12
Bibi Moriomor shasti
1 Hozrot Musae Itiopia deshor eḳzon beṭire bia ḳorsla. Enre bia ḳorae Musar boin Moriom ar bai Harune Musar birudde mat-ḳota matila.
2 Tara ḳoila, “Mabude ḳali Musar marfote matoin ni? Amrar usillae-o matoin na ni?” Ikan Mabude hunla.
3 Ashole Musa nobi to asla eḳzon gorima saṛa manush. Zogotor maze ila gorima saṛa ar kunu manush asil na.
4 Musar birudde Harun ar Moriomor mat-ḳota hunia-u Mabude Musa, Harun ar Moriomre ḳoila, “Tumra tinozon bar oia Milon-tambur gese ao.” Teu era tinozon ono aila.
5 Ou shomoy Mabude-o kudroti megor saḳat oia lamia aila, aia Milon-tambur duaror ges taki Harun ar Moriomre ḍakila. Tara aguaia aile
6 Mabude ḳoila, “Tumra amar ḳota huno. Tumrar maze kunu pir-dorbesh taḳle, ami Mabude doroshonor mazdi amar nizore tar gese zair ḳori ar kuabe tar loge batchit ḳori.
7 Oile amar gulam Musar loge ila ḳori na. He amar asta shongsharor hoḳol taki bishashi zon.
8 Ami tar loge samna-samni oia kula-kuli batchit ḳori, kunuta batuni raki na. Ami Mabude ze surote tare didar dei, he amare ola deḳe. Erbade-o tumra amar gulam Musar birudde matite ḍorailae na ni?”
9 Erlagi Harun ar Moriomor ufre Mabud gusae aguin oigela, oia tain horia gelagi.
10 Megor saḳa zebla Milon-tambu taki ufre uṭigelo, ou shomoy deḳa gelo, Moriomor asta gotro fosa-kusṭo bemare dudor laḳan dola oigese. Harune Moriomor bae saia ou halot deḳla.
11 Dekia tain Musare ḳoila, “O amar malik, amra na buzia ze guna ḳorilisi, i kosuri kan tumi mono rakio na.
12 Maʼr feṭo taki zonom oar bala ze huruttar ordeḳ shoril koy oigese, tumi Moriomre ila banaio na.”
13 Teu Musae ḳandia Mabudor dorbaro aroz ḳorla, “O Alla, tumi amar boinor bemar shifa ḳori deo.”
14 Mabude Musare ḳoila, “Tair bafe zudi tair muko ḳali sef falaita, te shormaia tai shat din goror bare roilo one na ni? Ola shatdin taire kempor bare alog raḳo, bade bitre anbae ne.”
15 Erlagi Moriomre shat din kempor bare horai toila. Enre bitre anar ag forzonto manshor soforo baroni bond roilo.
16 Bade Boni Israil oḳol Hazirut saṛia Faran morubumit gia kemp gaṛila.