19
Fak-fobitro sal-cholon
1 Mabude Musa nobire aro ḳoila,
2 “Tumi hoḳol Boni Israilre ḳo, ami tumrar Mabud Alla to fak-fobitro, erlagi tumra-o fak-fobitro o.
3 Tumra forteḳe zarzir ma-bafre tazim ḳorio, ar amar deoa hoḳol Zummabar manio. Ami Alla-u tumrar Mabud.
4 Tumra kunuzator deb-debir puja ḳorio na, puja ḳorar niote format ḍalia shuna-rufa, fitol-tamadi kunu deb-debir murti-o banaio na. Mono rakio, ami Alla-u tumrar Mabud.
5 “Tumra zebla nizor kushie Mabudor name kunu salamoti kurbani deo, ou shomoy ola bab loia dio, zate Mabudor dorbaro ita kobul oy.
6 Ar itar hoḳol gust kurbanir din ba bador din ḳailite oibo. Tin dinor din kunu gust baki roile, ita aguindi zalailio.
7 Tin dinor din to i gust nafak bonizae, ita ḳaile tumrar kurbani kobul oito nae.
8 I gust ḳeu ḳaile he naformanir daṛo foṛbo, he to Mabudor namor fak-fobitro zinishre nafak banaise. Te tumrar shomaz taki tar nam miṭailibae.
9 “Ḳetor foshol ḳaṭar shomoy tumra zominor ailor ḳandar foshol saf ḳoria ḳaṭio na, ar ḳaṭar bade zomino falail foshol luria nio na.
10 Angur ḳetor angur faṛibar ḳalo, tole falail angur tubaia tulio na, ar hoḳol angur saf ḳori faṛia nio na. Shomazor gorib-duki ar bideshi musafiror lagi ita kisu toia zaio. Ami Alla-u to tumrar Mabud.
11 “Suri korio na, misa matio na, ar eḳe-oinne ṭogaṭogi korio na.
12 Tumra amar nam loia misa ḳosom ḳaio na, ila ḳorle tumrar Allar namre ofobitro ḳora oy. Ami-u to Mabud.
13 “Kunu ari-forir ufre zur-zulum ḳorio na, tarar kunu zinish ḳaṛia nio na. Ruzi kamlar beton ou dinor maze-u adae ḳorio, bador din forzonto tar beton aṭḳai toio na.
14 Kunu ḳaluare boddua dio na, ḳana ba andae usṭa ḳaibar lagi tar fotor maze kunta toio na. Tumra nizor Mabud Allare ijjot-tazim ḳorio, ami-u to Mabud.
Hok bisar-insafor niom-ḳanun
15 “Na-hok bisar ḳorio na, bisaror maze gorib-doni, ba huru-boṛor fokkofati oio na, hoḳlor lagi hok bisar ḳorio.
16 Manshor bodnam gaia gaia gurio na, kunu manshor zanor ḳeti oy, ila kunu ḳam ḳorio na. Ami-u to Mabud.
17 “Afon ari-forir bae ingsha-dushmonir bab monor maze gatia rakio na. Tar oforad tare buzai dio, teu tar gunar bar tumar ufre aito nae.
18 Nizor zatir manshor bodla loio na, tarar bae zid-ingshar bab monor maze gatia rakio na. Ari-forire tumar nizor laḳan maya ḳorio. Ami-u to Mabud.
19 “Tumra amar niom-ḳanun mania solio. Eḳ zator foshur loge aroḳ zator foshure fal ḳabaio na. Eḳ zomino dui zator bis ḳet ḳorio na, ar dui zator sutadi banail ḳafoṛ findio na.
20 “Kunu bandi beṭir bia ṭik kora oise, oile tair mohoranar ṭeḳa deoa oise na, ba malike zegure azad ḳoria disoin na, ila kunu bandir loge ḳeu shorili mila-misha ḳorle, te he ḳeti-furon dite oibo. I duio zonre zane mario na, ḳaron ou bandi fuṛi to azad oise na.
21 Oile ou beṭae tar dush-ḳosurir koforar kurbanir lagi, Mabudor name nikut egu meṛa loia Milon-tambur duaror samne azir oibo.
22 Dush-ḳosurir koforar kurbanir lagi ana hou foshure kurbani dia, imam sabe Mabudor samne tar gunar kofora adae ḳorar bade, he ou gunar mafi faibo.
23 “Tumra nizor desho gia hari kunu folor gas lagaile, tin bosor forzonto i gasor fol tumrar lagi haram. Ou tin bosoror maze i gasor fol ḳaoa nazaiz.
24 Sair nombor bosoro i gasor hoḳol fol Mabudor shukur-guzarir niote tan name dilaibae.
25 Fas nombor bosor taki ou gasor fol tumrar lagi halal. Ita manle tumrar gaso bout fol aibo. Mono rakio, ami Alla-u tumrar Mabud.
26 “Tumra lou shomet kunu gust ḳaio na. Kunu zator zadu-montro ba gona-basa hikio na, ar bebohar-o ḳorio na.
27 Matar duio galar sul saṭa, ba daṛir aga ḳaṭio na.
28 Murdar lagi ahazari korat gia nizor shorilo zoḳom ḳorio na. Gotror maze kunuzat saf-sobi akio na. Ami-u to Mabud.
29 “Ṭeḳa ruzir niote nizor fuṛire silani-bodmaishit lagaio na. Arnae asta desh zinae borizibo, fura desho ḳobisi baṛibo.
30 Amar deoa Zummabare ziraio, ar amar Kaba gorre ijjot ḳorio. Ami-u to Mabud.
31 “Zinnat ba ferot shadok, gonoḳ ba zadu-ṭuna ḳorrar gese zaio na, itar loge mishio na. Arnae itae tumrare nafak banailiba. Mono rakio, ami Alla-u tumrar Mabud.
32 “Murobbi manush daro aile tumra ubaia ijjot dio. Tumra nizor Allar ḍor-ḳofe roio. Ami-u to Mabud.
33 “Tumrar desho tumrar loge boshot ḳorra bin-deshi manshor ufre zulum ḳorio na.
34 Nizor zatir loge zela bebohar ḳoro, tarar loge-o ola bebohar ḳorio, tarare nizor laḳan maya ḳorio. Mono rakio, tumra-o Mishor desho bin-deshi halote aslae, ar ami Alla-u tumrar Mabud.
35 “Tumra kunuzat maf-zuko ar fallar uzono be-insafi korio na.
36 Tumrar falla-fattor, her-fura, nol-doṛi, mafor hoḳolta zanu ṭik-ṭak taḳe. Ami Alla-u tumrar Mabud, ar Mishor desh taki ami-u tumrare bar ḳori anchi.
37 Amar batail hoḳol niom-ḳanun ar furafur shoriot tumra mania solio. Ami-u to Mabud.”