17
Lou ḳaoa ar nazaiz kurbani haram
1 Bade Mabude Musare ḳoila,
2 “Amar ou hukum ḳan tumi imam Harunre, tar fuaintore ar tamam Boni Israilre zanai deo. Tarare ḳo,
3 Boni Israilor ḳeu zudi kunu goru, sagol ba meṛare tarar boshot tambu elaḳat ba kempor bare ze kunu zagat kurbani niote zobo ḳorilae,
4 ou foshure he Mabudor Kaba goror samne, mani Milon-tambur duaror gese Mabudor name kurbanir niote zobo na ḳore, te he ou foshur kunor dayi oibo, erlagi shomaz taki tar nam miṭailibae.
5 Boni Israile oḳon gau-geramor kula zagat zeta foshu kurbani dein, ou foshu zanu tara Mabudor samne Milon-tambur duaror gese ane. Ania imam sabor ato shomzaia salamoti kurbani hishabe ita Mabudor name dilae.
6 Imam sabe foshu zobo ḳoria, Milon-tambur duaror gese Mabudor ze kurbani kana ase, hono ogur lou siṭai diba, ar foshur sorbire tain geran ala kurbani hishabe zalailiba, ou dumar gerane Mabud kushi oin.
7 Ḳobordar! Tara zanu Mabudor loge beimani koria sagolrupi deo-butor name aiz taki ar kunu foshu boli na dey. Ou hukum ami tarar oarishor for oarish dori siroḳalor lagi zari korlam.
8 “Ar tumi tarare zanai deo, Boni Israilor kunu zon ba tarar maze boshot ḳorra kunu bin-deshie zudi zalail kurbani ba zekunu kurbani adae ḳore,
9 ar kurbanir ou foshure Mabudor name shofibar lagi amar Milon-tambur duaror gese na ane, te i zatir maz taki tar nam miṭailito.
10 “Tumi aro zanai deo, kunu Boni Israil ba tarar maze boshot ḳorra kunu bin-deshie zudi kunuzat lou ḳae, te ami Mabude tar ḳeti korat lagizimu, shomaz taki tar nam miṭailimu.
11 Lour maze-u to hoḳol zandaror zan taḳe. Erlagi tumrar zanor bodla kurbanir loure kurbani kanat siṭaia ami tumrar gunar koforar shuzug disi. Lour maze zan ase ḳori-u lour bodla gunar kofora adae oy.
12 Erlagi ami Boni Israilre ḳoiar, tumra ar tumrar loge boshot ḳorra kunu bin-deshie-o zanu lou na ḳae.
13 Boni Israilor zekunu zone ba tumrar loge boshot ḳorra kunu bin-deshi manshe zudi, shikaro gia halal kunu foshu ba faki shikar ḳoria ane, te ogur lou bar ḳoria maṭit gaṛilibae.
14 Zano to, zinda hoḳol zandaror lour maze-u tar zan taḳe. Erlagi ami Boni Israilre ḳoiar, tara zanu kunu zandaror lou na ḳae, lou oilo hoḳol zandaror zan. Ze zone ou lou ḳaibo, tar nam miṭailibae.
15 “Ar kunu manshe zudi mora foshur ba zongli zanuare mara kunu foshur gust ḳailae, te he Boni Israil ouk, ba tarar loge boshot ḳorra bin-deshi ouk, he tar ḳafoṛ-sufoṛ doia dia fanidi naite oibo. Ta-o hainja forzonto he nafak halote roibo, erbade he fak-saf bonbo.
16 Oile he zudi kafoṛ-sufoṛ doia na dey ar fanidi na nae, te i kosurir lagi he dayi roibo.”