11
Bezar oae gozob
1 Boni Israile nizor duk-koshṭor lagi bezar oia boḳa-zoḳa ḳorla. Erlagi Mabude tarar ita hunia gusa oigela. Tain gozobi aguin faṭaila ar ou aguin tarar maze zolilo, ete kempor kinarar kisu ongsho aguine zoligelo.
2 Erdae tara Musa nobir gese gia ḳanda-ḳaṭi lagaila, teu Musae Mabudor dorbaro dua ḳorae aguin nibi gelo.
3 Mabudor aguin tarar maze zolchil ḳori, ou zagar nam oigelo Tabera.
Shoḳor ḳani na faoae boḳa-zoḳa ḳora
4 Boni Israilor loge oinnainno zatir zeta manush asla, tara dusra zator mozar kunu ḳanir lagi fagol bonigela, ar erar deḳa-deki Boni Israile-o hirbar ḳanda-ḳaṭi kori koila, “Ish, amra zudi gust ḳaitam fartam!
5 Mishoro taḳte to bina foyshae magna mas ḳaitam, hono tormuz, fiaz-roshun, kira, hag-torḳari hokkolta ḳaitam, ita oḳono mono foṛer.
6 Oile oḳon amrar ḳoilja hukai gese. Ino to ḳali manna saṛa ḳaoar ar kunta-u nai.”
7 Ou manna deḳte ḍula baḳoror laḳan, er rong oilo kismisor laḳan.
8 Manshe sairobae taki manna tukaia ania gail-siadi kuṭia ba hil-faṭadi sesia guṛa ḳorta. Bade ita fatilo una dia ba fiṭa banaia ḳaita. Ita ḳaite teldi banail fiṭar laḳan moza.
9 Raitor bala Boni Israilor kempor ashe-pashe kua foṛto, ou kuar loge oia behesti kani manna-o foṛto.
10 Musa nobir ḳano ailo, fortek goror manshe zarzir tambur duaror gese ubaia ḳandira. Erdae tain kub bezar oila, ar Mabud-o gusae aguin oigela.
11 Teu Musae Mabudre ḳoila, “Tumi kene tumar i gulamre ila bifodo falailae? Ami kita dush ḳorlam, ze ḳarone ota manshor bar amar ḳando dilae?
12 Ami kunu tarare feṭo loisi ni, ba tara amar feṭ taki zonmise ni? Tumi tarar baf-dadaintor gese ze desh dibar oada ḳorsilae, tarare hono nibar lagi amare ḳene tarar falok-bafor laḳan banaiso, ar tarare kulo ḳori nibar ḳota ḳene ḳoirae?
13 Ita manshor ḳanir lagi ami oḳon gust kuai faitam? Tara amar gese ḳali gust gust ḳoia sillaira.
14 Tarar zimma neoa boṛo moshkil, amar eḳar fokke i zimma neoa shombob nae.
15 Tumi zudi amare i moshkilo falao, te tumar duai dia ḳoiar, oḳon-u amare zane marilao. Ar ḳoiram, ami zudi tumar rohomotor tole taki, te nizor souke nizor behalloti dosha amare deḳaio na.”
Shottoir zon murobbie ḳemota faila
16 Teu Mabude Musare ḳoila, “Boni Israilor maze tumi zarare murobbi neta ar ijjoti hishabe sino, erar maz taki shottoir zon murobbi netare loia amar gese ao. Tumi tarare ḳo, tara Milon-tambur gese aia tumar loge ubaita.
17 Ami hono lamia aia tumar loge batchit ḳormu. Tumar maze Allar ze ruhu asoin, ou ruhu ami tarar ufre-o dan ḳormu. Manshor zimmadari boia nite tara-o tumare shaijjo ḳorba. Teu tumar eḳla boa lagto nae.
18 Ar tumi ota manshore zanai deo, tara fak-fobitro oia ḳailkur lagi zuit roita, ḳail-u tara ḳanir gust faiba. Tara to gustor lagi Mabudor dorbaro ḳanda-ḳaṭi koria ḳoisil, Mishoro taḳte-u tara arame asil. Te ḳail Mabude tarare gust diba ar tara ḳaiba.
