20
Guna-naformanir shaza
1 Bade Mabude Musare ḳoila,
2 “Tumi Boni Israilre zanai deo, tumrar mazor kunu manshe ba tumrar loge boshot ḳorra bin-deshi kunu manshe zudi tar fua ba fuṛire Mulok devtar name boli dey, te ogure zane marilibae, deshor manshe milia fattordi iṭaia tare marbae.
3 He nizor fua ba fuṛire aguindi zalaia Mulok devtar name boli dia, amar Kaba gorre nafak banaise ar amar fak-fobitro namre oshomman ḳorse. Erlagi ami tar ḳeti korat lagmu, i zatir maz taki tar nam miṭailimu.
4 Ou devtar name tar fua ba fuṛire boli deoar shomoy, i deshor manshe zudi dekia-o na-deḳar ban ḳoroin, ar i boli deorare zane na maroin,
5 te ami nize ou naforman ar tar foribaror ḳeti korat lagizimu. Ami ogur nam ar ogur laḳan aro zeguinte ila naformani korbo, ota hokkolṭir nam Boni Israil shomaz taki miṭailimu. Era to amar loge beimani koria hou Mulok devtar ato nizore shofi dise.
6 “Kunu manshe zudi amar loge beimani koria, zin-but shadok ba gonoḳor loge mishia nizore shofi dilae, te tar-o ḳeti korat lagizimu ar i zatir maz taki tar nam miṭailimu.
7 “Tumra amar lagi nizore alada ḳoro ar fak-fobitro o. Mono rakio, ami Alla-u tumrar Mabud.
8 Amar niom-ḳanun furafur amol ḳorio. Ami-u to Mabud, ami-u tumrare fak-fobitro ḳori.
9 “Ze manshe afon ma-bafre gali-galaz ḳoria beijjot ḳore, tare-o zane marbae. Ou naformanir dae tar moutor lagi he nize-u dayi.
10 “Kunu manshe zudi ari-forir kunu zonor bour loge zina ḳore, te ou beṭa-beṭi duio zonre zane marilibae.
11 Ze manshe tar haton maʼr loge zina ḳore, he tar bafre beijjot ḳore. Erlagi tare ar haton maʼre zane marbae. Tarar moutor lagi to tara-u dayi.
12 “Kunu manshe zudi afon fuar bour loge zina ḳore, te tara duio zonre zane marbae. Tara manob shomazor ulṭa solae, tarar moutor lagi nize-u dayi.
13 Kunu beṭae zudi aroḳ beṭar loge zina-fungami kore, te tara duio zone-u boṛo ḳobisi korse, erlagi duio zonre zane marilibae, tarar moutor lagi tara-u dayi.
14 “Kunu beṭae zudi kunu fuṛire ar tair maʼre-o hanga ḳore, te ou beṭa ar ma-fuṛi tino zonre aguindi zalaia marilibae, zate ila naformani kam tumrar maze na goṭe.
15 Kunu foshur loge kunu manshe zina ḳorle, hou manush ar foshu duiogure zane marbae.
16 Kunu beṭie zudi kunu foshur loge zina ḳorat zae, te hou beṭi ar foshure-o zane marbae. Tarar moutor lagi tara-u dayi.
17 “Kunu beṭae zudi tar afon boin, haton ma ba haton bafor goror boinor loge shorili mila-misha ḳore, ita to shoromor ḳam. Tarare shomaz taki horailibae, ar he shaza faibo.
18 Kunu beṭi manshor mashik bemaror shomoy tair loge ze beṭae shorili mila-misha ḳore, i beṭie to tair mashik kalor ijjot dey na, ar i beṭae-o tair mashikre dam dey na. Erlagi Boni Israil shomaz taki i duiogur nam miṭailibae.
19 Kunu beṭae zanu tar ḳala ba fufur loge zina na ḳore, arnae afon lour kuṭumre beijjoti korae tara duio zone shaza faibo.
20 Ḳeu zudi tar sasi ba mamir loge zina ḳore, te tara duio zone shaza faibo, niaoladi halote tarar moron oibo, he to tar sasa ba mamare beijjot ḳorse.
21 Bai zinda taḳte zudi aroḳ baie tar babire hanga ḳore, te tar baire beijjot ḳorae, iṭa boṛo naformani. Tara kunu aolad faita nae.
22 “Tumra boshot ḳorar lagi ami tumrare ze desho niar, hou deshor maṭie zanu tumrare bomi koria na falae. Erlagi tumra amar batail hoḳol shoriot ar niom-ḳanun oḳol amol ḳorio.
23 Tumrar samne taki ami zeta zati oḳolre ḳedai diram, itar sal-cholone tumra solio na. Tarar hou sal-cholonor lagi-u ami tarare lannot disi,
24 erlagi-u ami tumrare oada dislam tarar deshre ami tumrar doḳole dimu, tarar hou dud ar mour banḍar-ala desh ami tumrare dan ḳormu. Ami Alla-u tumrar Mabud, zogotor hoḳol zati taki ami-u tumrare alada ḳorsi.
25 Erlagi tumra halal ar haram foshuintor maze tofat rakio, halal ar haram fakintor maze tofat rakio. Foshu-faki ar maṭir ufre solra huru huru zandaror maze zetare ami haram ḳoisi, ota dia tumra nizor shorilre nafak banaia lannoti bonio na.
26 Ami Mabud to fak-fobitro, erlagi tumra-o fobitro oite oibo. Amar afon proza oar lagi ami-u tumrare zogotor hoḳol zati taki basia alog korsi.
27 “Zeta beṭa ba beṭinte zin-but shadon, gonoḳ ba zadu-ṭunar ḳam ḳore, itare zane marilibae. Fattordi iṭaia zane marilibae, tarar moutor lagi tara-u dayi.”