19
Kuni oḳlor asroy ṭaun
1 Musa nobie tarare aro ḳoila, “Tumrar Mabud Allae zeta deshor doḳoldari dira, honor bashinda oḳolre tain binash ḳoria harle, tumra zebla tarar baṛi-gor ar ṭauno hamaia boshot ḳorbae,
2-3 hou shomoy tumrar Mabud Allar deoa ou zominre tin baṭe baṭio, ar eḳṭa eḳṭa ḳori muṭ tinṭa ṭaunre fosond ḳoria alog korio, ar ota ṭauno zaibar lagi rasta zuit-zait rakio. Teu tumrar mazor ḳeu zudi onichchae ḳeurore kun ḳorilae, te ou nomunar kuni bagia gia hou ṭauno bonobashi oia asroy loibo.
4 “Monor maze kunuzat ingsha-dushmoni saṛa ichcha na ḳoria aḳta zudi eḳzone aroḳzonre kun ḳorilae, te zan basanir lagi ou kuni bagia gia tar ḳanda-ḳasar bonobashi ṭauno asroy loibo.
5 Mono ḳoro, eḳzon manush dusra zonor log oia zongolo laḳṛi kaṭat gelo, gia kuṛaldi gas ḳaṭibar bala aḳta-u kuṛalor asaṛi taki kuṛal suṭia, dusra zonor gotro lagia he morigelo, ou halote kuni gia tar ḳanda-ḳasar asroy ṭauno zan basanir shuzug faibo.
6 Arnae kunor bodla lourae gusa ḳoria bodla loibar niote ou manshore dorto saibo, ar zan basanir asroy ṭaun daro na roile tare doria marilto fare. Ashole to hi beṭae ichcha ḳoria kun ḳorse na, he shaza faibar ḳota nae.
7 Erlagi ami tumrare hukum diram, tumrar lagi tinṭa asroy ṭaun alog kori rakio.
8 “Tumrar Mabud Allae tumrar baf-dadar loge ḳosom mafik zaga baṛaia zebla tumrare asta deshor malikana diba,
9 ou shomoy tumra aro tinḳan asroy ṭaun alog kori raḳbae. Ḳali aiz ami tumrare zeta hukum disi tumra zudi kub kiali oia ita mania solo ar zudi hor-hamesha Allare mohobbot ḳoro ar tan fote solo, te tain nichchoy tumrare asta deshor malikana diba-u.
10 Ou asroy ṭaun raḳar ḳaron oilo, tumrar Mabud Allae tumrare ze deshor malikana dira, hou zomino zanu kunu ni-oforadir lou na foṛe, ar tumra kunuzat kunor dayi na o.
11 “Oile ḳeu zudi rag-gusa, ingsha ḳoria aroḳzonre kun ḳorar niote ut fatia roy, bade hamla ḳoria kun ḳorilae, ar ou kuni gia kunu asroy ṭauno hamai zae,
12 te tar gau ba ṭaunor murobbi-salish oḳole, manush faṭaia tare dorai ania, ogure marilaoar lagi kunor bodla lourar ato shofi diba.
13 Ou kunire tumra kunu doya-maya ḳorio na. Tumra Boni Israilor maz taki ni-oforadire kunor dae-bar fusia falaio, teu tumrar balai oibo.
Zominor shimana kuṭi
14 “Tumrar Mabud Allae tumrare ze deshor doḳoldari dira, hou deshor zominor furan amolo gaṛa ari-forir kunu shimana kuṭi unnoish-bish ḳorio na.
Bisaror shakki formanor niom-ḳanun
15 “Ḳeuror befare kunuzat guna ba oforador nalish aile, te ḳali eḳzonor shakki hunia ray dio na, dui ba tin zonor shakki forman loia bisar-salishor ray dio.
16 “Kunu manshe zudi aroḳzonor ḳeti korar niote kunu nalish dey,
17 te ou badi ar bibadi duio fokko hou amolor hakim ar imam sab oḳlor gese gia Mabudor samne azir oiba.
18 Bade salish oḳole kub kial ḳoria itar tallash ḳorba, tallashi kalo zudi dora foṛe he tar afon zatir bair befare misa nalish dise,
19 te ou nalish dia he hou zonor zeta ḳeti korto saisil, tumra ogur oula ḳeti korio. Ou nomunae tumra nizor shomaz taki naformanire fusia falaio.
20 Ita hunia baki hoḳol Boni Israile ḍoraiba, teu ila ḳam ar ḳeu ḳorto nae.
21 Ila oforadire tumra kunu laḳan doya-maya ḳorio na, zanor bodla zan, souḳor bodla souk, dator bodla dat, ator bodla at, faor bodla fao adae ḳorio.