Magtubu dənə̂ Mãr̰ĩ Epes 5

Mani nə̂ nare nə̂nə̂ Mãr̰ĩ duwa ha alagə me nə̂ cendi ha alagə bə̂də̂ me

1 Caga da mani dan nə̂ ala wunə̂ ya Mãr̰ĩ duwa de dara ꞌyə̂ni da anə̂ i dəndaw, an̰ji urə̂nge. 2 Damna managə dwaniyə̂ jang ya Kris ba urəndə nəm de me ꞌwə̂ gə səw ꞌyadə gə made ya sarga də ꞌyoləw Mãr̰ĩ de dara darandə.

3 Caga da alna kaya də də ꞌya gə sədə̂ng mad mad bə̂də̂ ɗəm. Mani nə̂ acn̰e woni ala jawe nə̂ ya ta de da alnagə bə̂də̂ me alna harni mani-yə̂ bə̂də̂ me. Mani nə̂ acn̰e nə̂ ta di pad kaw wayna gwale day bədə̂ngə̂ bə̂də̂. Mani nə̂ ta di dol nare nə̂nə̂ Mãr̰ĩ duwa bə̂də̂ me ca. 4 Gwale gə acn̰e gə al jawe me gwale gə ꞌywala duwa ilə̂ bə̂də̂ me gwale gə wun̰jə̂ gə acn̰e me da dwalang ꞌyə̂ni bə̂də̂. Ɗəm da ꞌyə̂ni da alnaw Mãr̰ĩ doche dara mani nə̂ an̰ji al ganang di. 5 Ərmənə̂ dədə̂ngə̂ dara woni kaya me woni ala mani nə̂ acn̰e nə̂ al jawe me woni ala harni mani-yə̂. Mani nə̂ ta di yə dusərə̂gə ɗoy Mãr̰ĩ gə ɓag bam. Nare nə̂ ya ta di pad gə ha asagələ̂ kwandagə dwar̰agələ̂ dwãr̰ĩ dənə̂ Kris me Mãr̰ĩ me day-ə̂ di bə̂də̂ me ca.

6 Kal gun lamnang gə gwale gə gəndəw ilə̂ bə̂də̂ di bə̂də̂, dara mani nə̂ acn̰e nə̂ ya ta de pad me Mãr̰ĩ dusəw so nəm managə nare woni gən̰ə̂ bəw bam dədə̂gələ̂. 7 Yande da nare nə̂ ya ta de da ɓamarna gandagə daa bə̂də̂ pa pa. 8 Dara tanga pii da anə̂ dam ya banə̂ dam i diləmə̂ de, me caga da anə̂ ɓamar daa gə Aba ciri mən da ya ba də̂ i nare nə̂nə̂ managə acn̰e duwa de. Yande da alna mani nə̂ wunə̂ ya nare nə̂ dam managə acn̰e-yə̂ day de. 9 Dara managə acn̰e di yə̂ə̂ mani nə̂ lade me, ala gə mani nə̂ təba me, gwale səw me. 10 Yande da kan̰jəna bərmə̂ gaba ꞌwacn̰a mani nə̂ ꞌyoləw Aba ciri. 11 Mani nə̂ gəndəgə lə̂ bə̂də̂ nə̂ nare algə diləmə̂ ta di hurna sədə̂ngə̂ bə̂də̂, ɗəm da gəlnə̂ mani nə̂ ta di daa pədə̂n̰-yə̂ ɗə̂n̰. 12 Mani day nə̂ cendi algə budə̂lə̂ ta di al jawe nan̰e me waya gə gwale day daa kaw al jawe me ca. 13 Ɓag da mani nə̂ ta di pad wala gə gə gəlnə̂gə daa pədə̂n̰-yə̂ managə acn̰e-yə̂ mwom da, acn̰a day ina ya man de kaw gə ha yaragə daa lada ɗə̂n̰. 14 Ɗang tugə mani pad nə̂ gə bi gəndə̂gə daa pədə̂n̰-yə̂ di cor gədə managə acn̰e: i dara ta di me gə way ba;

"Əjəm gaba ꞌya nuni da a dərə̂m daa me

so daa nare nə̂ mare dwar̰agələ̂

me Kris ha acn̰ame dusəmə̂ gə mana gə acn̰e duwa".

