Fobitro Tourat Shorif tisra sifara
Lebian
Forisiti
Ou sifara Hozrot Musa (a:)or ufre nazil oa fobitro Tourat Shorifor tin nombor sifara. I sifarar nam oilo Lebian, mani Lebi kandanor imamoti ar ḳadimdari kamor befare alosona.
Hizrot sifarar shesh rukut ase, Boni Israil zatir manshe Tur faṛor nisor homan zagat fobitro Milon-tambu banaila ar gaṛila. I Milon-tambu asil hou zomanar fobitro Kaba gor. Boni Israil zatir manshe Mishor desh saṛia Nil doria faṛi deoar dui bosor fura oar dino i tambu gaṛa oise.
Lebian sifarat amra deki, hou dinor bade-u Alla Pake Musa (a:) ar tan afon bai Harun (a:)re ou fobitro Milon-tambut gia ebadot ḳorar befare hukum dila. Ḳali Hozrot Harun (a:) ar tan aolad oḳole imam hishabe Milon-tambut ebadoti kam ḳorba. Ar Lebi kandanor bad-baki hoḳole ḳadim hishabe erare shad diba. Imam oḳlor mul ḳam asil, Boni Israil zatir manshor deoa nanan kurbani ar sodga adae ḳora.
I sifarat amra nanan zator kurbani ar sodga oḳlor befare bistarito zantam fari. Ota adae ḳoria gunar shaza taki rehai faoar ar nafaki taki pak-pakiza bonar bebosta ase. Aro zantam fari, Allae nanan zator id ar bishesh fobitro din oḳol ṭik kori disoin, ar halal-haram ḳani, zaiz-nazaiz bia ar Boni Israilor hor-hamesha sola-firar befare-o niom-ḳanun ḳoia disoin. Otar maze boṛo idor nam oilo Koforar Id, i dino Allar rohomote asta Boni Israilor guna ar nafakire dur ḳora oito.
I sifarar mul ḳota oilo, Allae nize fak-fobitro, erlagi tan bonda oḳol-o fak-fobitro oite oibo. Ḳeu zudi gunagar bonia ba nafaki halote Mabudor dorbaro azir oy, te he morizito fare. Oile Alla Pake maya ḳoria kurbanir roḳtodi gunar shaza taki roikka faibar bebosta ḳori disoin, zate ḳori amra tan samne azir oitam fari ar tan ebadot ḳortam fari.
I Lebian sifarar maze namḳora eḳ ayat oilo, “Ari-forire nizor laḳan maya ḳorio” (19 ruku 18 ayat). Hozrot Isa al-Mosie ḳoisoin, Allare mohobbot ḳorar bade i hukum oilo Tourat Shorifor mul talim.
Ermaze ase:
(1) Nanan sodga ar kurbani 1—7 ruku
(2) Imam oḳlor ḳelafoti boail 8—10 ruku
(3) Ebadotor lagi pak-pakiza bona 11—15 ruku
(4) Koforar Id 16—17 ruku
(5) Sal-cholonor lagi zaiz-nazaiz 18—22 ruku
(6) Nanan id ar dusra bishoy 23—25 ruku
(7) Allar hukume solar furuskar 26 ruku
(8) Mannot adae ḳora 27 ruku
1
Zalail kurbani adae ḳorar niom
1 Ou fobitro Kaba gor mani Milon-tambu bananir bade, Mabude Musa nobire ono anaia ḳoila,
2 “Tumi hoḳol Boni Israilre zanai deo, ḳeu zudi kurbani hishabe Mabudor dorbaro kunu foshu dito sae, te goru ba sagol-meṛar fal taki foshu ania kurbani dilauk.
3 “Kurbani deorae zudi gorur fal taki zalail kurbani adae ḳorto sae, te furafur nikut egu bisal ante oibo. Ania Mabudre kushi korar niote ou bisalre Milon-tambur duaror gese loia aibo.
4 Aia zalail kurbanir niote ana ou bisalor ḳollar ufre at toibo, teu tar gunar kofora hishabe iṭare kobul ḳora oibo.
5 Bade Mabudor samne ou bisalre he zobo ḳorbo. Ar imam Harunor ze fuainte imamoti koroin, tara ou bisalor lou nia Milon-tambur duaror samnor kurbani kanar sairo galat siṭai diba.
6 Bade kurbani deorae ou bisalor ḳal ḳalia hari, ogur gust ṭukra ṭukra ḳorba.
7 Ar imam Harunor fuainte kurbani kanar ufre zalail angra toiba, er ufre daru hazaiba.
8 Hazaia ou darur ufre bisalor ḳolla, sorbi, gustor ṭukrain toiba.
9 Kurbani deorae gorur ṭeng ar feṭor bitoror hokkolta fani dia doia saf ḳoria diba, ar imame ota nia asta bisalor hokkolta kurbani kanar ufre zalailiba. Iṭar nam oilo zalail kurbani, Mabudor name agunit deoa kurbani, ou dumar gerane tain kushi oin.
10 “Ar kunu manshe zudi sagol-meṛar fal taki zalail kurbani adae ḳorar kiali oy, te ikṭa furafur nikut egu faṭa oite oibo.
11 Kurbani deorae ikṭare kurbani kanar uttor galat nia Mabudor samne zobo ḳoria harle, imam Harunor ze fuainte imamoti koroin, tara ogur lou nia kurbani kanar sairo galat siṭai diba.
12 Bade kurbani deorae iṭar gust ṭukra ṭukra ḳori kaṭia dile, imam sabe ogur sorbi, ḳolla ar gustor ṭukrain nia kurbani kanar zalail angrar ufror darur ufre hazaiba.
13 Kurbani deorae iṭar ṭeng, feṭor bitoror hokkolta fani dia doia saf ḳoria diba, ar imam sabe ita hokkolta shomet asta foshure kurbani kanar ufre zalailiba. Iṭa oilo zalail kurbani, Mabudor name agunit deoa geran ala kurbani, ou dumar gerane tain kushi oin.
14 “Ar kunu faki dia zudi Mabudor namor ou zalail kurbani adae ḳorar kial oy, te kurbani deorae ḍufi faki ba faro loia aibo.
15 Aile, imame kurbani kanar daro gia ou fakir ḳolla mura maria siṛia algaia hari kurbani kanar ufre ou ḳollare zalailiba, ar ogur lou nia kurbani kanar ek galat siṭai diba.
16 Imame fakir bitoror gila-toli ar foir nia kurbani kanar fub galar salir ṭekir maze falai diba.
17 Ar ogur ḍaḳnat doria ola baṭe siṛiba, zate iṭar dui ṭukra furafur alog na oy. Bade imam sabe iṭa nia kurbani kanar zalail angrar ufror darur ufre toia zalailiba. Iṭa-o oilo zalail kurbani, Mabudor name agunit deoa geran ala kurbani, ou dumar gerane tain kushi oin.