Magtubu dənə̂ Mãr̰ĩ Epes 4

Ɓama gə sii daa gənə̂ nare nə̂ Mãr̰ĩ duwa day

1 Əndi gə Pol gə gə yən dange dara giyə̂ gənə̂ aləw Aba ciri di da nə̂ urəng ajmar nəm lə̂, kalna hara dan bwarna ya Mãr̰ĩ ꞌwaga duwa gə an̰ji ꞌwagang də de. 2 Asəna dədə̂ng dodə̂ me, ina i nare nə̂ həlale me, unə̂ dədə̂ng bam me ca. Gun woy woy dwar̰angə̂ alnang mani nə̂ acn̰e kaw yinə̂ gə dwani me ca. 3 Jarna dara gama ɓama gə sii daa gə dundi dənə̂ Mãr̰ĩ duwa də ꞌyang gandədə ta di me gamna ɓama dan gə sii daa di managə həlala jwamə̂. 4 Nare nə̂nə̂ Mãr̰ĩ duwa nə̂ dayar mana mən də i Kris səw gə gədə gun səw mən tenene di me dundi də wuse kaw, i mən tenene me mani nə̂ Mãr̰ĩ ꞌwagang nə̂ anə̂ kal ərmə̂ dan dədə̂gələ̂ də kaw i mən tenene me ca. 5 Aba ciri ənda kaw i mən tenene me dusi ənda də kala Mãr̰ĩ dəwə̂ kaw i mən tenene me batem ənda kaw i mən tenene me ca. 6 Mãr̰ĩ kaw i mən tenene, an̰ji me i nare abragə pad, an̰ji lam dwãr̰ĩ nare dədə̂gələ̂ pad me, al giyə̂ nare sədə̂gələ̂ pad me dam lə̂ nare sədə̂gələ̂ pad me ca.

7 Ɗəm da Mãr̰ĩ ꞌyaw wi wi kaw dusi duwa də lade də ꞌyan̰a dəra-lə̂ bə̂də̂ di ya Kris ba u səw ꞌyadə gə made dara darandə ta de. 8 Ta də me i gwale gə Maktubu də diri way da:

«An̰ji hagə managə daa cog me,

yibə̂ nare bwagə tarwə̂ hara nəm me,

əsə̂gə nare mani nə̂ lade me ca.»

9 Ɗəm da gwale gə gə wayəw ba: «An̰ji hagə managə daa cog» də da gəndəw i na mo? Gəndəw da: Ɓag da managə Kris wor haga yala daa sən̰ da an̰ji chə̂ gəra dodə̂ sən̰a dədə̂ do. 10 Aba chə̂ gəra dodə̂ ta di i gə hagə ya daa cog siyaya dədə̂ dara kal ba dam lə̂ mani lə̂ pad. 11 I an̰ji me əsgə nare mani nə̂ lade mani nə̂ di i giyə̂ duwa gə jiga jiga di: nə̂ mən i nare nə̂ Jesu kəjəgə me, nə̂ mən i woni waya Mãr̰ĩ bəw me, nə̂ mən i woni wayagə nare nõ də lade me, nə̂ ɗang da i woni ɗəbə̂ Eglis dərə̂dələ̂ gələ̂gə nare gwale gənə̂ Mãr̰ĩ duwa me ca. 12 An̰ji əsgə nare nə̂ ta di giyə̂ gə ta di yande dara cendi ba ɗagər̰ana nare nə̂nə̂ Mãr̰ĩ duwa ba alna giyə̂ duwa dara kal nare nə̂nə̂ Mãr̰ĩ duwa nə̂ dayar mana mən də i ya Kris səw de di ba jwarna hana pii pii. 13 Ya ta de me, nare nə̂nə̂ Mãr̰ĩ duwa nə̂ dayar mana mən di ha ꞌywa dwana me ha hara pii pii bəra dayara daa mən pad managə dusi də kala Mãr̰ĩ gorəndəw dəwə̂ me də̂ ꞌwacn̰ang gandəw me ca. Yande da də̂ ha kədə̂ng nare nə̂ gechide nə̂ aliya ənda neyem ɗəm me də̂ ha kədə̂ng nare nə̂ ladəbe nan̰ bər̰in̰ ya Kris de me ca.

14 Yande da də ha wunə̂ng ya dine nə̂ ꞌyə̂ng de bə̂də̂ ɗəm. Nare woni lama mana ha neyama lamandə gə gwale gə kulagə bə̂də̂ ɗəm. Me cendi ha gələ̂ndə mani nə̂ acn̰e woni cwagədandə ya gale ba ugə mani cogədəgə nəm kame kame bə̂də̂ ɗəm. 15 Ɗəm da kal wi kaw waynaw jaw gwale səw gə dwani me, də̂ harang jwarba managə mani lə̂ pad bəra hara əjə̂ Kris gə i doni gə sii di dəw. 16 I an̰ju də me day doni gə sii daa mana mən dara cendi ba ɓamarna daa mən ya gun sarbo duwa yə gə doni gə səw ɓaməw nəm daa mən gədəw gə gun mən səw ta de. De gun səw gə jiga jiga di alna giyə̂ ladə mwom da, Kris səw gə mən di ha jwara me ha ər̰in̰ara nan̰ managə dwaniyə̂ me ca.

