15
Nanan sodga-kurbanir niom
1 Mabude Musare ḳoila,
2 “Tumi Boni Israilre zanai deo, ami ze deshḳanre tumrar nizor desh hishabe dan ḳorram, tumra zebla hou Kenan desho zaibae,
3 gia amare kush raḳar niote agunit deoa geran ala zekunu kurbani hishabe tumrar fal taki zebla gai-goru ba meṛa-sagol ania amar name dibar niot ḳorbae, ar zalail kurbani, kunu mannot furonor kurbani, hoḳol nomunar nofol kurbani, ba zekunu idor kurbani dile,
4 kurbanir forteḳ foshur loge dan-gomor sodga-o dibae. Ou sodgar lagi dui sher moydare eḳ sher teldi maḳaia ḳai banaia anbae.
5 Oile kurbanir foshuṭa zudi meṛa-baichcha oy, te iṭar loge shorbot-fanir sodga hishabe anguror eḳ sher shorbot-o dibae.
6 Ar ou foshu zudi meṛa oy, te tar loge dan-gomor sodga hishabe shua sher teldi maḳaia sair sher moyda dibae.
7 Shorbot-fanir sodgar lagi lagbo anguror shua sher shorbot. Ita ania amare kush ḳorar geran ala kurbani hishabe dite oibo.
8 Tumra zudi zalail kurbani, mannot furonor kurbani ba salamoti kurbanir lagi kunu goru loia ao,
9 te erloge dan-gomor sodga hishabe soy sher moydare dui sher teldi maḳaia ḳai ante oibo.
10 Ar shorbot-fanir sodgar lagi anguror dui sher shorbot-o ante oibo.
“Ita oilo agunit deoa kurbani, i kurbanir dumar gerane ami kushi oi.
11 Kurbanir fortek goru, meṛa, meṛa-baichcha ba sagolre ou niome kurbani dibae.
12 Tumra zoto foriman foshu-u kurbani deo na ḳene, forteḳ foshur loge ou niome sodga-o dibae.
13 “Huno, ami Mabudre kush ḳorar niote, zekunu geran ala agunit deoa kurbani adae ḳorar shomoy, forteḳ Boni Israile ou niome kurbani dibae.
14 Oinno zatir kunu musafir ba tumrar loge boshot ḳorra kunu bin-deshie zudi, amare kush ḳorar niote agunit deoa geran ala kurbani dito sae, te he-o tumrar laḳan eḳoi niom mante oibo.
15 Oarishor for oarish dori ou niom zari roibo. Tumrar shomazor hoḳlor lagi ou niom salu roibo, ita tumra o ba tumrar loge boshot ḳorra bin-deshi oile-o, hoḳlor lagi-u oarishor for oarish dori ou eḳoi niom zari roibo. I befare ami Mabudor gese tumra zela, bin-deshi oḳol-o oula, hoḳol homan.
16 Tumrar lagi ar tumrar maze boshot ḳorra bin-deshi oḳlor lagi eḳlaḳan hukum-ahkam ar eḳoi shoriot salu roibo.”
17 Erbade Mabude Musare ḳoila,
18 “Tumi Boni Israilre zanao, ami Mabude tumrare ze desho niar, hono gia harle,
19 tumra zebla hou deshor foy-foshol ḳaibae, ou shomoy tumra itar kisu ongsho amar dorbaro sodga hishabe dibae.
