16
Kurah ar tar dolor dushmonir shaza
1-2 Lebi kandanor Kurahe Musa nobir birudde dushmoni lagailo. Ou Kurah oilo Kahati gusṭir Izharor fua. Tar loge Ruben ḳandanor Iliabor fua Daton ar Abiram, ar Foletor fua Oune-o Musa nobir birudita ḳorlo. Erar dolo Boni Israilor aro aṛai-sho zon namḳora murobbi neta-o shorik oila.
3 Oia tara dol bandia Musa ar Harunre ḳoila, “Tumra to kub beshi baṛabaṛi korrae. Asta Boni Israilor forteḳ manush-u zebla fak-fobitro, Mabud-o tarar loge asoin. Te tumra Mabudor bonda oḳlor ufre ustadi korrae ḳene?”
4 Ikan hunia Musa nobi ufoit oia maṭit foṛla.
5 Bade tain Kurah ar tar dolor manshore ḳoila, “Ḳail biane-u Mabude deḳaiba, ḳe tan bonda, ar ḳe fak-fobitro. Tain zare fosond ḳoroin, ḳali tarare-u tan ḳasat aite diba.
6-7 O Kurah, huno, tumi ar tumar logor hoḳole ek kam ḳoro, samnor ḳail tumra hoḳole eḳṭa ḳori agor dani loia Mabudor samne agor-kushboy zalao. Tain zare fosond ḳorba, buzilio he-u tan fak-fobitro bonda. Tumra Lebi kandanor manush to beshi baṛigese.”
8 Musae tare eoḳan ḳoila, “Tumra Lebi oḳole amar ekkan ḳota huno.
9 Tumra mono ḳorrae ni Mabudor Kaba goro ebadoti kora ar shomazor manshor kezmot ḳora ita ekkere huru-muru befar? Huno, Boni Israilor Allae shomazor oinnainno manush taki tumrare basia nia, tan nizor didaro anchoin, zate tumra ou ḳam ḳoro.
10 Tain to tumare ar oinnainno Lebi oḳolre nizor daro aibar shuzug disoin, oile tumra dekiar imamotir fodre-o doḳol ḳortae sairae.
11 Harun ar kun manush zen, tumra tar birudde boḳa-zoḳa ḳorrae? Tumi ar tumar dolor manshe to Mabudor birudde-u dol bandiso.”
12 Erar bade Musae ḳobor dila, Iliabor dui fua Daton ar Abiram aita ḳori, oile tara zanailo, “Amra oto ṭeḳat nae.
13 Tumi ou morubumit ania martae ḳori, dud ar mour banḍar-ala hou Mishor desh taki amrare bar ḳori ancho, hi desho to kuntar-u obab asil na. Er bade-o amrar ufre beṭagiri deḳanit lagso.
14 Ar tumi to amrare hou laḳan kunu dud ar mour banḍar-ala desho-o niso na, kunu zomi-zoma ba angur baganor malikana-o diso na. Tumi ita manshore anda banaia raḳtae sao ni? Na, amra zaitam nae.”
15 Ita hunia Musa kub gorom oia Mabudre ḳoila, “Mabud, tumi erar kurbani kobul ḳorio na. Ami to tarar kunu ḳeti korsi na, tarar egu gada-o ami nisi na.”
16 Bade Musae Kurahre ḳoila, “Ḳail tumi ar tumar dolor hoḳol aia Mabudor samne azir oibae. Tumrar loge Harun-o azir oiba.
17 Forteḳe aia zarzir agor danit agor-kushboy boria Mabudor name zalaibae. Tumrar aṛai-sho zonor hokkole ola zarzir agor dani zalaio. Erloge tumi ar Harune-o agor-kushboy zalaio.”
18 Musar hukum mafik forteḳe zarzir agor danit agor-kushboy ar aguin loia, Milon-tambur duaror samne, Musa ar Harunor loge gia ubaila.
19 Kurahe zebla shomazor hoḳol manshore uskaia dola ḳorlo, ḳoria Milon-tambur duaror gese Musa ar Harunor birudde ubailo, ou shomoy tara hokkolor samne Mabudor kudroti nur zair oilo.
20 Mabude Musa ar Harunre ḳoila,
21 “Ita manshor ges taki tumra hori zao, ami itare sokur foloḳor loge shesh ḳoriliar.”
22 Oile Musa ar Harun soizdat foṛia ḳoila, “O Alla, tumi to hoḳol manshor bitre zan deo. Oḳon ḳali eḳzonor naformanir dae asta Boni Israilor ufre tumi gozob ḍalitae ni?”
23 Teu Mabude Musare ḳoila,
24 “Tumi Boni Israilre zanai deo, tara zanu Kurah, Daton ar Abiramor tambur ges taki hori zain.”
