Piyuror Baal devtare puja ḳorae tumrar ufre zebla lannoti gozob lamsil, ou shomoy taire zane mara oisil.”