22
Imam oḳole lilla-kurbani kaoar niom
1 Erbade Mabude Musare ḳoila,
2 “Tumi imam Harun ar tar fuaintore ḳo, Boni Israile amar name lilla ar kurbani dibar niote zotota anoin, ita to fobitro. Erlagi ota hokkoltare imam oḳole ijjot-tazim ḳora zorur. I befare tara zanu amar fak-fobitro namre oshomman na ḳore. Ami-u to Mabud.
3 “Tumi tarare zanai deo, tarar aolador mazor ḳeu zudi nafak halote Mabudor name deoa kurbanir kunu zinishor ḳandat zae, te tare amar samon taki horailibae. Ami-u to Mabud.
4 Harunor aolad oḳlor maze ḳeu zudi fosa-kusṭo bemari ba datu zaoa bemari oy, te fak-saf na oa forzonto he kurbanir kunuta ḳaoa nazaiz. Ar mora lashre ba ou lashor lagi zeta ḳamo lagail oise ita kunuta soia zudi keu nafak bone, ba ḳeuror zoubonor fani bar oy,
5 ar ze zon kunuzat maṭit solra huru-muru nafak zandar ba zekunu ḳarone nafak oa kunu manshore soia he nizore nafak banae,
6 te hainja forzonto he nafak halote-u roibo, ar fanidi naia hari fak-saf na oa forzonto kurbanir kunu fobitro zinish ḳaoa tar lagi haram.
7 Bade shuruz ḍubia harle he zebla fak-saf oibo, ou shomoy he ita ḳaito farbo. Ita to tar-u ḳani.
8 Imame kunu mora foshu ba zongli zanuaror tabae mara kunu foshur gust ḳaia nizore nafak banaio na. Ami-u to Mabud.
9 “Imam oḳlor befare ami zeta ain-ḳanun disi, ita tara mania solouk. Arnae dushi bonbae ar nafakir dorun tarar moron oibo. Mono rakio, ami Mabude-u tarare fobitro ḳori.
10 “Imam foribaror manush saṛa dusra kunu zone kurbanir fobitro zinish ḳaoa nished. Imamor kunu meman ba ḳamlae-o ita ḳaoa haram.
11 Oile imamor ḳorida gulame ba tan baṛit zonmise ilaḳan gulame ita ḳaoa zaiz.
12 Imamor fuṛi zudi aroḳ imam saṛa baira kunu damandor loge bia-shadi oy, te tai-o kurbanir ou fobitro zinish ḳaoa haram.
13 Oile imamor kunu ṛaṛi fuṛi ba talaḳ faoa niaoladi kunu fuṛi zudi bafor baṛit roibar lagi hirbar aioy, te tai to bafor ḳanir ongsho faibo.
“Imam foribaror baira kunu zone kurbanir fobitro kunu ḳani kaoa zaiz nae.
14 Ḳeu zudi bul ḳoria ita ḳailae, te i zone imamor gese ḳeti-furon dite oibo. Ou ḳanir damor loge aro fas baṭor eḳ baṭ dam beshi dite oibo.
15 Boni Israile Mabudor name tarar ze zinish fobitro kurbani hishabe dan ḳoroin, imam oḳole zanu itare ofobitro na banain.
16 Tara baira manshore ita ḳaite dia manshore dushi banaia ḳeti-furonor daṛo zanu na falain. Mono rakio, ami Mabude-i tarare fobitro ḳori.”
Zelaḳan lilla-kurbani kobul oy na
17 Bade Mabude Musare ḳoila,
18 “Tumi gia imam Harun, tar fuain ar hoḳol Boni Israilre ḳo, tumrar kunu manshe ba tumrar loge boshot ḳorra bin-deshi kunu zone zudi mannot adae ḳorar lagi ba nizor kushie nofol kurbani hishabe Mabudor name zalail kurbani dibar niote kunuta loia ae,
19 te ikṭa oite oibo egu nikut bisal, meṛa ba sagolor faṭa. Ila na oile to Mabude kobul ḳorta nae.
20 Kut ala kunu foshudi zanu kurbani adae na ḳore, ḳorle-o tar kunu fayda oito nae.
21 Kunu mannot adae ḳorar lagi ba nizor kushie nofol kurbani hishabe ḳeu zudi Mabudor name salamoti kurbani dito sae, te itar lagi egu nikut goru, meṛa ba sagol ante oibo. Gotro kut ala kunu foshudi kurbani dile ita kobul oito nae.
22 Kunu manshe zanu kurbanir niote anda, lengṛa, ḳaṭa-sira, kunu ongo ḳaṭa, fuzala ga, ba daud-ḳauzli kunu foshure Mabudor dorbaro na ane, zalail kurbanir lagi ola kut ala kunu foshure kurbani kanar ufre tulio na.
23 Ta-o foshur kunu ongo niomor beshi lamba ba baṭṭi taḳle, olaḳan foshure nizor kushie nofol kurbani hishabe dita farba, oile kunu mannot furonor lagi ilaḳan kurbani kobul oito nae.
24 Kunu foshur onḍokush zudi tetla, sesa, ḳaṭa-sira taḳe, te itare tumra Mabudor name kurbani dio na, nizor desho gia ila ḳorio na.
25 Bin zatir kunu manshor ges taki olaḳan foshu ania tumrar Allar name kurbani dio na. Itar gotro kut taḳae itadi kurbani dile tumrar kunu fayda oito nae.”
26 Bade Mabude Musare ḳoila,
27 “Zonmor bad taki shat din forzonto goru ba sagol ba meṛa-baichchare tar maʼr loge roite dibae. Aṭ nombor din taki itare Mabudor name agunit deoa kurbani hishabe deoa zaibo.
28 Ta-o gai ar tair basurre, meṛi ba sagi ar tair baichchare, eḳoi dine zobo ḳora haram.
29 Tumra Mabudor name kunu shukurana kurbani dite saile, ita ou nomunae adae ḳorio zela tain kushi oin.
30 Kurbanir gust kurbanir dinor maze ḳailite oibo, ita bador din bian forzonto toa haram. Ami-u to Mabud.
31 “Tumra amar hukum manio ar ou laḳan solio. Ami-u to Mabud.
32 Tumra amar fak-fobitro namre oshomman ḳorio na, zate Boni Israilor maze ami fak-fobitro hishabe goinno oi. Ami Allae tumrare fak-fobitro banai.
33 Ami tumrar Mabud oar niote tumrare Mishor desh taki bar ḳori anchi. Ami-u to Mabud.”