40
Allar gorre ḳaṛa ḳora
1 Mabude Musa nobire ḳoila,
2 “Tumi bosoror foyla sandor foyla tariko Milon-tambu shoho amar gorre ḳaṛa ḳorio.
3 Goror bitre shahadot shondukre haraia, maze forda ṭanaia shondukre aoṛe toio.
4 Ṭebulre-o bitre haraia, er ufror siz oḳol hazaio. Bade serag dani bitre ania tar serag oḳol zalai dio.
5 Shunadi banail agor-kushboy zalanir ṭebul shahadot shondukor samne toio, toia amar goror duaror forda lagaio.
6 Amar goror Milon-tambur duaror samne zalail kurbani kana toio.
7 Kurbani kana ar Milon-tambur mazḳano uzur gamla fanidi boria toio.
8 Bade uṭanor sairo galabae forda ṭanaio, ar uṭanor geiṭo-o forda lagaio.
9 “Bade tumi kelafotir tel dia amar gor ar amar goror hoḳol mal-samanare fobitro ḳorio. Teu ita hoḳolta moha fak-fobitro oibo.
10 Ar zalail kurbani kanar ufre-o ḳelafotir tel dia fobitro ḳorio. Kurbani kanar hoḳol mal-samanare-o fobitro ḳorio. Teu i kurbani kana moha-fobitro siz oibo.
11 Uzur fanir gamla ar er tolor soki-kaṭre-o ḳelafotir tel dia fobitro ḳorio.
12 “Bade Harun ar tar fuainre Milon-tambur duaror samne ania fanidi naoai dio.
13 Naoanir bade Harunre fak-fobitro lebas oḳol findaio, ar amar imam oar lagi tare fobitro tel lagaia ḳelafoti dia fobitro ḳorio.
14 Tar fuaintore ania imamotir fainjabi findaio.
15 Tarar bafre zela fobitro teldi imamoti kamor ḳelafoti diso, tarare-o oula ḳelafoti dio, zate tara-o amar imamoti kam ḳorta faroin. I kelafotir mazdi imamotir ze niom salu oibo, ita oarishor for oarish dori salu roibo.”
16 Mabudor hukum mafik Musae ita hoḳolta ḳorla.
17 Dusra bosoror foyla sandor foyla tariko Allar gor ḳaṛa ḳora oilo.
18 Musae i gor ḳaṛa ḳorla, foyla er kuṭir tolor sungi boaila, kuṭin uba ḳorla, beṛar freim lagaila, freimor bitredi batti dila.
19 Mabudor hukum mafik tain sagolor ruma dia goror foyla sani dila, er ufre dila aro duiṭa sani.
20 Bade hou duioḳan fobitro shahadot fattor ania shondukor bitre haraila. Shonduk boia neoar benda lagaila, shondukor ufror ḍaḳna-o lagaila.
21 Ar shondukre nia Allar goror bitre haraila. Haraia forda ṭanaia shondukre aoṛe raḳla, zela Mabude Musare hukum disla.
22 Shondukor ou fordar bare uttor galabae, Milon-tambur maze fobitro ruṭir ṭebul raḳla.
23 Ṭebulor ufre Mabudor namor fobitro ruṭi hazaia toila, zela Mabude Musare hukum disla.
24 Ṭebulor samne tambur dokkin galat serag dani toila.
25 Bade Mabudor samne serag guin zalaila, zela Mabude Musare hukum disla.
26 Milon-tambur mazḳanor fordar samne shunadi banail agor-kushboy zalanir ṭebul toila.
27 Oḳanor ufre kushboy-ala agor zalaila, zela Mabude Musare hukum disla.
28 Bade Musae duaror forda ṭanaila.
29 Tain Allar goror Milon-tambur duaror ḳandat zalail kurbani kana toila. Toia er ufre zalail foshu kurbani ar dan-gomor sodga dila, zela Mabude Musare hukum disla.
30 Bade Milon-tambu ar kurbani kanar mazḳano uzur gamla toila, toia uzur fani boria dila.
31 Ou fani dia Musa, Harun ar Harunor fuainte uzu ḳorta.
32 Mabudor hukum mafik tara Milon-tambut hamanir age, ba kurbani kanar ḳandat zaoar age uzu ḳorta.
33 Bade Musae Allar gor ar kurbani kanar sairobae forda ṭanaia uṭan banaila. Uṭanor geiṭor forda lagaila. Ou laḳan Musae tan hoḳol ḳam shesh ḳorla.
Allar mohima zair oilo
34 Ḳam shesh ḳoria harle, gaibi megor kuṭi aia ou Milon-tambure gurililo, Mabudor mohima ar kudrote asta gor borigelo.
35 Erlagi Musa ar Milon-tambut hamaita farla na, ḳaron er ufre hou megor kuṭi asil, ar Mabudor kudroti mohimae asta gor bori gesil.
36 Boni Israilor ou asta soforor maze, Allar goror ufre taki megor kuṭi horia harle tara aṭia roana dita.
37 Oile megor kuṭi ufre taki na hora forzonto tara bar oita na, ou kuṭi horar lagi bar saita.
38 Ḳaron Boni Israilor ou asta soforor maze-u, dinor bala tarar sokur samne Allar goror ufre megor kuṭi roito, ar raitor bala roito aguinor kuṭi.