20 Tumrar ḳetor foyla daoa fosholor moyda dia ekkan ruṭi banaia amar name sodga dibae. Girost-baṛir sodgar laḳan dibae.
21 Foyla daoa fosholor ou sodga, oarishor for oarish dori lilla-sodga hishabe tumra amar name dibae.
Bule kunu hukum bangile
22 “O Musa, tumi Boni Israilre ḳo, ami Mabude tumar mazdi zoto hukum-ahkam disi, tara zudi na zania ota kunu eḳṭa hukum bangilae,
23 ita hoḳol hukum to deoar shomoy taki oarishor for oarish dori zari roy,
24 te i ozana befarṭa zanar bade-u asta Boni Israil shomaze milia kurbani dite oibo. Tara eḳṭa bisal dia ami Mabudre kush ḳorar niote geran ala zalail kurbani dibo, erloge niom mafik dan-gomor sodga ar shorbot-fanir sodga dibo. Ar gunar koforar lagi egu sagol-o kurbani dibo.
25 Imam sabe asta Boni Israil shomazor ou ozana gunar kofora adae ḳorba, teu tara mafi faiba. Tara to ichcha ḳoria i naformani korse na, tarar bulor lagi Mabudor name agunit deoa kurbani ar gunar koforar kurbani-o adae ḳorse.
26 Teu asta Boni Israil shomaz ar tarar maze boshot ḳorra bin-deshi manshore-o maf ḳora oibo, zudio tara hoḳole-u i bul-ḳosuri korse.
27 “Oile ḳeu zudi kali eḳla bul ḳoria monor ozante kunu naformani korilae, te gunar koforar kurbanir lagi he eḳ bosor boyoshi eḳṭa sagi loia azir oite oibo.
28 Ar ze zone monor ozante ou guna ḳorse, imam sabe Mabudor dorbaro tar gunar koforar bebosta ḳorba. Ou kurbani kobul oile he mafi faibo.
29 Bul ḳoria monor ozante ze manshe naformani korilae, ou laḳan forteḳ manshor lagi i niom salu roibo, he Boni Israil ouk, ba bin-deshi ouk, eḳoi niome solbo.
30 “Oile Boni Israil ba tarar maze boshot ḳorra oinno kunu zatir ḳeu zudi ichcha ḳoria kunu naformani kore, te he shoyong Mabudre beijjot ḳore. Ila naformanir lagi shomaz taki ogur nam miṭailite oibo.
31 Mabudor hukumre elami korae ar naformani korae ogur nam miṭailite oibo, tar i gunar dae-bar tar ufre-u bortaibo.”
Zummabar na manar shaza
32 Boni Israil morubumit soforor ḳalo eḳ Zummabare eḳzon manshore daru tubanit deḳla.
33 Zummabare daru tubanit deḳae ou manshe tare doria Musa nobi, imam Harun ar hoḳol Boni Israilor samne loia aila.
34 Ou laḳan manshore kita ḳorte oibo, i hukum to Allae oḳono zanaisoin na, erlagi ere tara bondi kori toilo.
35 Ou shomoy Mabude Musare zanaila, “Ou manshore zane marilite oibo. Tare kempor bare nia hoḳol Boni Israile fattordi iṭaia marilibae.”
36 Teu Musar marfote faoa Mabudor hukum mafik, Boni Israile tare kempor bare nia fattor maria marilla.
Ḳafoṛor kunar zazoir
37 Erbade Mabude Musare ḳoila,
38 “Tumi Boni Israilre ḳo, tumra zarzir lebasor faiṛo zazoir lagao, ar zazoiror fortek giṭre lilua sutadi fesaia mul ḳafoṛor loge zuṛa dio. I hukum oarishor for oarish dori manbae.
39 I zazoir laganir ḳaron oilo, otar bae saile tumra amar hokkol hukumor ḳota iad ḳoria ota amol ḳorbae. Teu tumra amar loge kunu beimani kortae nae, tumrar souḳor ar dilor bod ḳaishor ato nizore shofitae nae.
40 Amar hoḳol hukum-ahkam amol ḳorar ḳota tumrar iad roibo, tumrar Allar name tumra fak-forezgar bondar halote roibae.
41 Ami tumrar Mabud Alla. Tumrar Mabud oar kiale, ami tumrare Mishor taki bar ḳori anchi. Ami-u Alla, tumrar Mabud.”