23
Balam piror muko Allar foyla ohi
1 Ar ou bianku bala Balam pire Balak bashshare ḳoila, “Afne amar lagi shatḳan kurbani kana banaukka, banaia kurbanir lagi shatgu bisal ar shatgu meṛa zugai deukka.”
2 Balamor ḳotamoto-u Balake ola ḳorla, ḳoria duiozone milia fortek kurbani kanar ufre egu ḳori bisal ar egu ḳori meṛa kurbani dila.
3 Erbade Balam pire Balakre ḳoila, “Afnar kurbani deoa ou foshur ḳasat afne roukka. Ami tuṛa horia zairam, oito fare Mabude amare doroshon diba. Tain amare zeta zanaiba, ami aia afnare ḳoimune.” Oḳan ḳoia Balam pir gia faṛor hoḳol taki usa ṭillar ufre uṭila.
4 Ou shomoy Mabude tanre doroshon dila. Balam pire Mabudre ḳoila, “O Mabud, tumi to deḳrae, ami shatḳan kurbani kana banaisi ar fortek kurbani kanar ufre egu ḳori bisal ar egu ḳori meṛa kurbani disi.”
5 Teu Mabude Balam pirre eḳ buli hikai dila, dia ḳoila, “Tumi gia Balak bashshare ota ḳoio.”
6 Teu Balam pire Muab deshor bashsha Balakor gese firia aia deḳla, bashsha Balake Muab deshor hoḳol murobbi netare loia tan kurbani kora foshur ono ubai roisoin.
7 Ou shomoy Balam pire Allar hikaia deoa ou buli hoḳol hunaila, ḳoila,
“Siria desh taki Balake amare anaisoin,
fubor faṛ oḳlor daro taki
Muabor bashsha Balake-u more zugaisoin.
Zugaia ḳoila, amar fokko loia
Iakubor aolad Boni Israilre lannot deukka,
otare boddua deukka.
8 Oile Allae lannot disoin na zare,
ami kilan dimu lannot tare?
Mabude ḳeti korar ḳota na ḳorsoin zar,
ami kilan ḳetir ḳota ḳoitam tar?
9 Deḳsi ami tarare usa ṭilla taki,
tarar baedi saisi to faṛor suṛa taki,
deḳlam ami era oila ola eḳ zati,
tara roin alog oia baki hoḳol taki.
10 Iakubor aolad deki balur danar moto,
gonia fuṛaito tare ḳar ase shaiddo?
Moron zanu oy amar nekkar ou dolor laḳan
aḳerato ouk mor tarar-u laḳan.”
11 Ikan hunia bashsha Balake Balamre ḳoila, “Afne ita kita ḳorla? Afnare anaitam amar dushmonre lannot dibar lagi, ar afne ḳali tarare dua dila.”
12 Balam pire zuaf dila, “Mabude amar muko zeta zugai disoin, ita ami koimu na kila?”
Balam piror muko Allar dusra ohi
13 Bade bashsha Balake Balam pirre ḳoila, “Afne amar loge aroḳ zagat aukka. Hon tone afnar souke Boni Israilor deḳa faiba. Tara hoḳolre deḳa zaito nae, ḳali eḳ ongshore afne deḳba, dekia afne amar fokko loia tarare lannot diba.”
14 Oḳan ḳoia bashsha Balake tanre loia Pisga faṛor ufror Zofim namor bondor maze loia gela. Gia hono shatḳan kurbani kana banaia fortek kurbani kanat egu ḳori bisal ar egu ḳori meṛa kurbani dila.
15 Bade Balam pire bashsha Balakre ḳoila, “Zalail kurbanir niote zeta foshu kurbani deoa oise, afne otar daro roukka. Ami oinnobae zairam, Mabudor didar faoar ashae.”
16 Mabude Balam pirre didar dila, ar tar zobanor maze kisu buli zugai dia ḳoila, “Tumi bashsha Balakor gese amar hikail ou mat matio.”
17 Teu tain bashshar gese gela. Gia deḳla bashshae Muab deshor neta oḳolre loia kurbani kora foshur gese ubai roisoin. Bashshae tanre zikaila, “Mabude afnare kita ḳoisoin?”
18 Balam pire ou shomoy Allar hikail ou buli koila,
“Bashsha Balak kial ḳoro, oḳon huno dia mon,
ere Shiparor fut Balak, mor ḳotat deo ḳan.
19 Alla Pak to manush nae zen misa matiba,
tain kunu Adom shontan nae zen dil bodlaiba.
Tain zela ḳota ḳoin ṭik ola-u ḳoroin,
tan oada oḳol-u nichchit fura ḳoroin.
20 Nek dua ditam ḳori hukum zela faisi,
kila bodlaimu ami munibor ou morzi?
21 Iakubor aolador maze
Allae kunu bod-nosib deḳsoin na,
Boni Israilor ḳofalo
kunu duḳ-mosibot leḳsoin na.
Tarar Mabud Alla tarar loge asoin
tarar malikor joy gan tarar loge loge ase.
22 Mishor taki tain-u tarare bar ḳori anchoin
tarar fokke tain oila zongli boyrar bol.
23 Iakubor aolador ufre kunu zadu-montro solto nae,
Israil zatir ufre kunu tabiz-ḳobze ḳam aito nae.
Tarar befare oḳon ou buli koa zae,
Allae zeta ḳorsoin ota saia deḳo.
24 Ou zati to shinghir laḳan gunjria uṭibo,
ar shinghor laḳan uṭia ag baṛibo.
Shikaror lou ar gust na ḳaoa forzonto
tara dom loita nae.”
25 Ikan hunia bashsha Balake ḳoila, “Bond ḳoroukka, afne tarare dua-o diba na, lannot-o diba na.”
26 Balam pire zuaf dila, “Ami to afnare age-u ḳoisi, Mabude amare zela ḳoiba, amar ola-u ḳora lagbo.”
Balam piror muko Allar tisra ohi
27 Bade Balak bashshae Balam pirre ḳoila, “Aukka, ami afnare aroḳ zagat loia zaimu. Hono gele oito fare Allae kushi oia amar fokko loiba, ar afnaredi hotar ufre lannot dite diba.”
28 Oḳan ḳoia bashshae tanre loia Piyur namor faṛor ufre gela, ou zaga taki morubumi deḳa zae.
29 Ou shomoy Balam pire ḳoila, “Ono amar lagi shatḳan kurbani kana banaia, shatgu bisal ar shatgu meṛa kurbanir bebosta ḳoroukka.”
30 Pir sabor ḳotamoto bashshae ola-u ḳorla. Tain fortek kurbani kanar ufre egu ḳori bisal ar egu ḳori meṛa kurbani dila.