15 Ina yande da asna angal dan managə hara dan-ə̂, kalna hara ya nare nə̂ mə̂ng de bə̂də̂, ɗəm da hana wunə̂ ya nare nə̂ dərə̂gə naagədə de. 16 Wala gə caga ka da acn̰ nan̰e, ina yande da ꞌyə̂ni da anə̂ ꞌywana bərmə̂ hin̰e gaba ala mani nə̂ lade da alnale. 17 I dara yande me kalna kədə̂ nare nə̂ woni ərəmə̂ gwale bə̂də̂ ɗi, ɗəm da ərmənə̂ dədəngə̂ ladle dara ꞌwacn̰a mani nə̂ Aba ciri urgə ba nə̂ alnagə di. 18 Kalna widəbə̂ gani gə ꞌogəw bẽ ɗɪ, dara widəbə̂ gə gani gə bẽ da ha meyandang i bam, ɗəm da kalna dundi dənə̂ Mãr̰ĩ duwa ꞌwana dusərəng daa telele tandi. 19 Yande da pad dan-ə̂ tunə̂ diri dədə bwaw Mãr̰ĩ jilay me diri də dundi dənə̂ Mãr̰ĩ duwa ꞌyang gandədə me. Tunə̂w Aba ciri diri bwanaw gə jilay gə dusərə̂ng də mən tenene. 20 Alnaw abrandə gə Mãr̰ĩ doche wala gə wala gə Aba ciri ənda gə Jesu Kris suməw managə mani nə̂ ꞌywanangə̂ pad me ca.

Abe day gə diyamo

21 Kal ina gun gə woy kaw asnaw jaw dəw dodə̂ dara anə̂ i woni alaw Kris horəmbə̂. 22 ꞌYeni nə̂ namde da; kal ina deme də woy kaw asnaw tərə̂də dədə dodə̂ ya ba də asəw gə Aba ciri gə Kris dədə dodə de. 23 Dara abe da i diyamo dədə̂ an̰ju ya Jesu Kris ba i nəm nare nə̂nə̂ Mãr̰ĩ duwa nə̂ dayar mana mən dədə̂gələ̂ ta de, an̰ji gang me bəl nare nə̂nə̂ Mãr̰ĩ nə̂ dayar mana mən nə̂ i ya səw de də daa an̰ju. 24 Ina ya ta de da deme də woy kaw asnaw tərə̂də dədə dodə̂ managə mani-yə̂ pad ya nare nə̂nə̂ Mãr̰ĩ duwa nə̂ dayar da mana mən ba gə asəw gə Kris dədə̂gə dodə̂ ta de.

25 ꞌYeni nə̂ abje kaw: gun gə woy kaw urnə̂ diyamo ya Kris ba urgə nare nə̂nə̂ Mãr̰ĩ duwa nə̂ dayar mana mən de me ꞌwu gə səw ꞌyadə gə made dara daragə ta de. 26 An̰ji al yande dara chəw gandagə Mãr̰ĩ mən tenene. An̰ji chəw gandagə Mãr̰ĩ i wiya gə wigə gə nimi me gə gwale me di. 27 An̰ji al yande dara ba gəl nare nə̂nə̂ Mãr̰ĩ duwa nə̂ dayar mana mən di ladni day gə nan̰ di daa dərə̂wə̂ an̰ju gə Aba ciri gang, me sədə̂gə piyarna walang bə̂də̂ me dərə̂gə ba lagədəna bə̂də̂ me, gə ꞌywana mani nə̂ acn̰e hin̰e sədə̂gələ̂ bə̂də̂ me. An̰ji ur nare nə̂nə̂ Mãr̰ĩ duwa nə̂ dayar mana mən də ba gə chənə̂w gandagə an̰ju mən tenene me ba gə asənagə gwale dədə̂gələ̂ hin̰e bə̂də̂ me ca. 28 I yande me abe gə woy kaw urnə̂ diyamo ya ba urgə səw duwa ta de: ya ta de da gun gə urnə̂ diyamo da, ya ba ur i səw duwa gə gun de. 29 Di mən yande gun al səw ichin̰ mo, bə̂də̂, an̰ji əsəwe me ɗangər̰əw ladə me, ya Kris ba al nəm dara nare nə̂nə̂ Mãr̰ĩ duwa nə̂ dayar mana mən de. 30 I dara pad də̂ ꞌyang i səw tuləw də mən di. 31 I dara ta də me, Maktubə dənə̂ Mãr̰ĩ way da: «Abe ha swa kala ciri dənə̂ abə̂w me iw me bam me ha ɓamaragə gə diyamo daa ca gədə̂ gun səw mən tenene.» 32 Managə gwale ta di dalawə̂ gwale səw gə geche mən budə̂rə̂ dodə̂: Əndi gə Pol nə̂ wayang gwale gə ta di gə way i dara Kris me nare nə̂nə̂ Mãr̰ĩ duwa nə̂ dayar da mana mən me. 33 Yande pad kaw ꞌyə̂ni da kal wi kaw urnə̂ diyamo ya səw duwa de me, deme də kaw alnaw tərə̂də horəmbə me ca.