10
Sunga bananir hukum
1 Mabude Musare ḳoila,
2 “Tumi rufar fat fiṭaia duiṭa sunga banao. Boni Israilre ekḳano dola ḳorar niote ḍakibar lagi ou sunga bazaio, tarar nanan dol soforo roana oar bala-o tumi oguin bazaio.
3 Ou duio sunga zebla eḳloge bazani oibo, ou shomoy hoḳol Boni Israil tumar samne Milon-tambur duaror gese aia dola oiba.
4 Oile eḳṭa sunga bazani oile ḳali Boni Israilor nanan ḳandanor shordar oḳol tumar samne aia dola oiba.
5 Foyla bar sunga bazaile Milon-tambur fubedi zera tambu ṭangaise, tara roana diba.
6 Dusra bar bazaile douknor galar dol oḳol roana diba. Ikṭa to soforo roana dibar shongkeṭ.
7 Te hoḳol manshore dola ḳorar lagi tumi duio sunga bazaio, oile er shur oibo alada roḳomor.
8 Ou sunga bazaiba imam Harunor bongshor imam oḳole. Iṭa tumrar lagi ar tumrar bongshodoror lagi-o siroḳalin niom.
9 “Nizor desho gia harle tumra zebla kunu zulumbaz dushmonor loge laṛait bar oibae, ou shomoy duio sunga bazaia shongkeṭ dibae. Teu tumrar Mabud Allae tumrar bae kial ḳoria dushmonor at taki tumrare basaiba.
10 Tumrar kushi-bashir onusṭano, tumrar hoḳol ido, sandor foyla din zebla zalail kurbani ba salamoti kurbani dibae, ou shomoy-o sunga bazaio. Ou aoaz hunle tumrar Allae tumrar bae souk firaiba. Mono rakio, ami Alla-u tumrar Mabud.”
Boni Israilor sofor shuru
11 Boni Israil zati Mishor taki baronir dusra bosoror dusra sandor bish tarik shahadot tambu mani Allar goror ufre taki kudroti megor kuṭi horigelo.
12 Ou shomoy Boni Israile Sinai morubumi taki roana dila. Hou megor kuṭi Faran morubumit aia tir na oa forzonto tara solat-u roila.
13 Musa nobir mazdi Mabudor hukum faia, tara foyla bar ou soforo roana oila.
14 Foyla-u Ehudar fotaḳar tino ḳandanor nanan fouzi dole roana dila, erar neta asla Aminadabor fua Nahish.
15 Erar maze Isaḳor ḳandanor manshor dayitto asil Sugaror fua Notonelor ufre,
16 ar Sobulon ḳandanor manshor dayitto asil Helonor fua Iliabor ufre.
17 Bade Allar goror hoḳolta kula oilo, teu Zarsuni ar Mararia oḳole oḳanor hoḳolta boia loia roana dila.
18 Erar bade Rubenor fotaḳar tino ḳandanor fouzi dole roana dila, erar shordar oila Shadiuror fua Alisur.
19 Erar maze Shimion ḳandanor dayitto asil Shuroshadayor fua Shalumilor ufre,
20 ar Sadu ḳandanor dayitto asil, Duelor fua Iliasofor ufre.
21 Erar bade Allar goror fak-fobitro mal-samana loia Kahati oḳole roana dila. Kahati oḳol zagat gia fosar age-u Allar gor ḳaṛa ḳorar ḳota asil.
22 Erbade Afraim fotaḳar tino fouzi dolor manshe roana dila, erar shordar oila Amihudor fua Alishama.
23 Er maze Manosha ḳandanor dayitto asil Fatoshuror fua Gomolielor ufre.
24 Ar Bin-Iamin ḳandanor dayitto asil Zidaunir fua Abidanor ufre.
25 Hoḳol heshe roana oila Dan fotaḳar tino ḳandanor fouzi dolor manshe, tarar shordar oila Amishadar fua Akiazar. Erar samnor hoḳol fouzi dolre fara dia tarar ḳore ḳore roila.
26 Er maze Ashir ḳandanor dayitto asil Ukranor fua Fozielor ufre,
27 ar Noftali kandanor dayitto asil Inanor fua Ahiror ufre.
28 Ou laḳan Boni Israilor nanan fouzi dol eḳe eḳe roana oila.
29 Erbade Musae Madian deshor tan hour Shuaib nobir fua Hubobre ḳoila, “Mabude amrare ze desh dibar oada ḳorsoin, amra hou desho zairamgi. Te tumi-o amrar loge ao. Mabude to oada ḳorsoin, tain Boni Israilre bout meherbani korba. Oḳon tumi amrar loge aile amra tumare kub maya-doya ḳormu.”
30 Hubobe zuaf dila, “Na, ami zaitam nae. Ami amar desho nizor manshor gese firia zaimugi.”
31 Oile Musae ḳoila, “Na, na, tumi amrare falaia zaio na. Tumi-u amrar fot deḳaora zon. Morubumir maze kun zagat amrar tambu gaṛa usit, ita to tumar zana ase, erlagi tumi-u oilae amrar souk.
32 Huno, tumi zudi amrar loge ao, te Mabude amrare zoto meherbani korar oada ḳorsoin, tumare-o otar baṭ dimu.”
33 Ou laḳan Boni Israile Mabudor faṛ taki roana oia tin dinor fot aguai gela. Ar ziraibar lagi ekkan zaga tukaia bar ḳorar kiale, Mabudor hou fobitro shahadot shonduk tin din dori tarar age age gelo.
34 Kemp taki roana oar bade, dinor bela Mabudor gaibi megor kuṭi Boni Israilor ufre roito.
35 Ou shahadot shonduk roana oile-u Musae ḳoita, “O Mabud, soloukka. Tumar dushmon oḳol sairobae sitri zauk, tumare zetae ingshain, ita tumar samon taki bagouk.”
36 Ar zebla ou shonduk tamizito, tain ḳoita, “O Mabud, laḳ laḳ Boni Israilor gese tumi firia ao.”