16
Koforar Idor niom
1 Imam Harunor boṛo dui fuae naformani koria Mabudor samne foṛia mara gelo ḳori, Mabude Musa nobir loge batchit ḳorla.
2 Mabude ḳoila, “Tumar bai Harunre ḳo, he zanu zebla mone sae ebla shahadot shondukor ḍaḳnar gese zaoar lagi Herem Shorifor fordar bitre na hamae, arnae he morbo-u. Zano to, ou ḍaḳnar ufror dumar andairor maze ami nize azir oi.
3 “Ino hamanir age he zanu gunar koforar kurbanir lagi egu bisal ar zalail kurbanir lagi egu meṛar faṭa loia ino aia hamae.
4 Shada suti kafoṛdi banail fobitro alḳella ar haf-penṭor laḳan zangia findia bitre hamaibo. Tar ḳomro bandar suti kafoṛor bondoni bandibo ar matat suti kafoṛor faugṛi lagaibo. Ita to fak-fobitro lebas, ita lebas findibar age fanidi naite oibo.
5 Gunar koforar kurbanir lagi he Boni Israilor ges taki duiṭa faṭa sagol ar zalail kurbanir lagi egu meṛar faṭa nibo.
6 Imam Harune tar nizor ar tar aolad oḳlor gunar mafir lagi, gunar koforar bisalre kurbani dibo.
7 Bade hou sagol duioṭa Milon-tambur duaror gese Mabudor samne anbo.
8 Ania he loṭari maria deḳbo, kun sagol Mabudor lagi ar kunṭa Azazilor lagi.
9 Loṭarit Mabudor name ze sagol uṭbo, Harune ogudi gunar koforar kurbani adae ḳorbo.
10 Ar Azazilor name ze sagol uṭbo, ogure zita halote Mabudor samne toibo, zate bade ogure morubumit nia Azazilor name auri saṛi deoa oy. Ou nomunae gunar kofora adae ḳorio.
11 “Imam Harune tar nizor ar tar aolad oḳlor gunar koforar lagi, tar nizor ana hou bisalre zobo ḳorbo.
12 Mabudor samne agor-kushboy zalanir ze ṭebul ase ou ṭebul taki kisu zalail angra loia he agor danir maze borbo, ar dui muiṭ agor-kushboyor guṛa-o loibo, bade fordar bitre Herem Shorifo hamaibo.
13 Hamaia ou angrar ufre agor-kushboy dia Mabudor samne zalaibo, teu otar dumae shahadot shondukor ḍaḳnar ufror gala andaire gurizibo, zate he Mabudor samne na moroin.
14 Bade he kurbanir hou bisalor tuṛa lou nia ator anguil dia ou ḍaḳnar samnor galabae siṭai dibo. Erbade angulir maze aro tuṛa lou lagaia ḍaḳnar samnor bae shatbar siṭaia dibo.
15 “Ar he manshor gunar koforar niote ana sagolṭare zobo ḳorbo, ḳoria ogur lou nia fordar bitre Herem Shorifo gia, bisalor loudi zela ḳora oisil, ogur loudi-o ola ḳorte oibo. Shondukor ḍaḳnar ufre ar samne ou lou siṭaite oibo.
16 Boni Israilor guna, nafaki, ar naformanie Herem Shorifre-o nafak korilae, erlagi tarar maze ze Milon-tambu ase, oḳanor nafaki horanir niote imam Harune ou nomunae gunar kofora adae ḳorba.
17 Herem Shorifor bitre hamaia hari Harune tan nizor, tan aolad oḳlor ar asta shomazor gunar koforar hoḳol ḳam shesh ḳoria zotobil na bar oia ain, otobil dusra kunu manush Milon-tambur bitre hamani nished.
18 Herem Shorif taki bar oia Harune Mabudor samne ze agor-kushboy zalanir ṭebul ase ou ṭebulor ḳandat zaiba, zaia ṭebulor lagi-o kofora adae ḳorba. Hou bisal ar sagolor tuṛa lou nia tain ou ṭebulor hingor maze lagaiba.
