2
Dan-gomor sodgar niom
1 “Kunu manshe zudi dan-gom dia Mabudor name lilla-sodga dito sae, te nireḳ moyda dia adae ḳorbo. Ou moydar ufre he zoytunor tel ar loban-agoror duna dibo.
2 Dia imam Harunor ze fuainte imamoti koroin tarar gese ota loia aibo. Imame ota taki tel mishail eḳ muiṭ moyda ar hoḳol agor loia, tar ana hokkoltar bodla nishana hishabe ou ongshore kurbani kanar ufre zalailiba. Ita oilo Mabudor name agunit deoa kurbani, itar dumar gerane tain kushi oin.
3 Zalanir bade zotoḳan baki roibo, ita imam Harun ar tan fuainte faiba. Mabudor namor agunit deoa kurbanir ongsho oae, basi zaoa ou moyda to ḳas fobitro zinish.
4 “Ar ḳeu zudi tunduri undalo hedia ana kunu dan-gomor sodga adae ḳorto sae, te tel mishail nireḳ moyda dia ḳamir saṛa ruṭi ba banail ruṭit tel maḳaia loia aibo.
5 Ar ou sodgar ruṭi zudi taoat hedia ana oy, te ita tel mishail ḳamir saṛa nireḳ moyda dia banaia ante oibo.
6 Ania ita ṭukra ṭukra ḳoria er ufre tel ḍalia dite oibo, ita-o dan-gomor eḳ nomunar sodga.
7 Ar ou sodgar ruṭi zudi luaṛir maze bazia ana oy, te ita-o tel ar nireḳ moyda dia banaia anbae.
8 Ola zekunu nomunae banail dan-gomor sodgare Mabudor name ania imamor ato shomzai dibae, imame ita kurbani kanar gese niba.
9 Nia tar ana ou hokkoltar bodla nishana hishabe, imame oḳan taki kisu ongsho algaia kurbani kanar ufre zalailiba. Ita oilo agunit deoa kurbani, er dumar gerane Mabud kushi oin.
10 Ou ongsho zalaia harle bad-baki zeta roibo, ita hoḳolta imam Harun ar tan fuainte faiba. Mabudor name agunit deoa kurbanir ongsho oae, basi zaoa ou sodgar ruṭi to ḳas fobitro zinish.
11 “Ar huno, Mabudor name dan-gomor sodgar niote zotota ana oibo, ita hoḳolta-u zanu ḳamir saṛa tiar ḳora oy. Hushiar roio, tumra Mabudor namor agunit deoa lilla-sodgar malor loge kunu ḳamir ba mou zalaio na.
12 Ta-o ḳetor foyla foy-fosholor sodgar loge tumra mou ba ḳamir Mabudor name ditae farbae, oile dumar geran ala sodgar niote ḳamir ba mou kurbani kanat zalail zaito nae.
13 Kial rakio, tumra dan-gomor sodgar niote zotota banaia anbae, ita hokkoltar maze nun mishaibae. Boni Israilor Allar oada-chuktire mono rakia, tumra hoḳol nomunar dan-gomor sodgat nun dite faurio na. Tumrar hokkol kurbanir maze nun dio.
14 “Tumrar ḳetor foyla daoa dan-gomor kunu foshol zudi Mabudor name lilla-sodga hishabe loia ao, te ita maṛa deoa ḳasa noya dan-gom ba asta soṛare aguindi hedia anbae.
15 Itar ufre tel ar loban-agor dibae, ita oilo eḳ nomunar dan-gomor sodga.
16 Ou sodga loia aile, imam sabe nishana hishabe ou zonor ana dan-gomor sodgar kisu ongsho, kisu tel ar hoḳol agor nia kurbani kanat zalailiba, ita oilo Mabudor name agunit deoa kurbani.