4
Gunar koforar kurbanir niom
1 Bade Mabude Musare ḳoila,
2 “Tumi Boni Israilre ḳo, na zanar ḳarone ḳeu zudi bul ḳoria Allar nished ḳora kunu gunar ḳam ḳorilae, te tain ou nomunae gunar koforar kurbani adae ḳorba.
3 “Ein ḳelafoti faoa fordan imam sab oile, tan gunar dae-bar hoḳol manshor ufre borte, erlagi tain nikut egu bisal ania Mabudor dorbaro tan gunar koforar kurbani diba.
4 Ou bisal loia tain Milon-tambur duaror gese Mabudor samne aiba, aia ogur ḳolla atai dia, Mabudor samne zobo ḳorba.
5 Ḳoria ou bisalor tuṛa lou nia Milon-tambur bitre zaiba.
6 Gia lour maze nizor angul subaia lou lagaia Herem Shorifor fordar bae Mabudor samne shatbar siṭai diba.
7 Bade aro tuṛa lou loia Milon-tambur maze Mabudor samne agor-kushboy zalanir ṭebulor sairo kunar hing oḳlor maze lagaiba. Ar bad-baki lou nia Milon-tambur duaror samnor zalail kurbani kanar tole ḍali diba.
8 Bade gunar koforar lagi deoa kurbanir ou bisalor hoḳol sorbi bar ḳorba, feṭor bitoror hokkoltar ufror sorbi, itar loge lagail hoḳol sorbi,
9 duio kiḍni ar otar ufror sorbi, ar ḳoiljar logor maṭia.
10 Salamoti kurbanir gorur sorbir laḳan, ou kurbanir bisalor hoḳol sorbire-o ola bar ḳorba. Bade imame ou sorbi nia zalail kurbani kanat zalailiba.
11 Oile ou bisalor ḳolla, ḳal, gust, ṭeng, at-boṛ, gufor,
12 hoḳolta nia Boni Israilor kempor bare zeḳano kurbanir salir ṭeki toin, hou fak-saf zagar salir ṭekir ufre ota toia hari, laḳṛir aguindi zalailiba.
13 “Ar asta Boni Israil shomaz na zanar ḳarone zudi bul ḳoria kunu gunar ḳam ḳorilae, Allar nished ḳora kunu ḳam ḳoria dushi bonizae, te na zania ḳorle-o tara hoḳol-u gunagar.
14 Bade zebla tara zanba, zania hari ou gunar koforar lagi hoḳlor torof taki egu bisal kurbani diba, ou bisal loia tara Milon-tambur samne azir oiba.
15 Oia Boni Israilor murobbi oḳole ou bisalor ḳolla atai diba, ar imame Mabudor samne oḳṭa zobo ḳorba.
16 Zobor bade ḳelafoti faoa imam sabe bisalor tuṛa lou loia Milon-tambur bitre hamaiba.
17 Hamaia ou lour maze tan ator anguil subaia, tuṛa lou Herem Shorifor fordar bae shatbar Mabudor samne siṭaiba.
18 Bade aro tuṛa lou loia Mabudor samne toa, Milon-tambur bitoror agor-kushboy zalanir ṭebulor hing oḳol-o lagaiba. Bad-baki lou fuṭain Milon-tambur duaror samnor zalail kurbani kanar tole ḍali diba.
19 Ar bisalor hoḳol sorbi bar ḳoria kurbani kanat zalailiba.
20 Fordan imamor gunar koforar lagi bisalre zela kurbani deoa oy, imame ou bisalre-o ola kurbani korba. Tain ou shomazor gunar koforar kurbani adae ḳorle, tarar gunar mafi milbo.
21 Imam sabe bisalor bad-baki hoḳolta loia kempor bare zaiba. Gia tan nizor gunar koforar hou bisalor laḳan ou bisalor hoḳolta-o kempor bare ola zalailiba. Ita oilo asta shomazor gunar koforar kurbani.
22 “Ar Boni Israilor kunu shordare na zanar ḳarone zudi bul ḳoria ola guna ḳorilain, te Allar nished ḳora ḳam ḳorae tain to dushi.
23 Tain zebla ou gunar befare zaniliba, zanar bade koforar kurbani dibar lagi nikut egu faṭa sagol loia aiba.
24 Aia ou faṭar ḳollar ufre atai dia, zalail kurbanir foshu zobo ḳorar zagat nia ogure Mabudor samne zobo ḳorba. Ita to tan gunar koforar kurbani.
25 Bade imam sabe ou foshur tuṛa lou tan ator angulit ḳori loia, zalail kurbani kanar hing oḳlor ufre lagaiba. Bad-baki lou nia tain kurbani kanar tole ḍali diba.
26 Ar salamoti kurbanir foshur sorbir laḳan ogur hoḳol sorbire kurbani kanar ufre zalailiba. Ou laḳan imame hou shordaror gunar mafir lagi kofora adae ḳorle, tain mafi faiba.
27 “Ar Boni Israilor kunu shadaron zone na zanar ḳarone zudi bul ḳoria kunu gunar ḳam ḳorilae, Mabudor nished ḳora kunu ḳam ḳoria dushi bonizae,
28 te he zebla tar gunar befare zanilibo, zania ou gunar koforar lagi he nikut egu sagi loia aibo.
29 Aia ou sagir ḳollar ufre atai dia, zalail kurbanir zobor zagat nia ogure zobo ḳorbo.
30 Bade imam sabe tan ator angulit ḳori ogur tuṛa lou lagaia, kurbani kanar hing oḳlor ufre lagaiba. Bad-baki lou tain kurbani kanar tole ḍali diba.
31 Ar salamoti kurbanir meṛar sorbir laḳan ogur hoḳol sorbi bar ḳoria kurbani kanar ufre zalailiba. Itar dumar gerane Mabud kushi oin. Ou nomunae imame hou zonor gunar kofora adae ḳorle, tar mafi milbo.
32 “Gunar koforar kurbanir niote ḳeu zudi kunu meṛa ane, te iṭa nikut meṛi-baichcha oite oibo.
33 He ogur ḳollar ufre atai dia, zalail kurbanir foshur zobor zagat nia, gunar koforar kurbanir niote ogure zobo ḳorbo.
34 Bade imam sabe tan ator angulit ḳori ou meṛir tuṛa lou loia, kurbani kanar hing oḳlor ufre lagaiba. Bad-baki lou tain kurbani kanar tole ḍali diba.
35 Ar salamoti kurbanir meṛar sorbi zela bar ḳoroin, ogur hoḳol sorbire-o ola bar ḳorba. Bar ḳoria kurbani kanat kurbani deoa hoḳoltar ufre toia ou sorbire-o zalailiba, ou nomunae imame hou zonor gunar kofora adae ḳoria harle, he mafi faibo.