14
Hozrot Musa ar Harun (a:)or birudde Boni Israil
1 Ikan hunia hoḳol Boni Israile silla-silli lagailo. Tara hara rait ḳanda-ḳaṭi korlo.
2 Hozrot Musa ar Harunor birudde bout ḳota-barta matilo. Tara hoḳole milia Musa ar Harunre ḳoilo, “Haere hae! Amra ḳene hou Mishor desho ba morubumit morlam na? Hono mora-u to bala asil.
3 Mabude ḳene amrare zuddor moydano marar niote ou desho nira? Honor dushmon oḳole amrar bou-baichchainre ḳaṛia niba. Er taki Mishoro firia zaoa-u amrar lagi bala nae ni?”
4 Tara eḳe-oinne ḳoilo, “Ao, amra eḳzon neta banaia hirbar Mishoro firia zaigi.”
5 I halot dekia Musa ar Harun asta Boni Israil shomazor samne maṭit soizdat foṛla.
6 Ar ze guia dole ou deshor hal-hokikot dekia aisla, tarar maz taki Nunor fua Iusa ar Zifunnir fua Kalute monor duke nizor gotror ḳafoṛ-sufoṛ siṛilla,
7 siṛia Boni Israil shomazor hokkolre ḳoila, “Huno, amra ze desh deḳat geslam, i deshḳan kub shundor.
8 Mabud zudi amrar ufre kush ar razi taḳoin, te amrare hou desho nia far ḳorba, tain dud ar mour banḍar-ala ou deshḳan amrare dan ḳorba.
9 Huno, tumra Mabudor morzir ulṭa ḳam ḳorio na. Tumra hi deshor manshore ḍoraio na, tarare gilia ḳaite-o amrar deri oito nae. Tumra itare ḍoraio na, tarar matar ufror saya nai, amrar loge to Mabud asoin.”
10 Oile tara hoḳole-u ḳoila Iusa ar Kalutre fattor maria marilta.
Ou shomoy Milon-tambu taki asta Boni Israil shomazor samne Mabudor kudroti nur zair oilo.
11 Mabude ḳoila, “O Musa, itae amare ar ḳotodin elami korbo? Tarar samne oto keramoti nishana deḳanir bade-o, tara ar ḳotodin amare ekin ḳorto nae?
12 Te huno, ami tarar ufre boṛo ek gozob ḍalimu, amar oada ḳora hou deshor malikana ḳaṛia nimugi. Bade ami tumar maz taki ita tone aro boloban, aro boṛo noya eḳ zati foyda ḳormu.”
Boni Israilor lagi Hozrot Musar minoti
13 Ikan hunia Musae ḳoila, “O Mabud, tumi zudi ila ḳoro, te Mishori oḳole ita hunba. Ar tumi to Mishor taki ita manshore tumar nizor kudrotie bar ḳori ancho.
14 Oḳon Mishori oḳole i deshor manshore-o ita zanai diba. Te O Mabud, inor manshe to emne-u zanilisoin zen, Boni Israilor loge loge tumi aso, tumare kub daro taki deḳa zae. Tara hunchoin, tumar nuror megor saya erar ufre ase, tumi dinor bala megor kuṭi ar rait oile aguinor kuṭir surote erar age age ro.
15 Oḳon tumi zudi era hoḳolre eḳloge marilao, te zoto zatir manshe tumar ita kudroti kamor ḳobor hunche, tara ḳoiba,
16 Mabude Boni Israilre ze desh dibar oada ḳorsla, hi desho loia zaoar ḳemota tan nai, erlagi tain erare morubumit nia marilisoin.
17 “Te, O din-duniar malik, tumi age zela ḳoislae ola kudroti kam zair ḳoro. Tumi nu ḳoislae,
18 Mabude gusa ḳoroin dir gotie, tan maya-mohobbotor kunu shima nai, tain manshor oinnae ar naformanir mafi dein. Oile dushi zonre shaza-o dein, baf-dadar naformanir shaza tar nati-futi forzonto bortain.
19 Te tumar duai dia ḳoiram, Mishor desh saṛia aoa taki oḳon forzonto tumi erare zela mafi dirae, tumar hou mayar ḳatire tarar oḳonkur gunare-o ola maf ḳori dilao.”