19 Boni Israilor gunar ḳarone ṭebulor maze ze nafaki lagail oise, hou nafaki horaia ou ṭebulre fobitro ḳorar lagi Harune tar ator anguil dia ou ṭebulor ufre shatbar lou siṭaibo.
20 “Herem Shorif, Milon-tambu, ar kurbani kanar nafaki horanir koforar ḳam shesh ḳoria harle Harune Azazilor name deoar lagi hou zita sagolre loia aiba.
21 Aia ou sagolor ḳollar ufre tar duio at toia, Boni Israilor hoḳol guna-naformani ar bod ḳamor ḳota shikar ḳoria sagolor ḳollar ufre ota bortai dibo. Bade ag taki zuit oa eḳ beṭare dia ou sagolre he morubumit faṭai dibo.
22 Hou beṭae nia ogure morubumit saṛia aibo. Tarar hoḳol naformanire ou sagole loia nirai nirjon morubumit azibon guribo.
23 “Ar Herem Shorifo hamaibar ḳalo Harune shada suti kafoṛor zoto lebas findisla, tain Milon-tambut firia aia ita kulia toi diba.
24 Kulia tain Kaba goror shimanar bitre fanidi naia tan nizor lebas findiba. Bade tain bare aia tan nizor ar manshor lagi egu ḳori zalail kurbani adae ḳoria, tan nizor ar manshor gunar kofora-o adae ḳorba.
25 Gunar koforar kurbanir sorbire tain kurbani kanar ufre zalailiba.
26 Ze beṭae Azazilor namor sagolre morubumit saṛia aibo, he-o tar ḳafoṛ-sufoṛ doia hari fani dia naia bade kempor bitre hamaito farbo.
27 Guna mafir lagi kurbanir ze bisal ar gunar koforar kurbanir ze sagolor loure Herem Shorifo nibar hukum deoa oise, otar hoḳol gust, ḳal, gufor ar hoḳoltare kempor bare nia eḳzone zalailio.
28 Ze zone ita hoḳolta bare nia zalaibo, he-o tar ḳafoṛ-sufoṛ doia, fanidi naia hari bade aia kempor bitre hamaito farbo.
29 “Erbade ami zeta ḳoiram, ita oilo tumrar lagi hor-hameshakur niom. Forteḳ bosoror shat nombor sandor dosh nombor din, tumrar forteḳ zone hoḳol zator ḳam-ḳaz ar ruzi-ruzgar bad dia, noto oia dil shofia dibae. Boni Israil ba tumrar loge boshot ḳorra bin-deshi hoḳol zone ita mante oibo.
30 Ḳaron oudin tumrar guna mafir lagi gunar kofora adae ḳora oibo, teu tumra Mabudor samne hoḳol nomunar guna taki fak-saf oibae.
31 Oudin tumra hoḳol nomunar ḳam-ḳaz bad dia aram ḳorbae, forteḳe noto oia zarzir dil shofia dibae. Iṭa oilo tumrar lagi siroḳalin niom.
32 Zekunu imamre zebla fordan imam hishabe tar bafor zagat ḳelafoti shomzaia boail ḳora oibo, he-o ola shada suti kafoṛor fobitro lebas findia ou nomunae gunar kofora adae ḳorbo.
33 Herem Shorif, fobitro Kaba gor, kurbani kana, baki imam oḳol, ar asta Boni Israil shomazre fak-saf ḳorar lagi kofora adae ḳorbo.
34 Iṭa oilo tumrar lagi hor-hameshakur niom. Forteḳ bosor eḳbar hoḳol Boni Israilor gunar kofora ola adae ḳorte oibo.”
Teu Mabude Musare zela hukum disla, ṭik ou laḳan hoḳolta ḳora oilo.