6
1 Mabude Musa nobire aro ḳoila,
2 “Huno, kunu manshe zebla tar ari-forir loge harami koria Mabudor dorbaro guna ḳore, tar gese toa amanot ba bondoki zinishor kianot ḳore, ba suri kori kunu mal ney ba ṭogaṭogi kore, sol-soturi koria beimani mate,
3 tubaia faoa malor befare beimani mate ba ota hokkoltar befare kunu misa ḳosom ḳae, ba ou laḳan aro kunu guna ḳore,
4 te ou nomunar guna ḳoria oforadi bonae, he zeta mal attoshat ḳorse, ba sol-soturi koria nise, ba amanotor kianot ḳorse, tubai faoa mal lukaise,
5 ba zekunu malor befare misa ḳosom ḳaise, ita hoḳolta he firot dibo, erloge zorimana hishabe aro fas baṭor eḳ baṭ beshi dibo. He zedin tar dush shikar ḳorbo, ou din malor malikre ita firai dibo.
6 Ar nizor dush-ḳosuri mafir niote he Mabudor dorbaro kurbani loia azir oibo, imam sabor ṭik kora damor egu nikut meṛar faṭa loia aibo.
7 Imame Mabudor dorbaro tar gunar kofora adae ḳorba. He otar mazor zekunu guna ḳorle, ou nomunae tar gunar mafi faibo.”
Zalail kurbanir aro musla
8 Bade Mabude Musa nobire ḳoila,
9 “Tumi Harun ar tar fuaintore hikai deo, zalail kurbani adae ḳorar musla oilo, kurbanir foshu fozor forzonto hara rait kurbani kanar agunir ufre roibo, ar aguino zalail roibo.
10 Biani bala imam sabe suti kafoṛdi banail haf-penṭor laḳan nizor zangiaḳan ar tan imamotir baki hoḳol sutir lebas findiba. Findia kurbanir foshu zalanir sali tulia nia kurbani kanar ḳandat toiba.
11 Bade tain ou lebas bodlaia, dusra lebas findia, ou salire kempor bare kunu fak-saf zagat nia falaiba.
12 Oile kurbani kanat aguin zalail roibo, ita nibto na. Forteḳ din biane imame ou agunir ufre zalanir daru diba, dia darur ufre zalail kurbanir foshure hazaiba, hazaia er ufre salamoti kurbanir sorbire zalaiba.
13 Hushiar roio, kurbani kanar aguin hamesha zolat roibo, ita kunu shomoy-u nibto na.
Dan-gom sodgar aro musla
14 “Dan-gom sodgar niom oilo, Harunor fuain taki eḳzon imame ou sodgar moyda ar dorḳari hokkolta loia kurbani kanar gese Mabudor samne azir oiba.
15 Ar imame oḳan taki eḳ muiṭ moyda, kisu tel ar sodgar hoḳol loban-agor nia asta sodgar nishana hishabe ou ongshore kurbani kanar ufre zalaiba. Itar dumar gerane to Mabud kushi oin.
16 Sodgar malor bad-baki ongsho imam Harun ar tar fuainte ḳaiba. Tara itar maze kunu ḳamir na mishaia ruṭi banaiba, banaia Milon-tambur uṭano kunu pak zagat boia ḳaiba.
17 Mono rakio, kunu ḳamir furaia itare sekio na. Amar name deoa zalail kurbanir ou ongsho ami tarare dilam. Gunar koforar kurbani, ar dush-ḳosurir koforar kurbanir laḳan dan-gomor sodgar ou ongsho-o oilo ḳas fobitro.
18 Ḳali imam Harunor bongshor hoḳol beṭa manshe ita ḳaita farba, Mabudor namor zalail kurbanir ou ongsho to oarishor for oarish dori tara-u faiba. Kub kial rakio, zesatae itar loge lagbo, ota-o fak-fobitro bonizibo, mani imam oḳlor baira manshor lagi haram.”
Imamoti shomzibar sodgar musla
19 Mabude Musa nobire aro ḳoila,
20 “Harune zedin imamotir ḳelafoti shomzia ḳamo boail oiba, ou din Harun ar tar fuainte dan-gomor sodgar niom mafik dui sher moyda Mabudor dorbaro anba. Itar ordeḳ biane ar ordeḳ hainja bala diba.
21 Tara tel dia ḳai banaia taoat sekia harle ita ṭukra ṭukra ḳoria Mabudor samne dan-gomor sodga hishabe azir ḳorba, itar dumar gerane Mabud kushi oin.
22 Harunor bade tar ze fuare fordan imam hishabe ḳelafoti deoa oibo, he-o oula sodga adae ḳorbo. Ita to Mabudor hor-hameshakur faona, ou sodgar fura ongsho zalailite oibo.
23 Imam oḳlor nizor deoa dan-gomor sodgar hokkolta zalailite oibo, ita ḳaoar kunu hukum nae.”
Gunar koforar kurbanir aro musla
24 Bade Mabude Musa nobire ḳoila,
25 “Tumi Harun ar tar fuaintore gunar koforar kurbanir niom hikao. Zalail kurbanir foshure ze zagat zobo ḳoroin, gunar koforar kurbanir foshure-o ono zobo ḳorba. I kurbanir gust to ḳas fobitro.
26 Ze imame ou kurbani adae ḳorba, ein ou gust ḳaiba. Milon-tambur uṭano fobitro zagat ou gust ḳaite oibo.
27 Zeta zinishe ou gustre soibo, ita fak-fobitro oizibo. Kunu ḳafoṛor maze zudi er lour siṭa lage, te fak-fobitro kunu zagat ita doite oibo.
28 Ar maṭir ze fatilo ou gust randa oibo, ita bade bangilibae. Oile fitolor fatilo randile iṭa manjia fanidi doia fak-saf ḳorbae.
29 Imam bongshor zekunu beṭainte ou kurbanir gust ḳaita farba, ita to ḳas fobitro gust.
30 Oile gunar koforar kurbanir foshur lou zudi Milon-tambur bitre neoa oizae, te i kurbanir gust ḳaoa nished, ita zalailite oibo.