4
सोलोमन शुलामीथ नु लोव़ पशो
1 आं दाक्शो मीश आल, गे दारशो बाक्नेवे। गे थाम्पा दारशो बाक्नेवे। इ मिक्च इ सुम्तीके आगाम ख्रुइश्शो ढुकुर आ मिक्च खोदेंशो बाक्ब। इ चां गिलाद डांडा रे पा ब्रुप्शो क्यारश आन हुल खोदेंशो बाक्ब।
2 इ ख्रुइ चां प्रेक्शा चिक्शो भेडा आन हुल खोदेंशो बाक्ब। मेको नेल्ल आन के जौंले पाठा बाक्ब। नेल्ल मोदेंशो बाक्नीम। ठेयब कुम्सो ६:५-६
3 इ शुंइच लल डोरी खोदेंशो बाक्ब। इ शोव़ थम दारशो बाक्ब। इ सुम्तीके आगाम इ चोव़चो चेश्शो दारीम खोदेंशो बाक्नीस। ठेयब कुम्सो ६:७
4 इ शुर दाऊद आ लाइश्शो खिं खोदेंशो बाक्ब। मेकेर हजार का तेक्तीक क्युक्शो बाक्नीम। मेको नेल्ल लडाइ पाइब आन तेक्तीक बाक्नीम।
5 इ दूध निक्शी क्यारश पाठा खोदेंशो बाक्नीस। मेको लिली फू आन दातेमी जोइब किश्श आ जौंले पाठा खोदेंशो बाक्नीस। ठेयब कुम्सो ७:३
6 ग्यू दुम्चा नु वांकु जाम्शा लचा क्येङा ङोंइती, गो ब्रोव़शो रिना पाइब डांडा नु धूप बाक्शो डांडा लाइनुङ। ठेयब कुम्सो २:१७
7 आं दाक्शो मीश आल गे नेल्लेम दारशो बाक्नेवे। इ के मारेइ मरिम्शो मबाक्ब।
आं दारशो मीश आल, आं ग्युम्ली!
8 आं ग्युम्ली, लेबानोन रे पा गो नु गाक्को। लेबानोन रे पा गाक्को। आमाना डांडा रे पा यीवो। सेनीर आ ङर नु हेरमोन डांडा रे पा गाक्को। गुप्स आन पुक्खी नु जोइ आन बाक्तीक डांडा रे पा गाक्को।
9 ए आं समी, आं ग्युम्ली, गे आं कली कोव़शा, आं थुं खुइ पाप्तीवी। इ माला के गेडा कामीन आं थुं खुइ पाप्तीवी।
10 ए, आं समी, आं ग्युम्ली इ दाक्तीक थम रिम्शो बाक्ब। तेकोइ अङगुर शांबु क्येङा यो, इ दाक्तीक रिम्शो बाक्ब। मस्ला नेल्ल आन क्येङा इ ख्रेक्तीक ब्रोव़शो रिना पाइश्शो बाक्ब।
11 इ शोव़ रे फू आ रस खोदेंशो याप्ब। ए आं ग्युम्ली, इ लें आगाम दूध नु खुदो बाक्ब। इ वा ङा ब्रोव़शो रिना लेबानोन ङा रिना खोदेंशो बाक्ब।
12 ए आं समी, आं ग्युम्ली, गे चोक्शा वोइश्शो रू नु सुशा वोइश्शो ब्वाक्कु बुक्तीक खोदेंशो बाक्नेवे।
13 इ रू दारीम रू खोदेंशो बाक्ब। मेकेर नेल्ल क्येङा रिम्शो फल फुल बाक्नीम। हेन्ना बुटा नु ब्रोव़शो रिना पाइब तेल बाक्नीम।
14 ब्रोव़शो रिना पाइब तेल, हाव सुप्तीके, सुप्तीक बोट, सिन्कौली, शुश खाल ङा ब्रोव़शो रिना पाइश्शो धूप रवा, मूरे, ब्रोव़शो रिना पाइश्शो शी के रवा नु नेल्ल खाल ङा ब्रोव़शो रिना पाइश्शो मस्ला बाक्नीम।
15 मेको रू ङा ब्वाक्कु बुक्तीक ब्रोव़शो ब्वाक्कु बुक्तीक बाक्ब। मिनु लेबानोन रे पा शाइश्शो खोला बाक्नीम।
16 उत्तर ङा फश, बोक्को। ए दक्खिन ङा फश, कुवो। आं रूमी फश पावो। मेको आ ब्रोव़शो रिना ङोन सम्म जाक्दील्ल। आं दाक्शो वोंइश मुर आ रूमी जाक्ल। मिनु मेकेर ङा नेल्ल क्येङा ब्रोव़शो फल जवल।