20
Laṛai-zuddo ḳorar niom-ḳanun
1 “Tumrar dushmonor loge laṛai korat gia zudi deḳo, tarar guṛa, guṛar gaṛi, tarar sifai tumra taki beshi, te ḍoraio na. Zano to, tumrar Mabud Alla, zein tumrare Mishor desh taki bar ḳoria anchoin, tain nize tumrar loge asoin.
2 Laṛair niote baronir age imam sabe aia sifai oḳolre ḳoiba,
3 O Boni Israil, huno, tumra aiz tumrar dushmonor loge laṛai korat zairae, oḳon tumrar monre ḳomzur banaio na, ḍoraio na, ḍoraia nirash oio na, dushmonor ḍore ḳafio na.
4 Dushmonor loge laṛait zitanir lagi, tumrar Mabud Alla to tumrar loge oia zaira.
5 “Bade tarar ofisar oḳol aia sifai oḳolre zikaiba, tumrar maze ila kunu sifai ase ni, zegue noya gor banaia hari, ou goro boshot ḳorar lagi duar onusṭan baki raḳse? Te tumi nizor baṛit zaogi, arnae laṛait gia morigele dusra manush aia ou onusṭan ḳorilaibo.
6 Ar kunu sifai ase ni, zegue anguror bagan ḳoria foylakur fol na ḳaia laṛait aise? Te tumi-o baṛit zaogi, arnae laṛait gia morigele dusra manshe aia tumar baganor fol ḳailibo.
7 Ar tumra ḳeuror aḳt ḳoria hari bashor rait baki roise ni? Te tumi-o baṛit zaogi, arnae laṛait gia morigele dusra beṭae aia ou ḳoinare bia ḳorilibo.
8 Ou ofisar oḳole aro zikaiba, tumrar maze ila kunu sifai ase ni, zegur zano ḍor ḳorer, mone ḳafer? Te tumi-o tumar baṛit zaogi, arnae tumare dekia logor sifai oḳol-o ḳomzur oiziba.
9 Ou nomunae ofisar oḳlor zikani shesh oile, tara sifai dol oḳlor ufre kamanḍar boail ḳorba.
10 “Tumra kunu gau ba ṭaunor loge laṛai korar niote zebla hou zagar daro zaibae, gia honor manshor gese ḳobria faṭaia ḳoio, tara zanu afushe tumrar tabedari manilain.
11 Tara zudi razi oia ṭauno hamanir geiṭ kulia dilain, te tara hoḳol tumrar raiot bonia ḳazna diba ar tumrar gulami korba.
12 Ar razi na oia laṛai korto saile, tumra ou ṭaunre beria rakio.
13 Bade tumrar Mabud Allae hou zagare tumrar ato shofia harle, tumra hoḳol beṭaintore zane marilio.
14 Oile honor beṭi manush, huruttain, foshur fal ar hou zagar hokkolta gonimotor mal hishabe tumra nitae farbae. Dushmonor zomin taki gonimotor mal hishabe tumrar Mabud Allae tumrare zotota dan ḳorba, ita tumra bug-doḳol ḳortae farbae.
15 Zeta ṭaun oḳol tumrar desh taki bakka duroi ar tumrar ḳanda-ḳasar zati oḳlor ṭaun nae, ota ṭaunor manshor loge ou laḳan bebohar ḳorio.
16 “Oile tumrar ḳanda-ḳasar zeta zati oḳolre tumrar Mabud Allae tumrar ato dira, ita kunugure-u zinda rakio na.
17 Tumra nizor Mabud Allar hukum mafik, Hiṭṭi, Amuri, Kenani, Farizi, Hibbi ar Zibuzi oḳolre furafur nifat ḳorbae.
18 Arnae tara nizor deb-debire puja ḳorar bala zoto zogoinno naformani koroin, tarar ota tumra-o hikibae, hikia nizor Mabud Allar dorbaro gunar ḳam ḳorbae.
19 “Kunu gau ba ṭaunor loge laṛait gia tumra zebla bout lamba shomoy dori beria raḳo, ou shomoy honor foldar kunuzat gas-fala kuṛaldi kaṭio na. Tumra itar fol ḳaio, oile gas ḳaṭio na. Gas-gasali to tumrar dushmon nae zen otare hamla ḳortae.
20 Ta-o zeta gas kunu fol-foladir gas nae, ita ḳaṭia honor bashinda oḳolre laṛait aranir ag forzonto, ota dia atiar banaia hamla ḳortae farbae.