20
Hozrot Isa dushmonor mukabila oila
1 Ou soforor ḳalo eḳdin Hozrot Isa Baytul-Mukaddosor maze, manshor gese Allai kush-ḳobri toblig korat asla. Aḳta-u boṛo imam ar alim oḳol tarar murobbi oḳolre loia aia ḳoila,
2 “Aichcha ḳo sain, tumi kun ḳemotae ita ḳam ḳorrae, tumare itar eḳtiar ḳegie dise?”
3 Isae zuaf dila, “Te ami-o afnaintore zikairam, ḳoukka sain,
4 Ehia nobie toubar gusol ḳoranir ḳemota faisla, manshor ges taki na Allar ges taki?”
5 Ou tara eḳe-oinne zukti-foramish ḳorlo, “Zudi koi Allar ges taki, te he ḳoibo, taile tan ufre iman anlae na ḳene?
6 Ar zudi koi manshor ges taki, te manshe amrare fattordi marba. Ehiare to tara Allar nobi koia manoin.”
7 Ou tara ḳoilo, “I ḳemota kuai taki faisla, amra zani na.”
8 Isae tarare ḳoila, “Te ami-o ḳoitam nae, kun ḳemotae ita ḳorram.”
Angur bagan bagidaror kichcha
9 Bade Isae manshore ou kichcha hunaila, “Ek giroste anguror bagan ḳorla, bade tan baganre ḳetal oḳlor gese bagi dia bout dinor lagi bidesh gelagi.
10 Angur faḳar shomoy oile malike tan baṭ nibar lagi ek gulamre faṭaila. Oile ḳetal oḳole tare mair-doir ḳoria ḳali ate firai dilo.
11 Bade tain arok gulamre faṭaila. Tara i gulamre-o mair-doir ḳori beijjot ḳoria ḳali ate firai dilo.
12 Bade tin nombor gulamre faṭaile, tara eo gulamre maria zoḳom ḳoria bare falai dilo.
13 Teu baganor malike ḳoila, ‘Ami kita ḳortam? Oḳon ami amar mayar futre faṭaimu, teu tara manto fare.’
14 Oile malikor fuare dekia ḳetal oḳole ḳoilo, ‘Ou fua-u to tar bafor hoḳoltar malik oibo. Ao, ere maria falai dei. Teu malikor hoḳolta amra failimu.’
15 Oḳan ḳoia hari tare baganor bare nia kun ḳorilailo.
“Oḳon ḳoukka sain, baganor malike i bagidar oḳolre kita ḳorba?
16 Tain aia tarare nifat ḳoriliba na ni? Ar tan bagan dusra manshor gese diba na ni?” Ita hunia tara ḳoila, “Nauzubilla! Allae fana deuk!”
17 Teu Isae tarar bae saia ḳoila, “Te Allar kalamo ḳene ila leḳa ase,
Raz mestoir oḳole ze fattorre beḳama ḳoia falai disil,
oḳṭa dia-u goror ian kuṭi oilo.
18 I fattoror ufre ḳeu foṛle, i zon bangia ṭukra ṭukra oizibo, ar i fattoro ḳeuror ufre foṛle, he-o zon surmar oizibo.”
19 Oḳan hunia-u moulana ar boṛo imam oḳole Isare dorilta saila. Tara buzilila, Isae i kichcha tarar niote-u ḳoira. Oile manshore ḍoraia tara kunta ḳorla na.
Bashshar ḳazna deoa zaiz ni
20 Erlagi tara Isare souke souke raḳla, tan ḳore ḳoyzon guia lagaila. Guia oḳole mumini besh doria solle-o, tarar niot oilo Isare ḳotar fando falaita, zate tane deshor fordan hakimor adaloto salan ḳorail zae.
21 Ou guia oḳole Isare ḳoila, “Huzur, afne to hoḳolre homan souke deḳoin. Afne hok mat matoin, hok talim dein. Ḳeurore toakka na ḳoria, manshore Allar hok fot deḳain.
