23
Boni Israilor Zummabar ar id oḳol
1 Bade Mabude Musa nobire ḳoila,
2 “Tumi Boni Israilre zanai deo, ami Mabude tumrar lagi ou id oḳol ṭik korlam, tumra itare fobitro milon-mahfilor din hishabe manbae.
3 “Haftat soy din tumra ḳam-ḳaz ḳorio, ar shat nombor din oilo ziraibar din, fobitro milon-mahfilor Zummabar. I din tumra kunu ḳam-ḳaz ḳorio na, tumra zekunu zagat boshot ḳoro, i din ḳan tumrar Mabudor name fobitro Zummabar hishabe manio.
4 “Tumrar lagi amar ṭik kora zoto id ase, mani fobitro milon-mahfilor din hishabe zeta mantae, ita ami koiram. Ita oilo:
Azadi Id ar Ḳamir Saṛa Ruṭir Id
5 “Bosoror foyla sandor souddo tarikor hainja taki Mabudor name Azadi Id arombo oibo,
6 ar ou sandor fonro tariko Mabudor name Ḳamir Saṛa Ruṭir Id arombo oibo. Fura shat din tumra ḳamir saṛa ruṭi kaibae.
7 Ou shat dinor foyla din tumrar fobitro milon-mahfil oibo, ou din duniabi niote kunuzat ḳam-ḳaz ḳora tumrar lagi haram.
8 Ou shat dinor forteḳ din tumra Mabudor name agunit deoa kurbani dibae. Bade shat nombor din tumrar fobitro milon-mahfil oibo, ou din tumra duniabi niote kunu ḳam-ḳaz ḳora haram.”
Ḳetor foyla fosholor sodga
9 Mabude Musa nobire aro ḳoila,
10 “Tumi Boni Israilre zanai deo, ami Mabude tumrare ze desh oḳlor malikana diram, hono gia harle tumra zotobar zominor foshol daibae, otobar ḳetor foyla ḳaṭa ekkan muiṭ loia imam sabor gese zaio.
11 Gele imame ou muiṭ nia Mabudor samne dulaiba. Zummabaror bador din tain ikan dulaiba, teu Mabud tumrar ufre kushi oiba.
12 Imam sabe zedin ou muiṭ dulaiba, ou din tumra Mabudor name eḳ bosor boyoshi egu nikut meṛa-baichchare zalail kurbani hishabe dibae.
13 Erloge dan-gomor sodgar lagi tel maḳail sair sher moyda dibae. Ita to Mabudor namor agunit deoa sodga, itar dumar gerane tain kushi oin. Ar er logor shorbot-fanir sodgar niote anguror eḳ sher shorbot-o dibae.
14 Tumrar ḳetor foshol daia hari, tumrar Allar namor ou sodga adae ḳorar ag forzonto noya foshol tumra ḳaio na. Itadi ruṭi banaia ba agunit bazia ḳaoa-o nished. Tumra zeno-u ro na ḳene, oarishor for oarish dori siroḳal ou niom manio.
Fonchaisha Id
15 “Ar ou Zummabaror bador din, mani zedin dulona kurbani lagi fosholor muiṭ loia aibae, ou din taki shat haftae shat Zummabar gonibae.
16 Ou shat Zummar bador din, mani foinchash dinor din tumra Mabudor name noya fosholor sodga adae ḳorbae.
17 Tumra nizor baṛi taki Mabudor name dulona kurbani dibar niote ḳetor foyla foshol taki kisu foshol anio. Tumra sair sher moydadi banail ḳamir furail dukan nan ruṭi anio.
18 Ou ruṭir loge eḳ bosor boyoshi shatṭa nikut meṛa-baichcha, eḳṭa bisal, meṛar duiṭa faṭa anio. Ou foshu oḳol dia Mabudor name ekkan zalail kurbani adae ḳorbae, otar loge niom mafik dan-gomor sodga ar shorbot-fanir sodga-o dibae. Ita to agunit deoa eḳ nomunar kurbani, itar dumar gerane Mabud kushi oin.
19 Bade tumra gunar koforar kurbani hishabe egu faṭa sagol, ar salamoti kurbanir lagi eḳ bosor boyoshi dugu meṛa-baichcha kurbani dibae.
20 Imam sabe dulona kurbani hishabe Mabudor samne ou duio meṛa-baichcha ar ḳetor foyla fosholdi banail ruṭi nia dulaiba. Ita to Mabudor namor kurbanir fak-fobitro samana, ita imam sabor faona.
21 Ḳetor foshol daoar ou idor din tumra eḳṭa fobitro milon-mahfil ḳorio. Ou din duniabi niote kunu ḳam-ḳaz ḳorio na. Tumra zeno-u ro na ḳene, oarishor for oarish dori hor-hamesha ita amol ḳorio.