Ala gə mani nə̂ dərway nə̂ Mãr̰ĩ urgə

17 Yande da nə̂ wayang gə dwana də Aba ciri wun gandədə me nə̂ ajəmar lə̂ diyə̂ di. Kalna ꞌwə̂ bərmə̂ gənə̂ nare woni ꞌwacn̰a Mãr̰ĩ gə ɓag bə̂də̂ day ɗi, dara cendi ərmə̂ day da gəndəw ilə̂ bə̂də̂ 18 cendi dərə̂gə ɗechə̂r daa managə gwale səw gə Mãr̰ĩ wayəw di dəwə̂. Bələ̂ gə Mãr̰ĩ ꞌyaw də da cendi ilə̂ dwalin̰ə̂ bə̂də̂. Cendi ꞌocn̰ mani nə̂nə̂ Mãr̰ĩ duwa bə̂də̂ dara dədə̂gə woye me. 19 Cendi nol bam, ꞌocn̰ mani nə̂ lade me nə̂ acn̰e me bə̂də̂, cendi hurə̂ sədə̂gə mani nə̂ acn̰e-yə̂ wala gə wala me hurə̂ sədə̂gə mani woni ala jaweyə̂ ha nəm gə dərə̂gə pii pii me ca.

20 Ɗəm da ꞌyə̂ni da gwale gə gə gələ̂ng dara Kris da i yande bə̂də̂. 21 Ɓag da ꞌyə̂ni nə̂ anə̂ ɓamar daa gə Jesu mən di, anə̂ doy gwale gə gə wayəw ərəm dara dəw me gə gələ̂ng gandəw ꞌyə̂ni nə̂ anə̂ i duwa me da, gə gələ̂ i gwale səw gənə̂ Jesu duwa. 22 I na yande da kalna mani dan nə̂ anə̂ alagə pii wala gə anə̂ ꞌocn̰ gə Kris bədə̂ sən̰ di bam. Cende dədə ala mani nə̂ acn̰e ha ganang anə̂ ala gə mani nə̂ ta di, cende də ta di lamang meyandang bam. 23 Kalna dundi dənə̂ Mãr̰ĩ duwa kəlangənang ərmə̂ dan bam me ꞌyanang ərmə̂ gə dərway dusərə̂ngə̂ me ca. 24 Caga da alna mani nə̂ dərway nə̂ Mãr̰ĩ urgə nə̂ bor gə mani nə̂ ꞌyoləw, yande da mani dan nə̂ anə̂ ha ala ha ꞌya nə̂ təba me, nə̂ lade bər̰in̰ me, dara mani nə̂ ta di swa gwale səw lə̂.

25 Ina yande da kalna kulagə bam, ina wi wi kaw waynaw jaw gwale səw, dara pad əndalə̂ də̂ ɓamarang daa gədə gun mən. 26 Wala gə dusərə̂ng swana kaw, kalna ala acn̰a dara dusərə̂ng də so di ɗi me, kalna dusərə̂ng də swa di chinə̂ dodə̂ do me dawa ɗwadəna sən̰. 27 Kalnaw chidan bərmə̂ a ɗwayna dədə̂ng bam bə̂də̂. 28 Kal gun gə ina mee pii da a kalna miyni di ɗi ɗəm, kaləw a alna giyə̂ gə mana ur̰e duwa gə bərmə̂ gə təba me ꞌywana gə mani duwa nə̂ wama me, yande da an̰ji ha neyama ꞌwo hin̰e ꞌyagə woni ꞌywa bə̂də̂ me ca. 29 Kal gwale gə acn̰e dəmnə̂ bədə̂ngə̂ bə̂də̂, wayna gwale gə ꞌyole gə aba ꞌyagə nare dwana dara kalgə gə jwarbəna nəm managə dusi day də kalalə̂. Yande da anə̂ ha alagə nare woni dwaya gwale mani nə̂ lade.

30 Ər̰ə ꞌyə̂ni da asəna angal dan dara ala mani nə̂ ha ala dundi də wuse də Mãr̰ĩ ꞌyang gandədə n̰agəni bə̂də̂, an̰ji ꞌyadə wun ya lamba də gun biyə̂ng sədə̂ngə̂ dara ba anə̂ i nare duwa, nə̂ ɗân̰ wala mən ba kədə̂ng daa wamani-yə̂ gə dərin̰ bər̰in̰ an̰ju. 31 Gama gə gwale dusi yə̂ə̂ me, dusi dədə swa man̰a me, jarba gə nare me, nasəba gə marje daa pəng-pəng gə nare me, cadəba gə nare me ca da ꞌywarna mani nə̂ ta di bam hə̂n̰ dwar̰angə̂ me dusi də acn̰e də woy woy kaw kalnadə bam. 32 Ɗəm da alna dusi də lade me ina nare nə̂ həlale me gə kwanang me, kalna dusərə̂ng həlalana kwanang dədə̂gələ̂ ya Mãr̰ĩ ba kal gə dusəw həlal nəm dədə̂ngə̂ dara ba anə̂ i nare nə̂nə̂ Kris duwa di.