22 Te ḳoukka sain, Ruman bashsha Ḳoisorre ḳazna deoa zaiz ni, na nazaiz?”
23 Isae tarar ku-motlob buzilila. Buzia ḳoila,
24 “Deki, amare eḳṭa dinar deḳao.” Dinar dekia ḳoila, “Igur ufre ḳar sobi ar nam ase?” Tara ḳoila, “Bashsha Ḳoisoror.”
25 Isae ḳoila, “Te Ḳoisororta Ḳoisorre deo, ar Allarta Allare deo.”
26 Tan zuaf hunia tara taijjub bonia nirai oigela. Guia oḳole manshor samne tanre ḳotar fando falaito farlo na.
Aḳerator befare prosno
27 Bade Siddekia mozobor kisu manush Isar gese aila. Ou mozobor manshe mono ḳoroin, morar bade kunu zandar-u ar zinda oita nae.
28 Tara Isare zikaila, “Huzur, Musa nobie amrar lagi ou niom lekia gesoin, kunu manshe tar bou toia niaoladi halote morigele, tar baie ou boure bia ḳoria mora bair oarish foyda ḳorbo.
29 Oḳon mono ḳoroukka, ek goro shat bai asil. Foyla zone bia ḳoria niaoladi halote morigelo.
30-31 Bade dui nombor ar tin nombor baie ou beṭire bia ḳorlo. Ou laḳan tara shato baie-u ou beṭire bia ḳoria niaoladi halote morigelo.
32 Heshe ou beṭi-o morigelo.
33 Te kiamotor din i beṭi kar bou oibo? Shato zone-u to i beṭire bia ḳorsil.”
34 Isae ḳoila, “I duniar manshe bia-shadi koroin, ar bia-shadi dein.
35 Oile moutor bade zinda oia zera aḳerato kamiabir laḳ oizae, tara ar bia-shadi korta nae, ba bia-shadi boita-o nae.
36 Tarar kunu mout-o oito nae, tara firistar laḳan oiziba. Moutor bade aḳer faoae tara Alla Pakor aolad boniziba.
37 Tur faṛor zalail zonglar boyanir maze Musa nobie buzaisoin, murda oḳol to zinda oia uṭoin, erlagi-u bout age ze nobi oḳol mara gesoin Musae Mabudre hou nobi oḳlor Alla ḳoia ḍakila. Tain Mabudre ḳoila, Ibrahimor Alla, Isʼhakor Alla ar Iakubor Alla.
38 Te Alla to murda oḳlor Alla nae, tain zinda oḳlor Alla. Tan nozoro hokkol manush-u zinda asoin.”
39 Teu ḳoyzon alime ḳoila, “Huzur, afne to ḳaṭi mat matsoin.”
40 Heshe tara Isare ar kunu soal ḳorar shaosh failo na.
Alim oḳolre hedayot
41 Ermaze Isae ou alim oḳolre zikaila, “Manshe ḳene al-Mosire Daud nobir aolad ḳoin?
42-43 Zobur Shorifor maze Daude nize-u to oḳan ḳoira,
Mabude amar munibre ḳoila,
zotodin tumar dushmon oḳolre
tumar faor tole na falai,
otodin tumi amar ḍain galat boiro.
44 Daude to al-Mosire tan munib ḳoia ḍakila, te al-Mosi kemne Daudor aolad oiba?”
45 Manshe Isar boyan hunra, ou shomoy tain shagrid oḳolre ḳoila,
46 “Alim oḳlor befare hushiar o. Tara lamba lamba zubba findia gurite kub bala fain. Bazar-aṭo gia salam faite fosond ḳoroin. Mosido gia samnor ḳataro boite ar mozliso gia dami zagat boite fosond ḳoroin.
47 Tara manshore deḳanir lagi lamba lamba dua ḳoroin. Hirbar ṛaṛi beṭintor gor-baṛi doḳol ḳoroin. Kiamotor din erar boṛo ḳoṭin shaza oibo.”