18
Imam sab ar Lebi kandanor boron-fushon
1 “Lebi kandanor imam oḳole ar asta Lebi kandanor manshe, Boni Israilor aro ḳandanor laḳan kunu zomi-mirash ba don-samana faita nae. Mabudor name deoa hoḳol zator kurbanir gust ar hoḳol lilla-sodgar baṭo tara ḳaiba.
2 Tara nizor Boni Israilor zatir baiaintor laḳan kunu zomi-mirash faita nae. Shoyong Alla Mabud-u tarar mirash, tain nize-o tarare i oada disoin.
3 “Manshe zoto goru-sagol kurbani diba, itar ḳandor gust, duio gal ar feṭor bitoror hokkolta imam sabre dibae, ita tan faona.
4 Tumrar ḳetor foyla foshol, baganor angur taki banail foyla shorbot ar zoytun taki banail telor foyla ongsho, sagol-meṛar foyla bar ḳaṭa ruma imam sabre dibae.
5 Zano to, tumrar Mabud Allae tumrar hoḳol ḳandanor maz taki Lebi kandanre fosond ḳoria alog korsoin, zate tara hor-hamesha Mabudor ebadot-bondegir ḳamo roin.
6 “Ar Israil deshor zekunu ṭaun taki Lebi kandanor kunu aolad zudi Mabudor ashik bonia Mabudor fosond ḳora zagat ae,
7 te he-o tar ḳandanor baiaintor laḳan Alla Mabudor dorbaro ebadot-bondegir ḳam ḳorbo.
8 Baki imam oḳlor laḳan he-o tar ḳana-finar baṭ faibo, erloge tar mouroshi samana besar ṭeḳa-foysha-o faibo.
Zadu-montro taki fobitro roa
9 “Tumrar Mabud Allae tumrare ze desh dira, hou deshor bashinda oḳole zela zogoinno naformani koroin, tumra ita hikio na.
10 Tumrar maze zanu ila kunu manush na mile, zegue tar nizor aoladre agunit falaia boli dey, tabzati montro foṛe, gona-basa ḳore, zadu-ṭuna ḳore,
11 zegue tontro-montro salae, zin-but-ferot shadon ḳore ar murdar ruhdi azirat ḳore.
12 Ita naformani kam zegue ḳore, Mabude tare gin ḳoroin. Ota ḳam ḳorae Mabude hou zati oḳolre, tumrar samne taki kedai dira.
13 Erlagi tumra nizor Mabud Allar samne nirdushi roio.”
Hozrot Musa (a:)or laḳan eḳ nobi
14 Hozrot Musae aro ḳoila, “Mono rakio, tumra zeta zati oḳolre ḳedaia dirae, ita to zadugir ar gonoḳ oḳlor ḳotae sole, oile tumrar Mabud Allae tumrar lagi ita nished ḳorsoin.
15 Tumrar Mabud Allae tumrar shomaz taki, tumrar baiaintor maz taki, amar laḳan eḳzon nobi faṭaiba, tumra hoḳol en hukume solte oibo.
16 Hou Tur faṛor daro tumra hoḳol ze din Mabudor samne azir oislae, hou din to tumra Alla Mabudor gese mangia ḳoislae, amra ar Alla Mabudor mukor aoaz huntam sai na, tan nuror aguino ar deḳtam sai na, arnae amra morizimu.
17 “Teu Mabude amare ḳoila, tara ṭik mat-u matisoin.
18 Ami tarar lagi tarar nizor baiain taki tumar laḳan eḳzon nobi faṭaimu, en muko amar kalam shorif dimu, ar ami enre zeta zeta hikai dimu, ein tumrare ota zanaiba.
19 Ar amar nam loia tain amar kalam oḳol bataiba, na-manra oḳolre ami dayi kormu.
20 Oile ami zeta ḳoisi na kunu nobie zudi bod shaosh ḳori amar name ila kunu kalam batae, ba kunu deb-debir nam loia ilaḳan mat mate, te he morte-u oibo.
21 “Oḳon kunu buli hunar bade tumrar monor maze sinta aito fare, ikan Mabude bataisoin ki na, kila buzmu?
22 Erlagi huno, Mabudor nam loia kunu nobie kunta ḳoar bade zudi ita na fole, ba ola na goṭe, te buzilio ikan Mabudor ḳota nae. Hou nobie tar bod shaoshe ita ḳoise, ilaḳan zonre tumra ḍoraio na.”