16
Azadi Idor niom-ḳanun
1 “O Boni Israil, Abib mashor sando tumra Mabud Allar name Azadi Id adae ḳorio. Ḳaron ou sandor eḳdin tumrar Mabud Allae raitkur bala Mishor desh taki tumrare bar ḳoria anchoin.
2 Tumrar Mabud Allae nizor Baytulla Shorif hishabe ze zagare fosond ḳorba, ou zagat tumra tan name goru-sagolor fal taki foshu nia Azadi Idor kurbani dio.
3 Kurbanir foshur gust tumra ḳamir ala nan ruṭidi kaio na. Mishor desh taki taṛa-uṛa ḳori zemne ḳamir saṛa halote bar oia aislae, oḳon tumra Mishor deshor duḳ-mosibotor ḳota iad ḳorar lagi fura shat din tumra ola ḳamir saṛa ruṭi kaio. Hou dinre hara zindegibor mono raḳar lagi tumra ola ḳorio.
4 Ou shato din tumrar kunu zagat zanu ḳamir ala kunuzat ḳani na mile. Foyla din hainja bala ze foshu kurbani dibae, itar gust zanu fozoror shomoy forzonto na roy.
5 “Tumrar Mabud Allae tumrare ze ṭaun oḳol dan ḳorba, ita kunu ṭaunor maze tumra Azadi Idor kurbani dio na.
6 Ḳali Baytulla Shorif hishabe tain ze zagare fosond ḳorba, hou zagat kurbani dio. Sandor ze tariko tumra Mishor desh taki bar oia aislae, forteḳ bosor ou tarikor hainja bala tumra Azadi Idor foshu kurbani dio.
7 Tumrar Mabud Allar fosond ḳora zagat kurbanir gust randia ḳaio. Bade bian oile zarzir goro firia zaio.
8 Fura soy din tumra ḳamir saṛa ruṭi kaio, ar shat nombor din tumra Alla Mabudor name milon-mahfil ḳorio, ou din kunuzat ḳam-ḳaz ḳorio na.
Fonchaisha Idor niom-ḳanun
9 “Ḳetor foshol ḳaṭat foyla ḳasi laganir din taki tumra shat hafta gona shuru ḳorio.
10 Bade tumrar Mabud Allar rohom-borkote zoto foshol faiso, ota taki nize kush oia lilla dia tan name Fonchaisha Id adae ḳorio.
11 Tumrar Mabud Allae Baytulla Shorif hishabe ze zagare fosond ḳorba, tumra hou zagat tan samne tumrar fua-fuṛin, gulam-bandi, tumrar loge boshot ḳorra Lebi kandanor manush, bin-deshi oḳol, etim huruttain ar ṛaṛi beṭin, hokkole milia idor kushi-bashi korio.
12 Tumra mono rakio, age tumra Mishor desho gulam aslae, te kub kiali oia ou niom-ḳanun adae ḳorio.
Ḍera-goror Idor niom-ḳanun
13 “Tumrar ḳetor foshol ar angur maṛar zaga taki hoḳolta ugaro tulia harle, fura shat din tumra Ḍera-goror Id adae ḳorio.
14 Idor ḳalo tumrar fua-fuṛin, gulam-bandi, tumrar loge boshot ḳorra Lebi kandanor manush, bin-deshi musafir, etim huruttain ar ṛaṛi beṭin hoḳole milia kushi-bashi korio.
15 Mabudor fosond ḳora zagat gia Alla Mabudor name fura shat din tumra ou id adae ḳorio. Mabude to tumrar hoḳol zator fosholor maze, tumrar hoḳol ḳam-ḳazo rohom-borkot disoin, erlagi tumra hoḳole kushi-bashi korbae.
16 “Tumrar mazor hoḳol beṭainte tumrar Mabud Allar fosond ḳora zagat gia bosoro tin bar tan didaro azir oio. Ḳamir Saṛa Ruṭir Id, Fonchaisha Id, Ḍera-goror Id, ou tino idor ḳalo azir oio. Kial rakio, ḳeu zanu ḳali ate Mabudor samne na ae.
17 Tumrar Mabud Allae zare ze laḳan rohom-borkot disoin, ou hishabe nizor tofik anman forteḳ zone Mabud Allar name lilla dio.
Hakim-salishor dayitto
18 “Tumrar Mabud Allae tumrare zeta ṭaun oḳol dan ḳorra, ita hoḳol ṭauno tumrar hoḳol ḳandan taki hakim-salish ar ofisar boail ḳorio. Era hok bisar-salish ḳorba.
19 Tumra hok bisar taki loṛio na, ḳeuror muk saia mosolmani korio na. Gush ḳaio na, gushe to aḳoldaror soukre-o anda banailae, ar forezgaror mukor zoban-o bodlailae.
20 Hoḳol nomunae zeṭa shoṭik, tumra ḳali ou fote solio. Teu tumrar Mabud Allae tumrare ze desh dan ḳorra, ota doḳol ḳoria lamba hayati faibae.”
Allar nished ḳora puja-ebadot
21 Hozrot Musae aro ḳoila, “Tumrar Mabud Allar name tumra ze kurbani kana banaibae, er ḳanda-ḳasat laḳṛidi banail Ashera-debir kunu nishana kuṭi toio na.
22 Pujar niote fattoror kunu kuṭi gaṛio na, ḳaron tumrar Mabud Allae itare gin ḳoroin.”