17
1 Hozrot Musae aro ḳoila, “Ar tumrar Mabud Allar name ilaḳan kunu goru-sagolre kurbani dio na, zetar gotro kut ase, tain to kut ala kurbanire gin ḳoroin.
2 “Tumrar Mabud Allae tumrare ze gau ar ṭaun oḳol dan ḳorba, ou zagat zudi ilaḳan kunu beṭa ba beṭi mile, zegue tumrar Mabud Allar oada-chuktir ulṭa gia tain zeta ḳam gin ḳoroin ota ḳam ḳore,
3 ogue zudi Alla saṛa dusra kunu deb-debir puja ḳore, sand, shuruz, terar puja ḳore,
4 ar ita tumrare zanail oy, te tumra kub shabdane tallash ḳoria dekio ita hasa na misa. Hasa oile Boni Israilor bitre ila lannoti kam ḳorae,
5 hou beṭa ba beṭire shaza dio. Ogure doria gau ba ṭaunor fainchaiti boiṭok kanat anio, ania fattor maria marilio.
6 Oile morar zuka oforad formanor lagi dui ba tin zonor shakki lagbo, eḳla eḳ zonor shakkie mara zaito nae.
7 Tare marar bala foyla shakki oḳole fattor marba, bade hoḳol manshe marba. Ou nomunae tumrar shomazor bitor taki olaḳan naformanire ḳedaibae.
Ḳoṭin bisar-salishor foysala
8 “Tumrar gese zudi ilaḳan ḳoṭin kunu nalish ae, zetar bisar ḳorar ḳemota tumrar adalotor nai, te ita loia Alla Mabudor fosond ḳora zagat zaio. Dorilao, kunu kun-ḳarafi, maramari, zobor-doḳoldarir forman-todontor bisar-asar.
9 Gia Lebi kandanor imam oḳol ar hou amolor fordan hakim sabor dorbaro nalish hunaio, hunaile tara tumrare bisaror ray batai diba.
10 Ar Mabudor fosond ḳora zagat tara ze ray zanaiba, ou rayor mormo buzia tumra ḳam ḳorbae, tara zeta hikai diba, kub kial ḳoria ita manio.
11 Allai shoriotor hukumor befare tara zela talim diba, tara zelaḳan bisaror ray diba, otar mormo buzia tumra ḳam ḳorio, tarar ḳota taki unnish-bish kichchu ḳorio na.
12 Kunu manshe beṭagiri deḳaia zudi hou hakimor ray na mane, ba Alla Mabudor ḳadim ou imam sabor hukum na mane, te tare nichchit zane marilio. Boni Israilor bitre taki ou nomunae naformani kedaio.
13 Teu ita hunia hoḳol manshe ḍoraiba, tara ar beṭagiri deḳanir shaosh faita nae.
Raza-bashshar lagi niom-ḳanun
14 “Tumrar Mabud Allae tumrare ze deshor doḳoldari dira, hono gia boshot ḳoria harle tumra ḳoibae, ao, amrar ash-fashor zati oḳlor laḳan amrar nizor zatir lagi-o eḳzon bashsha banai.
15 Hou shomoy tumrar Mabud Allae zare fosond ḳorba, tare-u tumrar bashsha banaio. He zanu tumrar nizor zatir bai oy, kunu bin zatir manshore tumrar bashsha banaio na.
16 I bashshae tar nizor lagi bout guṛa zanu na zomae, guṛa zuganir niote he zanu Boni Israilor manshore Mishor desho na faṭae. Mono rakio, Mabude age hukum disoin, tumra ar kunudin hi fotedi zaio na.
17 I bashshae zanu bout bia-shadi na ḳore, arnae tar dil be-fote zaibogi. He zanu nizor lagi besh ḳori shuna-rufa na zomae.
18 “Tare raz-godit boanir ḳalo Lebi kandanor imam sab oḳlor gese ze Tourat Kitab taḳbo, ou kitabor aro ek kofi lekia tar nizor lagi nite oibo.
19 Ikan tar nizor gese roibo, tar dilo Alla Mabudor ḍor-ḳof raḳar lagi ou Tourat ar er bitoror hoḳol hukum-ahkam furafur mania solar niote, he zindegibor ou kitab tilaot ḳorbo.
20 Teu tar zatir baiain taki nizore boṛo mono ḳorto nae, he Tourator hukum-ahkamor unnish-bish ḳorto nae. Teu he ar tar aolad oḳlor godi stayi oibo, tara bout din Boni Israilor ufre bashshai korba.