19 I gust ḳali eḳdin-duidin, fasdin-doshdin, ba bishdin nae,
20 fura eḳ mash bori kaiba. Ḳaite ḳaite tarar naḳedi bar oibo, bade ar zane kulaito nae. Ami ila goṭaimu, ḳaron tumrar loge ze Mabud boshot ḳoroin, ou Mabudre tumra mancho na. Tan samne ḳanda-ḳaṭi koria ḳoiso, Mishor taki horia aoa bule tumrar lagi ṭik oise na.”
21 Ikan hunia Musae ḳoila, “Ḳali zuddo ḳorar zuka-u to soy laḳ manush amar loge asoin, ar tumi koirae fura eḳ mash bori tarare gust ḳabaibae.
22 Te hokkol goru-meṛa zobo ḳorle-o to oto manshor fuito nae, ar doriar hoḳol mas maria anille-o kulaito nae.”
23 Mabude zuaf dila, “O Musa, Mabudor kudroti bol oto ḳomzur ni? Te tumi deḳbae, ami tumare zeta ḳoisi, ita hasa, na misa.”
24 Teu Musa bare gela, gia ota manshore Mabudor hukum zanaila. Ar Boni Israilor shottoir zon murobbi netare ania Milon-tambur sairobae ḳaṛa ḳoraila.
25 Ou shomoy gaibi megor saḳat oia Mabud lamia aila, aia Musa nobir loge batchit ḳorla. Musar ufre Allai ze ruhu asla, Mabude ou shottoir zon netar ufre-o ou ruhur kisu ongsho dila. Ou ruhu tarare dan ḳorar bade, tara kisu shomoy sufi-dorbeshor eshki bab deḳaila, oile bade ar ila oise na.
26 Ar ou shottoir zon murobbi netar mazor duizon murobbi kempor bitre roigela, erar nam Ildad ar Midad, tara Milon-tambur gese gesla na. Tebou Allai ou ruhu tara-o faila, faia tara kempor bitre roia sufi-dorbeshor eshki bab deḳaila.
27 Ita dekia eḳ zuan beṭae douṛaia gia Musare ḳoila, “Huzur, hunchoin ni? Ildad ar Midad namor duio murobbie kempor bitre sufi-dorbeshor eshki bab deḳaira.”
28 Ou shomoy Nunor fua Iusae Musare ḳoila, “O amar malik, afne erare nished deukka.” Ou Iusa zuankir shuru taki-u Musa nobir ḳas ḳadim asla.
29 Musae enre ḳoila, “Amar man-shomman-u tumar gese boṛo oigelo ni? Ami sairam, Mabudor hoḳol bondae-u sufi-dorbeshi faukka, ar Mabude afon ruhu tarare dan ḳoroukka.”
30 Erbade Musa ar Boni Israilor murobbi neta oḳol kempo firia gelagi.
Kuel fakir gust ḳaoa
31 Bade Mabudor hukume boṛo eḳ tufan ailo. Ou tufane doriar far taki kuel faki ṭelia ania kempor sairo gala borai dilo. Eḳdinor fot foriman zaga fakie borigelo. Fakir fal maṭi taki dui at usa tub oia, gis lagia foṛi roilo.
32 Teu hou din, hou rait, ar bador asta din manshe bare gia kuel fakin tubaia anla. Tara forteḳe ḳompokke foinchash mon ḳori faki dola ḳorlo. Fakin dola ḳoria kempor sairobae tara boaia toila.
33 Oile fakir gust tarar muko haranir loge loge-u Mabud gusae aguin oigela. Gusa ḳoria tain bezuita gozobi bemar ḍalila.
34 Erlagi i zagar nam deoa oilo Kibrut-Hutaba, mani lalosi oḳlor ḳoybor, ḳaron ou lalosi oḳolre manshe ono ḳoybor disil.
35 Erbade tara Kibrut-Hutaba saṛia gelagi, gia Hazirut namor zagat roila.