13
Bonḍo pir-dorbesh ar murti pujaḳarir bisar
1 “Oḳon tumrar mazor kunu pir-dorbeshe ba isteḳana ḳorrae kunta goṭibo ḳoia zudi agam ḳobor zanae, ar kunu keramotir ḳota ḳoy,
2 ḳoar bade hasau zudi ola foli zae, ar ou zone-u kunu deb-debir ḳota hunaia tumrare ḳoy, solo, amra gia hou devtar puja ḳori,
3 te tumra ou pir-dorbesh ba isteḳana ḳorrar ḳota manio na. Mono rakio, tumra zane-forane tumrar Mabud Allare mohobbot ḳorrae ki na, ouḳan zasai korar lagi tumrar Mabud Allae tumrare forikka ḳoroin.
4 Tumra nizor Mabud Allar hukum mafik solio, ḳali tanre-u ḍoraio, tan hukum-ahkam manio, tan kalam hunia amol ḳorio, tan ebadot-bondegi korio, ar tan ashik bonia roio.
5 Erlagi hou bonḍo pir-dorbesh ba isteḳana ḳorrare zane marilaio. Mono rakio, tumrar ze Alla Mabude tumrare Mishor desh taki bar ḳoria anchoin, gulami taki tumrare azad ḳorsoin, ou bonḍoe to tumrare hou Mabudor birudde naformanir lagi ṭaner, tumrar Mabud Allar batail fot taki be-foti banaito sar. Erlagi tumrar maz taki ou ḳarafire binash ḳorilaibae.
6 “Oḳon tumrar afon bai, tumrar nizor fua ba fuṛi, tumrar zanor ṭukra bou, ba tumrar mayar bondu aia zudi niralae ḳoy, ‘Solo, amra gia deb-debir bozona ḳori.’ Ita devtain tumar ba tumar baf-dadar osina,
7 tumar ash-fash elaḳar ba duroir deshor kunu devta ouk, duniar eḳ shimana taki areḳ shimanar zekunu zatir zekunu devta ouk,
8 he zudi tumare hono nito sae, te tumi zaio na, tar ḳota hunio na, tare doya deḳaio na, tar zan basaio na, ar lukanir zaga dio na.
9 Tare nichchit zane marilaio. Zane marilaoar lagi foyla tumar nizor atdi shuru ḳoro, bade hoḳole aia shorik oiba.
10 Ogure fattordi iṭaia zane marilio, he to tumare hou Alla Mabudor ebadoti taki horaia ku-fote nito sar, zein tumare Mishor deshor gulami taki azad ḳoria anchoin.
11 Ogure marilaoar ḳobor hunia hoḳol Boni Israile ḍoraiba, erbade ila naformani korar shaosh ar ḳeuror oito nae.
12 “Tumrar Mabud Allae tumrar boshot ḳanar lagi ze gau ar ṭaun oḳol dan ḳorra, ita kunu zagar befare tumra zudi huno,
13 honor Boni Israilor mazor kunu naformanor dol bar oia, hou zagar manshore be-fote nibar lagi kor, solo, amra gia noya noya deb-debir puja ḳori.
14 Te tumra kub balamonte kuz-ḳobor loio ar todonto ḳorio. Todonto ḳoria zudi ita zogoinno ḳamor forman mile,
15 te honor hoḳol bashindare zane marilio. Hou gau ba ṭaunor hoḳol manush ar foshu-fongkire toluardi kaṭilio.
16 Hin taki ana hoḳol mal-samana ṭaunor moydano nia zalailio. Hou asta gaure ba ṭaunre-o zalail kurbanir laḳan zalaia sali korio. Hou zagare siroḳalor lagi binash ḳorio, ḳeu zanu kunudin hino kunta banaito na fare.
17 Mabudor bezuita gusa taki rehai faoar lagi, honor kunu mal-samana zanu tumrar gese na roy, ita to lannoti mal. Teu Mabude tumrare rohom-borkot ar doya-maya ḳorba, tumrar baf-dadar logor oada mafik tain tumrar aolad-oarish baṛaiba.
18 Ḳali aiz ami tumrare zeta hukum-ahkam zanaiar, ota hoḳolta manio, Alla Mabudor kushi mafik solia tumrar zindegi kaṭaio.