13
Kenan desho guia faṭani
1 Erbade Mabude Musare ḳoila,
2 “Boni Israilre ami ze Kenan desh ditam sairam, ou deshor hal-hokikot dekia aoar lagi tumi baro ḳandan taki baro zon shordar faṭao.”
3 Mabudor hukum faia Musae ola-u ḳorla. Tain Faran morubumi taki zerare faṭaila, era hoḳol-u Boni Israilor shordar.
4 Era oila:
Ruben ḳandanor Zakuror fua Shammua,
5 Shimion ḳandanor Kurir fua Shofat,
6 Ehuda ḳandanor Zifunnir fua Kalut,
7 Isaḳor ḳandanor Iusufor fua Zigal,
8 Afraim ḳandanor Nunor fua Husia,
9 Bin-Iamin ḳandanor Rofur fua Foloti,
10 Sobulon ḳandanor Soidor fua Goddiel,
11 Iusufor fua Manosha ḳandanor Sushir fua Gaddi,
12 Dan ḳandanor Gomollir fua Ammiel,
13 Ashir ḳandanor Mikailor fua Sotur,
14 Noftali kandanor Boshiror fua Noib,
15 ar Sadu ḳandanor Makir fua Guzoyel.
16 Kenan deshor hal-hokikot zania aibar lagi guia hishabe Musa nobie erare faṭaila. Tain Nunor fua Husiare Iusa ḳoia ḍakita.
17 Kenan desho faṭanir bala Musae tarare ḳoila, “Tumra Negeb morubumir mazedi gia faṛia elaḳat hamaibae.
18 Hamaia deḳbae, ou deshḳan kila. I deshor bashinda manush ḳom na beshi, tara ḳomzur na boloban.
19 Tarar deshḳan bala na mondo? Deshor ṭaun oḳol usa baunḍori oal ḳora, na baunḍori saṛa?
20 Hinor maṭit rosh ase ki na, gas-fala ase ki na? Ar aoar shomoy dekio, farle hou deshor kunu fol-mul loia aio.” Ou shomoy to angur faḳar shomoy aise.
21 Teu tara Zin morubumi taki shuru ḳoria Hamator bae Rahob forzonto gia asta deshor hal-hokikot dekia aila.
22 Zaoar ḳalo tara Negeb morubumi oia Hebron ṭauno gia azila. I Hebron ṭaun banail oisil Mishor deshor Suan ṭaun bananir shat bosor age. Hino foyluan Anaki kandanor tinzon manush asil, erar nam oilo Ahiman, Shisai, ar Talmai.
23 Bade ou guia oḳol Ashkul namor faṛia ḳalor faro taki eḳ soṛi angur shudda asta eḳ lot ḳaṭia loia aila. I anguror soṛi tarar duizone bang dia boia anla. Loge kisu anuar ar ḍumur fol-o anla.
24 Boni Israilor shordar oḳole hon taki ou anguror soṛi kaṭae ou zagar nam oigelo, Ashkulor ḳal, mani soṛir ḳal.
25 Asta Kenan deshor hal-hokikot dekia hari, sallish din bade tara hoḳol firia aila.
Kenan deshor befare guiar ripoṭ
26 Ou guia oḳol Faran morubumir Kadesh namor zagat firia aila, ono Musa nobi, imam Harun ar Boni Israil oḳol asla. Era aia hoḳolre honor ḳobor-antor zanaila ar hou deshor fol-mul deḳaila.
27 Tara Musare ḳoila, “Afne amrare ze desho faṭaisla, amra hono gia deḳlam, hi deshḳan hasau dud ar mour banḍar-ala desh. Ou deḳoukka, hou deshor fol.
28 Oile hinor manush kub foyluan ar tarar ṭaun-o boṛo boṛo ar usa baunḍori kora. Amra Anaki foyluan ḳandanor manshore-o hono deḳsi.
29 Amaleki oḳol boshot ḳoroin Negeb morubumit. Hiṭṭi, Zibuzi ar Amuri oḳol faṛi elaḳat roin. Ar Kenani oḳlor ḳeu ḳeu doriar ḳandat ar ḳeu ḳeu Zordan gangor faro roin.”
30 Ou shomoy Musar samne zeta manush dola asla, Kalute erar shurgul tamaia ḳoila, “Amrar lagi zorur oilo hono gia ou desh doḳol ḳora, ar ita amra farmu-o.”
31 Ikan hunia tan logor guia oḳole ḳoila, “Na, na, ita manshor loge laṛai kora amrar lagi oshombob, ita amra taki bout bolala.”
32 Era hou deshor befare mongoṛa misa matia ḳoila, “Amra ze desh deḳat geslam, i deshe tar proza oḳolre gilia ḳailae. Hinor manush kub usa-muṭa foyluan.
33 Amra hino Nefili zator manshore-o deḳsi, ita deḳte doitto-danobor laḳan. Amra to tarar gese tuchcho fifṛar laḳan, tara-o amrare ola fifṛa mono ḳorse.” Zano to, oḳonkur Anaki zati ou Nefili oḳlor bongshodor.