22 “Tumra zebla ḳetor foshol daibae, ou shomoy tumra zominor ailor ḳandar foshol saf ḳoria ḳaṭio na, ar daoar bade ou zomino falail foshol lurio na. Gorib-duki ar bideshi musafiror lagi ita toio. Mono rakio, ami Alla-u tumrar Mabud.”
Shinga Bazanir Id
23 Bade Mabude Musa nobire ḳoila,
24 “Tumi Boni Israilre zanai deo, bosoror shat nombor sandor foyla dinre tumra furafur ziranir din hishabe manio. Ou din tumra shinga bazaio ar hoḳole milia idor fobitro milon-mahfil ḳorio.
25 Ou din tumra duniabi niote kunu ḳam-ḳaz ḳorio na, ḳali Mabudor name agunit deoa sodga adae ḳorio.”
Koforar Id
26 Mabude Musare ḳoila,
27 “Ou shat nombor sandor dosh nombor din oilo Koforar Idor din. I din tumra eḳṭa fobitro milon-mahfil ḳorio. Forteḳ zone noto oia zarzir dil shofia dia Mabudor name agunit deoa sodga adae ḳorio.
28 Ita oilo Koforar Id, tumrar Mabud Allar samne tumrar gunar kofora adae ḳora oibo, asta i dino kunuzat ḳam-ḳaz ḳora haram.
29 Ze manshe hou din noto oia nizor dil shofia na dey, tar nam i zatir maz taki miṭailibae.
30 Ar hou din zudi keu kunu ḳam-ḳaz ḳore, te tar nam ami i zatir maz taki shesh ḳorilimu.
31 Ou din tumra kunuzat ḳam-ḳaz ḳorio na. Tumra zeno-u ro na ḳene, oarishor for oarish dori hor-hamesha ou niom manio.
32 Ou din oibo tumrar lagi fobitro Zummar din, erlagi noto oia dil shofia dio. Ou sandor noy nombor dinor hainja taki bador din hainja forzonto fobitro ou Zummar din manio.”
Ḍera-goror Id
33 Erbade Mabude Musa nobire ḳoila,
34 “Tumi Boni Israilre ḳo, ou shat nombor sandor fonro tarik taki Mabudor name Ḍera-goror Id arombo oia, shat din forzonto id solbo.
35 Ou shat dinor foyla din tumrar fobitro milon-mahfil oibo. I din tumra duniabi niote kunu ḳam-ḳaz ḳorio na.
36 Ou idor shato din tumra Mabudor name agunit deoa kurbani adae ḳorbae. Bade aṭ nombor dino tumra hirbar fobitro milon-mahfil ḳorbae ar Mabudor name agunit deoa kurbani dibae. Iṭa oilo shesh dinor aḳeri mahfil, ou dino tumra duniabi niote kunu ḳam-ḳaz ḳorio na.
37 “Asta bosoror maze zoto laḳan id ase, ota hokkol zator id oḳol to Mabude-u dairjo ḳori disoin. Erlagi idor ou din oḳolre tumra fobitro milon-mahfilor din hishabe manio, er forteḳ din zeta zeta ḳora zorur, ita adae ḳorio. Mani, zalail kurbani, dan-gomor sodga, nizor kushie salamoti kurbani, ar er logor shorbot-fanir sodga. Ou kurbani oḳol Allar dairjo ḳora dino tumra adae ḳorio.
38 Oile kial rakio, tumrare batail ota hokkol laḳan id oḳlor kurbani ar lilla-sodgare adae ḳoria, Mabudor name Zummabaror kurbani, hoḳol nomunar lilla-sodga, mannot ar nizor kushie deoa salamoti kurbanire-o adae ḳorio. Hota id oḳlor kurbanir loge itare milaio na, alada rakio.
39 “Ar shat nombor sandor fonro tariko, ḳetor hoḳol fol-foshol tular bade, tumra Mabudor name shat din doria Ḍera-goror ou id adae ḳorio. Ou shat dinor foyla din ar sheshor aṭ nombor din oilo tumrar furafur ziraibar din.
40 Er foyla din tumra tortaza gasor ḍal fala, mani kezur fata, hoḳol nomunar fata-bahar gasor ḍal fala, ar gangor faror izol gasor ḍal loia azir oio. Oia ou shato din tumra nizor Mabud Allar samne kushi-bashi korio.
41 Forteḳ bosoror shat nombor sandor shat din tumra Mabudor name i id adae ḳorio. Oarishor for oarish dori hor-hamesha ita manio.
42 Fura shat din tumra hoḳol gia ḍera-goro roio, Boni Israilor hoḳol manush ou shomoy ḍera-goro takio.
43 Teu ota dekia hari tumrar aolad oḳole-o buzba, Boni Israilre Mishor desh taki bar ḳori ania harle ami morubumir maze tarare ola ḍera-goro boshot ḳoraislam. Mono rakio, ami Alla-u tumrar Mabud.”
44 Erbade Musa nobi gia Mabudor batail ou hoḳol idor ḳota Boni Israilre zanaila.