5
Kun kun gunar lagi kofora zorur
1 “Kunu manshe zudi nizor souke deḳa ba ḳane huna kunu goṭona zane, ar bisaror ḳalo adaloto shakkir shuzug faia-o shakki na dey, te itar lagi he guna ḳore, tar i oforador shaza he boibo.
2 “Ḳeu zudi na zania kunu nafak zinish soilae, te he nafak ar dushi bonbo. Ita kunuzator zongli haram mora foshu, goro fala kunu mora zandar ba maṭir maze buke solra zekunu mora zandarre na zania soile-o dushi-nafak bonbo.
3 “Manshor shorilre zetae nafak korilae, shoril taki bar oil ou laḳan kunuta ḳeu zudi na zania soilae, te ita zanar bade he dushi oibo.
4 “Aḳol-bibeḳ na ḳaṭaia aḳta zudi keu kunu ḳosom ḳorilae, bala ba bura kunta ḳormu ḳoia monor bekiale ḳeu kunu ḳosom ḳaile-o, he zebla ikan buzilibo ou shomoy he dushi bonbo.
5 “Ou laḳan zekunu oforad ḳoria ḳeu dushi bonigele, he nizor gunare shikar ḳorte oibo.
6 Ar ou gunar zorimana hishabe he Mabudor name, gunar koforar kurbanir niote eḳṭa meṛi ba sagi anbo, ar imame tar gunar kofora adae ḳorba.
7 “Ar he zudi meṛi ba sagi ante ofarog oy, te ou gunar zorimana babot duiṭa ḍufi faki ba faro ania Mabudor name dite oibo. Itar mazor egu oibo gunar koforar kurbani, ar dusraṭa zalail kurbani.
8 Ar he ita ania imamor ato dibo, imame gunar koforar kurbani hishabe foyla egu fakire kurbani diba. Tain ogur ḳolla muraia marba, oile ḳolla algaita nae.
9 Bade ogur tuṛa lou nia kurbani kanar sairo galat siṭai diba, ar bad-baki lou kurbani kanar tole ḍali diba. Ita oilo gunar koforar lagi kurbani.
10 Ar dusra fakiṭare imam sabe niom mafik zalail kurbani diba. Dia, tar gunar kofora adae ḳorba, teu he mafi faibo.
11 “Ar zudi ou gunar koforar lagi duiṭa ḍufi faki ba faro anto na fare, te he dui sher moyda ante oibo. Ita gunar koforar kurbani oae itar ufre kunu tel ba loban-agor dio na.
12 Ou moyda loia he imamor gese zaibo, gele ou asta kurbanir bodla nishana hishabe eḳ muiṭ moyda imam sabe kurbani kanar ufre Mabudor name zalailiba. Ita oilo Mabudor name gunar koforar kurbani.
13 He ze oforad ḳorse, otar mafir lagi imame ola kofora adae ḳorba, teu tar gunar mafi faibo. Ar kurbani deoar bade i moydar zotoḳan roibo, dan-gomor sodgar laḳan ita hoḳolta imame faiba.”
Dush-ḳosurir ḳeti-furon ar kurbani
14 Bade Mabude Musa nobire ḳoila,
15 “Ḳeu zudi na zania Mabudor fak-fobitro kunu mal-samanar befare emne-u kunu dush-ḳosuri korilae, te ou gunar zorimana hishabe ebadot ḳanar mafe zoto tola rufadi meṛar dam ṭik kora oy, te he tar nizor fal taki ou foriman damor ba homan damdi kinia nikut egu meṛar faṭa Mabudor name kurbani dite oibo. Ita to dush-ḳosurir koforar kurbani.
16 Ar he ou fak-fobitro mal-samanar befare ze dush-ḳosuri korse, itar ḳeti-furon-o dite oibo. He ou meṛar damor loge aro fas baṭor eḳ baṭ foriman nogod ṭeḳa imam sabor ato dibo. Bade imame tar ḳosuri mafir niote ou meṛare nia dush-ḳosurir koforar kurbani adae ḳoria harle, he mafi faibo.
17 “Ar kunu manshe zudi bul ḳoria na zania Allar nished ḳora kunu dush-ḳosurir ḳam ḳorilae, te itar lagi he dushi. I gunar lagi tare dayi kora oibo.
18 He tar ou dush-ḳosurir kofora hishabe, egu nikut meṛar faṭa ba er dam ania imam sabor gese dibo. He na zania ze dush-ḳosuri korilise, imam sabe otar kofora adae ḳorba, teu tar mafi milbo.
19 Ita to dush-ḳosurir koforar kurbani, he Mabudor dorbaro dush ḳorse.”