5
1 ए आं समी, आं ग्युम्ली, गो आं फल फुल रूमी जाक्ती। गो आं ब्रोव़शो रिना पाइश्शो मूरे नु मस्ला खुप्ताक्ङमी। गो आं सुरबु चाका नु आं खुदो जाइनुङ। गो आं अङगुर शांबु नु आं दूध तूनुङ। ए वारचपुकी, जने तूङीन। वारचपुकी दाक्तीकेम दुक्शो खोदेंशो दुमीन।
ङोमु पा आ गोठला कली माल्शो
2 गो गोल्ती, तन्न मइम्ङ। नेनीन, आं दाक्शो मुरुमी लाप्चो ख्रोकोल पाप्तु। “आं समी, आं दाक्शो मीश आल, आ ढुकुर, मारेइ मारेइम रिम्शो बाक्शो मीश आल लाप्चो रोक्को। आं पिया सीतम जिश्शो बाक्ब। आं चां नाक्दो ङा सीतम जिश्शो बाक्ब” देंत।
3 गो आं वा प्रुइक्ने थुम्ता। मिनु मार मेको लेंशा फेक्नुङा? गो आं खोइल चिक्ने थुम्ता। मिनु मार मुल लेंशा खप दिम्नुङा? ठेयब कुम्सो ३:१
4 आं दाक्शो वोंइश मुरुमी लाप्चो रोक्चा कली गुइ पिदानु, मेको तशा आं लुङगीर प्रेक्त।
5 मिनु गो आं दाक्शो वोंइश मुर कली लाप्चो रोक्चा कली बोक्ती। आं गुइ रे ब्रोव़शो रिना पाइश्शो मूरे याप्त। मिनु आं ब्रेप्चो रे ब्रोव़शो रिना पाइश्शो मूरे याप्शा आग्लोम लुम्साक्व।
6 मिनु गो आं दाक्शो मुर कली लाप्चो रोक्ता, तन्न मेको गाक्ने थुमा बाक्त। मेको मेकेर मबा। मेको गाक्तीके गो सुर्ता पाता। गो मेको कली माल्ता। तन्न मथिदु। गो मेको कली ब्रेत्ताक्ङ। तन्न मेकोम लोव़ मलेत्ती।
7 सहरम हिरशा खाल पाइबपुकीम आं कली थित्तीमी। मिनु मेकोपुकीम आं कली तुप्शा गारै गार सेल्तीमी। गारोम बाक्शा खाल पाइबपुकीमी आं फेक्शो वा यो रोइश्शा लाइक्तेक्म।
8 ए यरूसलेम ङा तमी “गो इन कली ‘गेपुकीम आं दाक्शो मुर कली ग्रुम्तीनी हना, मेको कली इन कली दाक्ब मुर दाक्तीकेम थशो बाक्ब’ देनीन” देंत। ठेयब कुम्सो २:५
9 मिनु मेकोपुकीमी “गे नेल्ल क्येङा दारशो मीश आल, इ दाक्शो वोंइश मुर दोपा अरु आन क्येङा दाक्शो दुम्मे? मारदे मेको इ दाक्शो वोंइश मुर ठेयब दुम्मे? मारदे आंइ कली मोदेंशो पा अरेनेवे?” देंतेक्म।
10 मिनु १० हजार आन दातेम यो आं दाक्शो मुर नेल्ल क्येङा दारशो नु आ कुल हाक्सीशो बाक्ब।
11 मेको आ पिया क्येख सुन के खोदेंशो बाक्ब। मेको आ चां हिरशो नु खद खोदेंशो क्येर बाक्ब।
12 मेको आ मिक्च खोला आ नेक्था बाक्ब ढुकुर आ मिक्च खोदेंशो बाक्ब। मेको दूधमी मुरशा केप्शो हीरा खोदेंशो बाक्ब।
13 मेको आ चोव़चो ब्रोव़शो रिना पाइब मस्ला खोदेंशो बाक्ब। मेको आ शुंइच ब्रोव़शो रिना पाइश्शो मूरे याप्ब लिली फू खोदेंशो बाक्ब।
14 मेको आ गुइ हीरा केप्शो सुन के खोदेंशो बाक्ब। मेको आ रां हात्ती आ दाराम नीलो हीरा क्येप्शो खोदेंशो बाक्ब।
15 मेको आ खोइल क्येख सुन के नित्तीक पाइश्शो बुश थाम खोदेंशो बाक्ब। मेको कोव़शोनु, लेबानोन ङा लाइश्शो रवा खोदेंशो पा दारशो बाक्ब।
16 ए यरूसलेम ङा मीश आलपुकी, मेको आ शोव़ ब्रोव़शो लोव़मी ब्रीशो बाक्ब। मेको थम दारशो बाक्ब। मेकोन आं दाक्शो वोंइश मुर नु आं वारच बाक्ब।