7
Dush-ḳosurir kurbanir aro musla
1 “Dush-ḳosurir koforar kurbanir musla oilo, i kurbanir gust to ḳas fobitro.
2 Zalail kurbanir foshure ze zagat zobo ḳora oy, ou kurbanir foshure-o ono zobo ḳorte oibo. Itar lou kurbani kanar sairo galabae siṭai dite oibo.
3 Ar itar hoḳol sorbire loibo, mani sorbi ala lenguṛ, feṭor bitoror hoḳoltar ufror sorbi,
4 er loge duio kiḍni ar otar ufror sorbi, ar ḳoiljar logor maṭia, i hoḳolta algaiba.
5 Algaia imame ou hoḳolta nia Mabudor name agunit deoa kurbani hishabe kurbani kanar ufre zalailiba, ita oilo dush-ḳosurir koforar kurbani.
6 Kurbanir gust imam foribaror zekunu beṭa manshe ḳaita farba. Ita to ḳas fobitro zinish, erlagi tara zekunu pak zagat boia ḳaite oibo.
7 “Gunar koforar kurbani ar dush-ḳosurir koforar kurbanir niom-ḳanun to eḳoi nomunar. Ze imam sabe ou koforar kurbanire adae ḳorba, ein ou gust faiba.
8 Ar ze imame zalail kurbani adae ḳorba, ein ou kurbanir foshur samṛa-o nita farba.
9 Luaṛit, taoat ba tunduri undalo hedia ana dan-gomor sodgar ruṭi kali hou imame faiba, zein i sodga adae ḳorsoin.
10 Oile dan-gomor bad-baki hoḳol sodga, ita tel maḳail ba hukna zekunu laḳan ouk, imam Harunor hoḳol fuainte itar homan baṭ faiba.
Salamoti kurbanir aro musla
11 “Mabudor name deoa salamoti kurbanir niom oilo,
12 kunu manshe zudi Mabudor shukria adae ḳorar kiale salamoti kurbani dey, te ou kurbanir foshur loge tel mishail nireḳ moyda dia ḳamir saṛa ruṭi ba banail ruṭit tel maḳaia loia aibo, ba tel mishail ḳamir saṛa nireḳ moydar fiṭa banaia ante oibo.
13 Shukria adae ḳorar kiale salamoti kurbanir zinishor loge ḳamir ala tuṛa ruṭi-o anbo.
14 Mabudor name deoar lagi he ou forteḳ zinish taki eḳṭa eḳṭa ḳori anbo. Ze imame salamoti kurbanir foshur lou siṭaiba, ein ita faiba.
15 Shukurana adae ḳorar niote deoa ou kurbanir gust ou din-u ḳailite oibo. Ita bador din biankur lagi toa zaito nae.
16 “Ou salamoti kurbani zudi kunu mannot adae ḳorar niote deo, ba emne kushi oia kurbani deo, te itar gust ou din-u ḳaio, ar kisu baki roile bador dino ḳaitae farbae.
17 Oile dui din bade i gust roile, ita zalailite oibo.
18 Tin nombor din i gust ḳaile kurbani kobul oito nae. Kurbani deorar amol-namat ita uṭto nae, ou gust to nafak oigese, kunu manshe ita ḳaile tare naforman hishabe gona oibo.
19 “Salamoti kurbanir gustor maze nafak kunu zinish lagigele, i gustor i ongsho ar ḳaoa zaito nae, ita zalailiba. Oile baki gust ḳaoa zaibo, fak-saf halote ze kunu zone ita ḳaita farba.
20 Ar nafak halote kunu manshe zudi Mabudor name deoa ou salamoti kurbanir gust ḳailae, te shomaz taki tar nam miṭailite oibo.
21 Kunu manshe zudi foshur ba manshor kunu nafak zinish soia hari ba dusra nafak kunta soia hari Mabudor name deoa salamoti kurbanir gust ḳailae, te tar nam-o shomaz taki miṭailite oibo.”
Lou ar sorbi haram
22 Ar Mabude Musare ḳoila,
23 “Tumi Boni Israilre zanai deo, tumra goru-sagol ba meṛar kunuzat sorbi kaio na.
24 Kunu mora foshur ba zongli zanuare mara foshur sorbire tumra oinno kunu ḳamo lagaitae farbae, oile ḳaitae fartae nae.
25 Zoto nomunar foshu dia Mabudor name agunit deoa kurbani adae ḳora oy, ita zator foshur sorbi zegue ḳaibo, tar namre shomaz taki miṭailibae.
26 Tumra zekunu zagat boshot ḳoro na ḳene, kunuzat foshu ba fakir lou ḳaoa zaiz nae.
27 Kunu manshe zudi lou ḳae, te shomaz taki tar nam miṭailite oibo.”
Imam sabor faona hok
28 Bade Mabude Musare ḳoila,
29 “Tumi Boni Israilre zanai deo, zekunu manshe kunu foshu dia salamoti kurbani adae ḳorle, kurbanir gustor eḳṭa ongsho Mabudor dorbaro dite oibo.
30 Mabudor name agunit deoa kurbanir ou ongsho, mani sina ar sinar ufror sorbi he nizor ate ania imam sabre dibo. Imame itare usa ḳoria Mabudor samne dulaiba.
31 Bade tain sorbire kurbani kanar ufre zalailiba, oile ou sinar gust imam Harun ar tan fuainte faiba.
32 Salamoti kurbanir foshur ḍainor ranor gust imam sabre dilaibae.
33 Imam Harunor bongshor ze ḳeu salamoti kurbanir foshur lou ar sorbire kurbani diba, tan faona hishabe ou ranor gust niba.
34 Boni Israilor deoa hoḳol salamoti kurbanir gust taki dulona kurbanir sina ar ḍainor ranor gust ami imam Harun ar tar fuaintore dilam. Boni Israilor deoa kurbanir i ongsho oilo tarar hameshakur faona hok.”
35 Harun ar tar fuaintore zedin taki imamotir ḳamo boail ḳora oisil, hou din taki Mabudor name agunit deoa hoḳol nomunar kurbanir ou ongshore tarar faona hok hishabe dora oise.
36 Tarare zedin ḳelafoti shomzaia boail ḳora oise, hou din Mabude Boni Israilre hukum disla, kurbanir gustor ou ongsho hor-hamesha erare dibar lagi.
37 Ita oilo zalail kurbani, dan-gomor sodga, gunar koforar kurbani, dush-ḳosurir koforar kurbani, imamoti shomzibar sodga, ar salamoti kurbanir niom.
38 Sinai morubumit Mabude zedin Boni Israilre hukum disla tan name kurbanir zinish anar lagi, hou din tain Tur faṛor ufre Musa nobire ou hokkol niom-ḳanun zanaisla.