24
1 Balam pire zebla buzla, Boni Israilre dua deoa-u oilo Mabudor ichcha, buzia tain agor laḳan ar isteḳara-azirator sesṭa ḳorla na. Borong tan nizor muk morubumir bae firailla.
2 Firaia deḳla, Boni Israilor nanan ḳandanor tambu eḳ ek kori ṭangani oise. Ou shomoy tan ufre Allar ruhu lamia aila,
3 tain Allar deoa ou ohi koila,
“Bauror fut Balame ḳoira,
Souk zar kula ase ein ou buli koira.
4 Ze zone Allar kalam hunra,
Shorbo-shoktimanor didar faira,
zein soizdat foṛia batuni kobor deḳoin,
ein oḳan ḳoira.
5 O Iakub bongsho, tumar tambu oḳol kub soḳsoḳa!
O Boni Israil, tumar roar zaga ḳoto bala!
6 Ita to deḳar moto boṛo ḳezur baganor laḳan,
gangor faror hazail-faṛail bonor laḳan,
Mabudor lagail agoror gasor laḳan tortaza,
fanir daror debdaru gasor laḳan shundor.
7 Tarar bora ḳoloshi taki fani utlia foṛbo,
bisi ar serae bout fani faibo.
Tarar bashsha oiba Ogag bashsha taki-o himmoti,
tarar desh oibo namḳora ijjoti.
8 Allae Mishor taki tarare bar ḳori anchoin,
tain oila tarar fokke bolala zongli boyra,
tarar loge zoto zatie lagba,
itare tara gilia ḳailiba,
tarar aḍḍi-guḍḍire guṛa guṛa ḳorba,
tir-donukdi tarare gatiba.
9 Shinghor laḳan tara ḳaf dori hutibo,
tarare laṛanir shaosh oibo kun beṭar?
Tumrare zera dua diba,
erar ufre dua lamouk;
tumrare zetae lannot diba,
itar ufre lannot foṛouk.”
10 Ita hunia bashsha Balake Balam piror ufre gusae aguin oigela. Tan nizor ator fiṭit tabṛai tabṛai kiṛimiṛi kaia ḳoila, “Ami afnare anaitam amar dushmonre lannot dibar lagi, ar afne tarare ou lagaia tin-tinbar dua dila.
11 Afne amar samon taki horoukka, nizor zagat zaukka. Ami afnare bout furuskar dimu ḳoislam, oile Mabude dila na.”
12 Teu Balam pire bashsha Balakre ḳoila, “Afnar faṭail manshore ami age-u ḳoisi na ni,
13 bashshae zudi shuna-rufae bora tan asta razbaṛi kan-u amare dilain, tebou ami amar nizor ichchae bala-bura kunta ḳortam fartam nae, ami Mabudor birudde zaitam nae. Mabude amare zela hukum diba, ami kali ola-u ḳoimu.
14 Te ami oḳon amar manshor gese firot zairamgi, oile ou zatie bobishote afnar zatir loge kita kita ḳorba, afnar hushiarir lagi ita agam zanai diar.”
Balam piror muko Allar souta ohi
15 Balam pire Allar deoa ou aroḳ ohi koila,
“Bauror fut Balame ḳoira,
Souk zar kula ase ein ou buli koira,
16 ze zone Allar kalam hunra,
zeinor gese Allatalar aḳol-hekmot ase,
zein shorbo-shoktimanor didar faira,
zein soizdat foṛia batuni kobor deḳoin,
ein oḳan ḳoira.
17 Ami to hou zonre dekiar,
oḳon samne na taḳle-o dekiar.
Tain amar ḳasat na oile-o,
amar souk gia tan ufre foṛse.
Iakubor bongshot aiba asmanor eḳ tera,
Boni Israilor maze-u eḳ raz-laṭi zonmiba.
Ein Muab zatir mata faṭaia dui ṭukra ḳorba,
Shish nobir aolador ḳolla surmar ḳorba.
18 Idum deshre enor doḳolo anba,
tan dushmonor ou Seir faṛre ḳobza ḳorba,
ar Boni Israil zatie foyluani korba.
19 Iakubor bongshor eḳzone raz-godi salaiba,
Ir ṭauno zara zinda roiba ein tarare-o binash ḳoriliba.”
20 Oḳnain ḳoar bade Balam pire souk melia Amaleki oḳolre deḳla. Dekia Allar ou ohi koila,
“Amalek to hoḳol zatir maze asil fordan,
oile tarar shesh dosha oibo shorbonash.”
21 Bade tain Keni oḳolre deḳla, dekia Allar ou ohi koila,
“Tumrar boshot ḳana kub mozbut,
tumra to fattoror faṛo basha banaiso,
22 oile agedi tumrar binash goṭibo,
tumrare bandia Ashiria desho neoa oibo.”
23 Bade Balam pire Allar deoa ou shesh ohi koila,
“Haere hae! Allae zebla ota goṭaiba,
ou shomoy ḳeu ar zinda roibo ni?
24 Saipras difor zaz oḳol aibo,
aia Ashiriare durdosha dibo,
Aberor manshore-o domaibo,
oile ou dif nize-o bade binash oizibo.”
25 Oḳan ḳoia hari Balam pir uṭia nizor goro gelagi, Balak bashsha-o tan fote roana dila.