20 Teu Mabude ḳoila, “Aichcha, tumar ḳotae ami itare maf ḳori dilam.
21 Oile ami zinda asi ikan zela hasa, asta zogoto amar lila-ḳelae bora iṭa-o zela hasa, ou laḳan aroḳ hasa oilo,
22-23 ita eḳzone-o amar oada ḳora hi desh deḳar shuzug oito nae, ze desh ditam ḳori ami tarar baf-dadar gese oada ḳorslam. Ḳaron itae amar nuror tozolli deḳsoin, tara Mishoro taḳte ar ou morubumit aia-o amar kudroti lila-ḳela deḳar bade-o itae amare manchoin na, borong dosh-doshbar tara amare forikka ḳorsoin. Te tara zotozone amare elami korse, ita eḳzone-o hi desh deḳar ḳofal oito nae.
24 Oile amar bonda Kalutor dilor bab ila nae, he amar hukum furafur mane. Erlagi ze desh deḳat he gesil, ami tare hou desho nimu, tar aolad oḳol hi deshor malik oiba.
25 Huno, hou deshor faṛia tol zagainto oḳon Amaleki ar Kenani oḳole boshot ḳorra. Te samnor ḳail tumra fisedi gia Akaba shagoror faredi morubumir bae roana oio.”
Naforman oḳlor shaza
26 Bade Mabude Musa ar Harunre ḳoila,
27 “Ou naforman zatie amar birudde ar ḳotodin ber-beri korto? Tara amar birudde zeta mat mater, ita to ami hunchi.
28 Oḳon tumra gia Boni Israilre ḳo, ami Mabude nizor zindegir ḳosom ḳaia ḳoiram, ami tumrar mukor zeta mat-ḳota hunchi, ami-o tumrar loge ṭik ola-u ḳormu.
29 Manush gonibar shomoy tumrar bish bosor ba tar beshi boyoshor zetare gona oisil, mani zetae amar birudde ber-beri korse, itar lash ou morubumir maze foṛi roibo.
30 Ami tumrare ze desh ditam ḳori oada ḳorslam, ḳali Zifunnir fua Kalut ar Nunor fua Iusa saṛa ar ḳeu gia hi desho hamanir ḳofal oito nae.
31 Ar tumrar zeta huruttare ḳaṛia neoa oibo ḳoislae, ami ou huruttainre-u hou desho far ḳormu, tara-u oiba hi deshor malik, ze deshre tumra elami korso.
32 Oile tumrar lash ou morubumit foṛi roibo.
33 Ou morubumir feṭo tumrar ekkere aḳeri zon na mora forzonto, tumrar beimanir lagi tumrar aolad oḳole sallish bosor ono goru-sagolor raḳali korba.
34 Kenan deshor hal-hokikot dekia aite ze sallish din lagsil, er eḳ dinor bodla eḳ bosor, oula muṭ sallish bosor tumrar naformanir lagi koshṭo ḳorbae. Teu buzbae, ami zebla ḳeuror birudita ḳori er dosha kila oy.
35 Te ami Mabude ḳoiram, ou naforman zatir zeta manshe amar birudde dol bandise, ita hokkolṭi ou morubumit morba.”
36 Kenan deshor hal-hokikot zanar lagi Musae ze guia dolre faṭaisla, erar mazor zeguin firia aia beimani kobor roṭaia, hoḳol Boni Israilre dia Musar birudde boḳa-zoḳa ḳoraisil,
37 mani zera hou deshor befare aze-baze mat roṭaisil, tara hokkol-u moha gozobi bemare Mabudor samne morigela.
38 Ou guia dolor maz taki kali Nunor fua Iusa ar Zifunnir fua Kalut basia roila.
Nizor bole Kenan desh doḳolor ichcha
39 Hozrot Musae Mabudor ḳota hoḳol Boni Israilre zanaila. Ita hunia tara monor duke ḳator oigela.
40 Bador din biane tara hou faṛi elaḳat zaoar lagi tiar oia ḳoilo, “Ou deḳo, amra zairamgi. Amra to guna ḳoria harsi, te oḳon amra Mabudor oada ḳora desho-u zaitamgi.”
41 Oile Musae ḳoila, “Tumra Mabudor hukumor ulṭa zairae ḳene? Tumrar niot fura oito nae.
42 Huno, tumra zaio na, ḳaron Mabud tumrar loge nae. Dushmon oḳlor gese tumra aribae.
43 Hino gia tumra Amaleki ar Kenani oḳlor mukamuki oibae. Ar Mabudor log saṛia gesogi kori, tain tumrar loge roita nae. Erlagi tumra zuddor muko morbae.”
44 Tebou tara tan ḳota ulṭaia hou faṛi elaḳa bae roana dilo. Oile Musa tarar loge gela na ar Mabudor fobitro shahadot shonduk-o kempor bitre roigelo.
45 Tarare dekia-u hou faṛia elaḳar Amaleki ar Kenani oḳol lamia aia hamla salailo, ar honor Horma ṭaun forzonto ḳedaia nilo.