3
आ दाक्शो कली मिम्शो
1 गो नाक्दो रे आं ब्राख्येम आं दाक्शो वोंइश मुर कली माल्ता। गो मेको कली ब्रेत्ताक्ङ। तन्न मेकोम लोव़ मलेत्ती। ठेयब कुम्सो ५:६
2 गो बोक्शा, सहर गे लती। मिनु गो आं दाक्शो वोंइश मुर कली सहर नु लां मेर माल्ता। मोपा माल्ना माल्न बाक्ती, तन्न मथिदु।
3 सहर ङा खाल पाइबपुकीम थित्तीमी। मिनु गो “मार, गेपुकीमी आं दाक्शो वोंइश मुर कली थिन्नी?” दे हिल्लो पाता।
4 मिनु गो मेको आन कली प्रोंइशा इच्का आइक्ची ला जाक्दीश्शो नङ। गो आं दाक्शो वोंइश मुर कली थित्ता। मिनु गो मेको कली आं ममा आ खिं, आं जरमेसीशो कोठा मचाक्गु सम्म मेको कली ग्याइश्शा मप्रोनु। ठेयब कुम्सो ८:२
5 ए यरूसलेम ङा तमीपुकी, गो इन कली, किश्श नु रोकोश आन नेंमी अरेनुङ आंम दाक्चा क्येङा ङोंइती दाक्तीक कली मपोक्कीन।
सोलोमनम ग्युंबे पचा मिम्शो
6 गोरशो रागी रे मार जाक्बा? कुन के थाम खोदेंशो तांइसीब। मिनु मेको मूरे नु धूप खोदेंशो ब्रोव़शो रिना पाइब। मेको ग्याप्ब लेयब आन मस्ला खोदेंशो पा रिना पाइक्तु।
7 कोव़ङीन, एको सोलोमन कली कुरतीक बाक्ब। मेको आ एर ओंथ ६० जना इस्राएल ङा बोल्यो लडाइ पाइबम मेको कली खाल पशो बाक्तेक्म।
8 मेको नेल्लेमी या कुरशो बाक्तेक्म। मेको लडाइ पस जोक्ब बाक्तेक्म। नाक्दो लडाइ दुम्मेनु, आन तरवार पिम्सीशो बाक्तेक्म।
9 पिप सोलोमनम आंम कली कुरतीक का सेल्तु। मेको लेबानोन ङा लाइश्शो रवा आ शी के सेल्शो बाक्त।
10 मेकोमी मेको आ गुइ वोइक्तीक चांदी के नु आ नोले सुन के सेल्तु। आ नित्तीके प्याजी रङ के बाक्त। यरूसलेम ङा तमीपुकीमी, मेको आ आगा शुश क्येट लाइब शीम साप्शो बाक्तेक्म।
11 ए सियोन ङा तमीपुकी, लाङगा ग्रूशा पिने। मिनु पिप सोलोमनम सिरपेच गुक्शो कोव़ङीन। मेको सिरपेच मेको आ ममामी ग्येरसीशा मेको आं ग्युंबे नाक्ती गेशो बाक्त।