25 Ikan hunia Musa soizda taki uṭia Daton ar Abiramor gese gela, tan ḳore oia Boni Israilor murobbi neta oḳol-o gela.
26 Tain Boni Israilre ḳoila, “Tumra ou naforman oḳlor tambu taki hori zao, itar kunu mal-samanat soio na. Arnae tarar gunar shazar loge tumrare-o binash ḳora oibo.”
27 Ikan hunia Kurah, Daton ar Abiramor tambur ges taki hoḳol manush hori gela. Ermaze Daton ar Abirame tarar bou-baichchain ar huru-boṛo hoḳol huruttain loia aia zarzir tambur duaror gese ubat asil.
28 Ou shomoy Musae Boni Israilre ḳoila, “Tumra ou alamot dekia buzilibae, ami zeta ḳoriar ita amar mongoṛa kunta nae. Ou ḳamor lagi Mabude-u amare faṭaisoin.
29 Erar moron zudi oinnainno manshor laḳan shababik halote oy, te mono ḳorio, Mabude amare faṭaisoin na.
30 Oile Mabude zudi asanoḳ noya kunu ḳam ḳoroin, ou zomine muk kulia tarare ar tarar hoḳoltare zinda gililae, tara zinda halote-u maṭir tolor fatalo zaegi, te buzilio, era Mabudre elami korse.”
31 Musae oḳan ḳoar loge loge-u erar faor tolor maṭi faṭia dui baṭ oigelo,
32 ar maṭie a ḳoria Kurahor foribaror hoḳolre tarar mal-samana shoho gilililo.
33 Mal-samana shudda zinda halote tara maṭir tole gelogi, bade maṭir faṭa bond oigelo. Oula Boni Israil taki tara eḳdom nifat oigelo.
34 Tarar sik-sillani hunia sairobae taki hoḳol manush douṛaia bagila, itae sillai sillai douṛaia ḳoila, “Maṭie hoyto amrare-o gililibo.”
35 Ar hou ze aṛai-sho zone agor-kushboy zalaia kurbani korsil, Mabudor ges taki gaibi aguin aia itare zalaia sali korillo.
36 Bade Mabude Musare ḳoila,
37 “Tumi imam Harunor fua Ali-Azorre ḳo, ou zalail zaga taki agor dani guin bar ḳoria, er angra-sali nia tuṛa duroi falanir lagi, i agor dani guin fak-fobitro bonigese.
38 Naformanir lagi zeguin morigesoin, ou agor dani to tarar asil. Oile Mabudor samne ita azir ḳora oisil, erlagi i hoḳolṭi fak-fobitro oigese. Te tumi ita bangaia fat banaia fobitro kurbani kanare guria toio. Ita nishana hishabe Boni Israilor gese roibo.”
39 Teu aguine zolia zeguin morsila, otar ana fitolor agor dani guin imam Ali-Azore ekḳano dola ḳorla. Bade ota bangaia kurbani kana guria toar fat banaila.
40 Mabude Musa nobir mazdi zela hukum disla, ein ou laḳan ḳorla. Ikṭa ḳora oilo zate Boni Israilor mono taḳe zen, ḳali Harunor bongsho saṛa dusra kunu zon, agor-kushboy zalanir lagi Mabudor samne zaito farto nae. Zudi zae, te tar dosha ou Kurah ar tar dolor laḳan oibo.
41 Oile bador din-u Boni Israilor manshe Hozrot Musa ar Harunor birudde ber-beri lagailo, tara ḳoilo, “Mabudor bonda oḳolre tumra-u marso.”
42 Ar shomazor hoḳol manshe zebla Musa ar Harunor birudita ḳoria Milon-tambur muka guria ubailo, ou shomoy hou gaibi megor kuṭie aḳta-u Milon-tambu guri gelo, Mabudor kudroti nur zair oilo.
43 Teu Musa ar Harun Milon-tambur samne gela,
44 ar Mabude Musare ḳoila,
45 “Ita manshor ges taki tumra hori zao, ami itare sokur foloḳor loge shesh ḳoriliar.” Ikan hunia-u tara duio zon soizdat foṛla.
46 Bade Musae Harunre ḳoila, “Tumar agor dani ato lo, ar kurbani kana taki aguin neo, nia er ufre agor-kushboy zalaia, zoldi kori ota manshor guna mafir kofora adae ḳoro. Mabud to gusae aguin oigesoin, tan lannoti mohamari shuru oigese.”
47 Teu Musar ḳotamoto Harune agor danit aguin ar agor-kushboy loia tarar gese douṛaia gela. Er maze-u itar ufre gozob shuru oigesil, oile Harune agor-kushboy zalaia tarar gunar kofora adae ḳorla.
48 Tain zinda ar murda zonor mazḳano ubaila, erlagi gozob bond oigelo.
49 Kurahor naformanir lagi zeta mara gesla, iguin bade-o aro souddo azar shat-sho manush gozobi mohamarie morla.
50 Mohamari bond oia harle Harun Milon-tambur duaror gese Musar daro firia aila.